TopTop
Begin typing your search above and press return to search.

'മാടമ്ബള്ളിയിലെ യക്ഷി'യെ കണ്ടെത്താന്‍ മാധ്യമ ആഭിചാരമോ?

കോഴിക്കോട് കൂടത്തായിലെ കൊലപാതക പരമ്ബരയ്ക്കു പിന്നില്‍ ജോളി ജോസഫ് എന്ന സ്ത്രീ മാത്രമാണോ അതോ അവര്‍ക്കു പിന്നില്‍ അദൃശ്യകരങ്ങള്‍ ഉണ്ടോ എന്നൊക്കെയുള്ള അന്വേഷണം പുരോഗമിക്കുന്നതേയുള്ളൂ. കേസ് ഈ ഘട്ടം വരെ എത്തിച്ച അന്വേഷണ സംഘം അക്കാര്യം കൃത്യമായി തന്നെ നിര്‍വഹിക്കും എന്ന് കരുതാം. കേസ് അന്വേഷിക്കുന്ന ക്രൈം ബ്രാഞ്ച് സംഘത്തിന്റെ തലവന്‍ പുറത്തു വിടുന്ന വിവരങ്ങളുടെ പതിന്മടങ്ങാണ് മാധ്യമങ്ങളിലൂടെ പുറത്തു വന്നുകൊണ്ടിരിക്കുന്നത്. പത്രങ്ങളും വാര്‍ത്താ ചാനലുകളും ഇക്കാര്യത്തില്‍ യാതൊരു വിധ പിശുക്കും കാണിക്കുന്നില്ല. സത്യത്തില്‍ ജോളി ജോസഫ് എന്ന സ്ത്രീക്ക് 'മണിച്ചിത്രത്താഴ്' എന്ന സിനിമയിലെ മാടമ്ബള്ളിയിലെ യക്ഷിയുടെ പരിവേഷം കല്പിച്ചു നല്‍കപ്പെട്ടിരിക്കുന്നു. ഒരു പക്ഷെ അതിലും വലിയ പരിവേഷം എന്ന് തന്നെ പറയേണ്ടി വരും. സെക്‌സും പ്രണയവും പ്രതികാരവും ധന മോഹവും ഒക്കെ ഒത്തുചേരുന്ന ഒരു വലിയ ക്രൈം ത്രില്ലറാണ് അനുദിനം വായനക്കാരനും പ്രേക്ഷകനും മുന്നില്‍ അനാവരണം ചെയ്യപ്പെടുന്നത്. ഒരു പക്ഷെ കഴിഞ്ഞ മുപ്പതു വര്‍ഷത്തിനിടയില്‍ ഇത്രയധികം മാധ്യമ ശ്രദ്ധ ലഭിച്ച മറ്റു മൂന്ന് സംഭവങ്ങള്‍ കണ്ണൂര്‍, കാസര്‍കോട് ജില്ലകളെ ഭയത്തിന്റെ പാതാള കയങ്ങളിലേക്ക് തള്ളിവിട്ട റിപ്പര്‍ കൊലപാതക പരമ്ബരയും ഐ എസ് ആര്‍ ഒ ചാരക്കേസും സോളാര്‍ കേസും ആയിരിക്കും. സെക്‌സും പ്രണയവും പ്രതികാരവും അടക്കമുള്ള എല്ലാ ചേരുവകളും സമജ്ജസമായി സമ്മേളിക്കുന്ന ഒന്നാകയാല്‍ അധികം വൈകാതെ തന്നെ കൂടത്തായി കേസുമായി ബന്ധപ്പെട്ട് നോവലുകളും സിനിമകളുമൊക്കെ പ്രതീക്ഷിക്കാം.

ഇക്കഴിഞ്ഞ ദിവസം ഒരു പത്രം കൂടത്തായി കേസിന് സമാനത കല്‍പ്പിക്കാന്‍ നാനി ഡോസ് ( Nannie Doss) എന്ന ഒരു അമേരിക്കക്കാരിയുടെ കഥയും പ്രസദ്ധീകരിച്ചിരുന്നു. 1905 - 1965 കാലഘട്ടത്തില്‍ ജീവിച്ചിരുന്ന നാനി ഡോസ് തന്റെ നാല് ഭര്‍ത്താക്കന്മാര്‍ അടക്കം 11 പേരെ വകവരുത്തിയ ആളാണ്. തന്റെ ഭര്‍ത്താക്കന്മാരെ കൊലപ്പെടുത്തിയതിനെക്കുറിച്ചു അന്വേഷണ ഉദ്യോഗസ്ഥനോട് ആയമ്മ പറഞ്ഞത് ' ഞാന്‍ എല്ലാം തികഞ്ഞ ഭര്‍ത്താവിനെ തിരയുകയായിരുന്നു' എന്നായിരുന്നത്രെ. കുലുങ്ങിചിരിച്ചുകൊണ്ടാണ് അവര്‍ ഇക്കാര്യം വെളിപ്പെടുത്തിയത് എന്നതിനാല്‍ 'കുലുങ്ങി ചിരിക്കുന്ന മുത്തശ്ശി' (Giggling Granny) എന്ന പേരും അവര്‍ക്കു വന്നു ചേര്‍ന്നു. നാനി ഡോസ് എന്ന പേര് ഗൂഗിളില്‍ പരതിയാല്‍ കൊലപാതക പരമ്ബരകളുടെ പേരില്‍ ക്രിമിനല്‍ ചരിത്രത്തില്‍ ഇടം പിടിച്ച ഏതാണ്ട് ഒരു ഡസന്‍ സ്ത്രീകളുടെ കഥകള്‍ ലഭ്യമാകും. കുഞ്ഞുങ്ങളെ മാത്രം കൊല ചെയ്തിരുന്ന അമേലിയ ഡൈറും (Amelia Dyer) ഇക്കൂട്ടത്തില്‍ പെടും. കേരളത്തില്‍ തന്നെ തലശ്ശേരി പിണറായിയിലെ സൗമ്യ എന്ന യുവതി നടത്തിയെന്ന് കരുതപ്പെടുന്ന കൊലപാതക പരമ്ബരയും ഏതാനും വര്‍ഷങ്ങള്‍ക്കു മുന്‍പ് കൊച്ചിയില്‍ അരങ്ങേറിയ മറ്റൊരു സയനൈഡ് കൂട്ടക്കൊലക്കും കൂടത്തായി കേസുമായി സമാനത കല്പിക്കപ്പെടുന്നുണ്ട്.

കൂടത്തായിലെ ഒരു കുടുംബത്തില്‍ നടന്ന മൂന്നു മരണങ്ങളടക്കം മൊത്തം ആറ് മരണങ്ങളിലെ ദുരൂഹത നീക്കുന്നതിന് വേണ്ടിയാണ് ക്രൈം ബ്രാഞ്ച് അന്വേഷണം ആരംഭിച്ചത്. എന്നാലിപ്പോള്‍ സമീപ പ്രദേശങ്ങളില്‍ സംഭവിച്ച വേറെയും പല മരണങ്ങള്‍ക്ക് പിന്നിലും ഇപ്പോള്‍ പ്രതിസ്ഥാനത്തു നില്‍ക്കുന്ന ജോളി ജോസഫ് എന്ന സ്ത്രീയാണെന്ന ആരോപണം ഉയര്‍ന്നിരിക്കുന്നു. മരിച്ചവര്‍ ജോളിയുമായി ഏതെങ്കിലുമൊക്കെ വിധത്തില്‍ ബന്ധം ഉള്ളവര്‍ ആയിരുന്നു എന്നതാണ് ആരോപണകര്‍ത്താക്കള്‍ പറയുന്നത്. എന്തായാലും ആവശ്യമെങ്കില്‍ ആ കേസുകളും ക്രൈം ബ്രാഞ്ച് സംഘം അന്വേഷിച്ചു സത്യം പുറത്തുകൊണ്ടുവരട്ടെ. എന്നാല്‍ ഏറെ അസ്വസ്ഥത ഉണ്ടാക്കുന്ന ഒരു കാര്യം ആരൊക്കെയോ ചിലര്‍ ക്രൈം ബ്രാഞ്ച് ഉദ്യോഗസ്ഥര്‍ ചമഞ്ഞു സമാന്തര അന്വേഷണം നടത്തുന്നു എന്നതാണ്. കഴിഞ്ഞ ദിവസം കേസ് അന്വേഷണത്തിന് നേതൃത്വം വഹിക്കുന്ന എസ് പി കെ. ജി സൈമണ്‍ തന്നെയാണ് ഇക്കാര്യം പുറത്തുവിട്ടത്. ക്രൈം ബ്രാഞ്ച് ചമഞ്ഞു സമാന്തര അന്വേഷണം നടത്തുന്നവര്‍ക്കെതിരെ നിയമ നടപടി സ്വീകരിക്കുമെന്ന് എസ് പി മുന്നറിയിപ്പ് നല്‍കിയിട്ടുണ്ടെങ്കിലും ആരൊക്കെയാണ് സമാന്തര അന്വേഷണം നടത്തുന്നതെന്നോ അവരുടെ ലക്ഷ്യംഎന്താണെന്നോ നിലവില്‍ വ്യക്തമല്ല. പോലീസിനെ അവരുടെ ജോലി ചെയ്യാന്‍ വിടൂ എന്ന് മാത്രമേ സമാന്തര അന്വേഷകരോട് തല്ക്കാലം പറയാനുള്ളൂ.

(Azhimukham believes in promoting diverse views and opinions on all issues. They need not always conform to our editorial positions)


Next Story

Related Stories