TopTop
Begin typing your search above and press return to search.

ടി.എൻ നൈനാൻ എഴുതുന്നു; ചൈനയും ആത്മനിർഭറിന്റെ പാതയിലാണ്; വിജയമാണ്, ഇന്ത്യയുടേതുപോലെ തിരിച്ചടിയല്ല കാരണമെന്ന് മാത്രം

ടി.എൻ നൈനാൻ എഴുതുന്നു; ചൈനയും ആത്മനിർഭറിന്റെ പാതയിലാണ്; വിജയമാണ്, ഇന്ത്യയുടേതുപോലെ തിരിച്ചടിയല്ല കാരണമെന്ന് മാത്രം

ചൈന ഇന്ത്യയുടെ വഴിയിലൂടെ സഞ്ചരിച്ച് ആത്മനിര്‍ഭര്‍ നടപ്പിലാക്കാന്‍ ലക്ഷ്യമിടുകയാണ്. അവിടെ തീരുമാനങ്ങള്‍ എടുക്കുന്ന പരമോന്നത സമിതി വളര്‍ച്ചയ്ക്കായി കയറ്റുമതിയെ ആശ്രയിക്കുന്നതിന് പകരം ആഭ്യന്തര വിപണിയിലേക്ക് ശ്രദ്ധ കേന്ദ്രീകരിക്കാന്‍ ശ്രമിക്കുകയാണ്. വ്യാപാര നിരോധനം മൂലമുള്ള പ്രശ്‌നങ്ങള്‍ മറികടക്കാന്‍ ആവശ്യമായ സാങ്കേതിക വിദ്യയും തന്ത്രപരമായ ഉത്പാദനവും ആഭ്യന്തരമായി നടത്താനാണ് ചൈന ശ്രമിക്കുന്നത്. ഇന്ത്യയ്ക്കും അതുതന്നെയാണ് വേണ്ടത്, കൂടുതല്‍ തീരുവകള്‍ ചുമത്തിയാണെന്ന് മാത്രം.

ജിഡിപിയുടെ അനുപാതം സംബന്ധിച്ച് വിദേശ വ്യാപാരത്തില്‍ കുറവ് വന്നതോടെ ഇരു രാജ്യങ്ങളും സ്വാശ്രയത്വത്തെക്കുറിച്ച് സംസാരിക്കാന്‍ തുടങ്ങുന്നത്. 2006 ല്‍ ജിഡിപിയുമായുള്ള വിദേശ വ്യാപാരത്തിന്റെ തോത് 64 ശതമാനമായിരുന്നിടത്തുനിന്ന് ചൈനയുടെത് 2019 ല്‍ 36 ശതമാനമായാണ് കുറഞ്ഞത്. ഇന്ത്യയുടെത് 2011-ല്‍ 56 ശതമാനമായിരുന്നത് ഇപ്പോള്‍ 40 ശതമാനമായി കുറഞ്ഞിരിക്കുന്നു. വലിയ സമ്പദ് വ്യവസ്ഥകളിലെ ഏറ്റവും വലിയ തകര്‍ച്ചയാണിത്. അമേരിക്കയിലേത് താരതമ്യേന വളരെ കുറവാണ്. 2008-ല്‍ 30 ശതമാനമായിരുന്നത് 2018-ല്‍ 28 ശതമാനമായാണ് കുറഞ്ഞത്. ജപ്പാന്റെത് നേരെ തിരിച്ചാണ്. വ്യാപാരവും ജിഡിപിയും തമ്മിലുള്ള അനുപാതം ദശാബ്ദത്തിനിടയില്‍ 34 ല്‍ നിന്ന് 37 ശതമാനമായി വര്‍ധിക്കുകയാണ് ഉണ്ടായത്. യൂറോപ്യന്‍ യൂണിയനും സമാനമായ ചലനങ്ങളാണ് ഉണ്ടായത്. കഴിഞ്ഞ ദശാബ്ദത്തില്‍ ലോക ജിഡിപിയുടെ അനുപാതമെന്ന നിലയില്‍ ലോക വ്യാപാരത്തിന്റെ തോത് രണ്ട് ശതമാനം കുറയുകയാണ് ഉണ്ടായത്. ഇതിന് പ്രധാന കാരണമായത് ഇന്ത്യയും ചൈനയുമാണ്. (കണക്കുകള്‍ക്ക് ആധാരം www.macrotrends.net)

ജിഡിപിയില്‍ വ്യാപരത്തിന്റെ തോതിലുണ്ടായ കുറവിന്റെ കാര്യത്തില്‍ മാത്രമല്ല, ഇന്ത്യയും ചൈനയും വേറിട്ട് നില്‍ക്കുന്നത്. മറ്റ് രാജ്യങ്ങളില്‍ കാണാത്ത വിധമായിരുന്നു വ്യാപാരവും ജിഡിപിയും തമ്മിലുണ്ടായ അനുപാതത്തില്‍ ഇരു രാജ്യങ്ങളിലുമുണ്ടായ വളര്‍ച്ച. അതുകൊണ്ട് തന്നെ സാമ്പത്തികമായ കാരണങ്ങളുടെ അടിസ്ഥാനത്തിലല്ലെങ്കിലും കണക്കുകളുടെ അടിസ്ഥാനത്തിലെങ്കിലും ഈ കുറവ് സംഭവിക്കേണ്ടതായിരുന്നു. എന്നാല്‍ ഏറ്റവും പ്രധാനമായ കാര്യം രണ്ട് രാജ്യങ്ങളിലും രണ്ട് വ്യത്യസ്ത കാരണങ്ങളാലാണ് ഇത് സംഭവിച്ചതെന്നതാണ്.

സാമ്പത്തിക നേട്ടവുമായി ബന്ധപ്പെട്ടുണ്ടായ പ്രശ്‌നങ്ങളാണ് ചൈനയില്‍ ഇങ്ങനെ സംഭവിക്കാൻ കാരണം. ചൈന കയറ്റുമതി ചെയ്യുന്ന ഉത്പന്നങ്ങള്‍ സ്വാംശീകരിക്കുന്നതിനുള്ള ഒരു പരിധി ലോക സമ്പദ് വ്യവസ്ഥകള്‍ക്കുണ്ട്. പ്രത്യേകിച്ചും മാനുഫാക്‌ചേഡ് ഗുഡ്‌സ്. കാരണം അത് രാജ്യങ്ങളുടെ ആഭ്യന്തര ഉത്പാദനത്തെ ബാധിക്കുന്നതാണ്. അതുമൂലം ഉണ്ടാകുന്ന തൊഴില്‍ നഷ്ടം അസമത്വം വര്‍ധിപ്പിക്കുകയും രാഷ്ട്രീയ പ്രത്യാഘാതങ്ങള്‍ ഉണ്ടാക്കുകയും ചെയ്യുന്നുണ്ടായിരുന്നു. അതോടൊപ്പം ഇന്ത്യയെ പോലുള്ള രാജ്യങ്ങളെ അത് ഇറക്കുമതിയിൽ നിന്നും ആഭ്യന്തര വ്യവസായങ്ങളെ സംരക്ഷിക്കുന്ന നയങ്ങൾ സ്വീകരിക്കുന്നതിലേക്ക് നയിക്കുകയും ചെയ്യും

മറ്റൊരു പരിമിതിയും ചൈനയ്ക്കുണ്ടായിരുന്നു. 2006ല്‍ ചൈനയുടെ വ്യാപാര മിച്ചം ജിഡിപിയുടെ എട്ട് ശതമാനമായി വര്‍ധിച്ചു. വിദേശനാണ്യ ശേഖരം 2014 ല്‍ ലക്ഷം കോടി ഡോളറായി. 2014 ല്‍ ഇത് ജിഡിപിയുടെ 40 ശതമാനമായി മാറി. ഇപ്പോഴും വിദേശനാണ്യ ശേഖരം 3.2 ലക്ഷം കോടി ഡോളറാണ്. ലോകത്തിലെ ഏറ്റവും വലുതാണ് ഇത്.

മൊത്തത്തിലുള്ള വളര്‍ച്ച ഉയര്‍ന്ന തോതിലായത് കാരണം ചൈനയില്‍ തൊഴില്‍ അധിഷ്ഠിത വ്യവസായങ്ങളുടെ മല്‍സരക്ഷമത കുറഞ്ഞുവരികയാണ്. അതുകൊണ്ട് തന്നെ സമീപകാലത്തായി കമ്പനികള്‍ ബംഗ്ലാദേശിലേക്കും വിയറ്റ്‌നാമിലേക്കും മാറുകയാണ്. ഇക്കാരണങ്ങൾ കൊണ്ട് തന്നെ ചൈനയ്ക്ക് ആഭ്യന്തര സമ്പദ് വ്യവസ്ഥയിലേക്ക് ശ്രദ്ധ കേന്ദ്രീകരിക്കുകയല്ലാതെ മറ്റ് മാര്‍ഗമില്ല.

ഇന്ത്യയെ സംബന്ധിച്ചാണെങ്കില്‍ വിദേശ വ്യാപാരത്തിന്റെ തോത് ജിഡിപിയെ അപേക്ഷിച്ച് കുറയുന്നതിന് കാരണം ചില പരാജയങ്ങളാണ്. 2011-12 ന് ശേഷം 300 ബില്ല്യണ്‍ കോടി ഡോളാറില്‍ താഴെയായിരുന്നു കയറ്റുമതി. ഇറക്കുമതിയും വര്‍ധിച്ചത് ഈ ഘട്ടത്തിലാണ്. അത് കയറ്റുമതിയെക്കാള്‍ കൂടിയത് ഏഴ് വര്‍ഷത്തിന് ശേഷമാണ്. സേവനമേഖലയിലെ സ്ഥിതി വ്യത്യസ്തമായിരുന്നു. അത് മറ്റ് ഇറക്കുമതിയേക്കാള്‍ ഇരട്ടി വേഗത്തില്‍ വര്‍ധിച്ചു. ലോക ശരാശരിയുടെ രണ്ടിരട്ടിയായിരുന്നു വളര്‍ച്ച.

വിദ്യാഭ്യാസം, ആരോഗ്യ മേഖല, വിനോദ സഞ്ചാരം തുടങ്ങിയ മേഖലകള്‍ തൊഴിലാളി കേന്ദ്രീകൃതമാണ്. എന്നാല്‍ മെര്‍ക്കന്റസ് വ്യാപാരങ്ങള്‍ക്കാണ് കൂടുതല്‍ മേഖലകളെ ഉള്‍ക്കൊള്ളാന്‍ കഴിയുക. ധാതുക്കള്‍, ഊര്‍ജ്ജം, ഗതാഗതം, തുടങ്ങിയ മേഖലകളുമായി ഇത് ബന്ധപ്പെടുന്നു. അതിന്റെ വ്യാപന ശേഷിയും കൂടുതലാണ്. ഈ മേഖലയിലൂടെ സഞ്ചരിച്ചാണ് വിയറ്റ്‌നാമും ബംഗ്ലാദേശും നേട്ടങ്ങള്‍ ഉണ്ടാക്കിയത്. എന്നാല്‍ സേവന മേഖലയിലെ കയറ്റുമതിയിലാണ് ഇന്ത്യ നേട്ടമുണ്ടാക്കിയത്. സേവന മേഖലയിലെ വ്യവസായങ്ങള്‍ അതില്‍നിന്ന് ലഭ്യമാകുന്ന ലാഭത്തിന്റെയും മറ്റും അടിസ്ഥാനത്തില്‍ കൂടുതല്‍ ധന കേന്ദ്രീകരണത്തിലേക്ക് നയിക്കുന്നു. അതുകൊണ്ടാണ് ഇന്ത്യയില്‍ ശതകോടിശ്വരന്‍മാര്‍ കൂടാന്‍ കാരണം.

(ദി പ്രിന്റുമായുള്ള കണ്ടന്റ് ഷെയറിംഗ് പാര്‍ട്ട്ണര്‍ഷിപ്പിന്റെ ഭാഗമായി ഐപിഎസ്എംഎഫിന്റെ അനുമതിയോടെ പ്രസിദ്ധീകരിക്കുന്നത്)


ടി.എന്‍ നൈനാന്‍

ടി.എന്‍ നൈനാന്‍

മുതിര്‍ന്ന മാധ്യമപ്രവര്‍ത്തകന്‍, ബിസിനസ് സ്റ്റാന്‍ഡാര്‍ഡ് പ്രൈ. ലിമിറ്റഡ് ചെയര്‍മാന്‍

Next Story

Related Stories