TopTop
Begin typing your search above and press return to search.

നഗരത്തിലെ ഇപ്പോഴത്തെ താല്‍ക്കാലികമായ വൈരസ്യത്തേക്കുറിച്ചാധി പൂണ്ടിരിക്കുന്നതല്ലല്ലോ എന്റെ ശരിമാര്‍ഗ്ഗം-ലോക്ക് ഡൗണിനെ കുറിച്ച്‌ യു എ ഖാദര്‍ എഴുതുന്നു

നഗരത്തിലെ ഇപ്പോഴത്തെ താല്‍ക്കാലികമായ വൈരസ്യത്തേക്കുറിച്ചാധി പൂണ്ടിരിക്കുന്നതല്ലല്ലോ എന്റെ ശരിമാര്‍ഗ്ഗം-ലോക്ക് ഡൗണിനെ കുറിച്ച്‌ യു എ ഖാദര്‍ എഴുതുന്നു

ഞാന്‍ വീട്ടില്‍ വെറുതെയിരിക്കാറില്ല. പകല്‍വേളകളില്‍ വായനയും ഇടയ്ക്ക് എഴുതണമെന്ന് വല്ലാതെ "തോന്നുമ്ബോള്‍ " മനസ്സിലെ ഉള്‍വിളിയ്ക്ക് പാകം എഴുതുന്ന സ്വഭാവക്കാരനുമാണ്. അടുക്കളയില്‍ വച്ചുണ്ടാക്കുന്ന വീട്ടുകാരിയ്ക്ക് ഒരു കൈ സഹായം എന്ന മട്ടില്‍ അടുക്കളയിലേക്ക് ചെല്ലാറുമില്ല. നേരത്തിനും കാലത്തിനും ഭക്ഷണം ഏലാക്കി ഭക്ഷണമേശ മേല്‍ പിഞ്ഞാണത്തില്‍ വിളമ്ബി വിളിക്കുമ്ബോള്‍ കഴുകി ചെന്നിരിക്കും. പാകം പോലെ വിളമ്ബിയുട്ടുന്ന വീട്ടുകാരി. എന്നെ എന്റെ കര്‍മ്മങ്ങളില്‍ തടസ്സെമൊന്നും കൂടാതെ ഒഴുക്കിനനുസരിച്ചും ഒഴുക്കിനെതിരായും ചലിക്കാന്‍ അവള്‍ ഒരിക്കലും വിസമ്മതം കാണിക്കാറുമില്ല.

അങ്ങനെ ഒത്തും ഒപ്പിച്ചും പോകുന്നതിന്നിടയിലാണ് വീട്ടില്‍ നിന്നും പുറത്തിറങ്ങാനാവാത്ത ദുരവസ്ഥ വന്നു പെട്ടിരിക്കുന്നത്. സാധാരണ വൈകുന്നേരങ്ങളില്‍ പുറത്തിറങ്ങി ഒന്നു ചുറ്റിയടിച്ച്‌ സന്ധ്യക്ക് തിരിച്ചെത്തും. ഞാന്‍ പങ്കെടുക്കേണ്ട സാംസ്കാരിക യോഗങ്ങള്‍ വല്ലതുമുണ്ടെങ്കില്‍ അന്നിത്തിരി വൈകുമെന്ന് വീട്ടുകാരിക്കറിയാം. വൈകിട്ടത്തെ ഇറക്കം ഒന്നുകില്‍ അളകാപുരിയിലെ ഏതെങ്കിലും സുഹൃത്തിനെ കാണാന്‍. ഒന്നിച്ച്‌ അല്‍പനേരം കഴിഞ്ഞതും കടന്നതുമൊക്കെപ്പറഞ്ഞു മനസൊന്നയയാന്‍, തുറന്നൊന്നു ചിരിക്കാന്‍ (തിക്കോടിയന്‍ വിട്ടുപിരിഞ്ഞ ശേഷം ആ പരിപാടി നിന്നു). എന്നാലും അപൂര്‍വ്വമായി അടുത്ത സുഹൃത്തുക്കളുമായി ഒത്തു കൂടാമെന്ന കമ്ബം വച്ചാണ് അളകാപുരിയിലൊന്ന് കയറുന്നത്.

പിന്നെ സായാഹ്നം ചുകപ്പിയ്ക്കുന്നത് മനോഹരമായ കോഴിക്കോട്ടെ കടപ്പുറത്തെ ശില്‍പ്പ സൌധങ്ങളുടെ തണല്‍ തഴപ്പിലിരുന്നാണ്. കോഴിക്കോട്ടെ എല്ലാ തലമുറയിലും പെട്ട ആള്‍ക്കാര്‍ മുക്കാലേയരക്കാലും അവിടെ പകല്‍വേളകളിലെ 'അങ്ങാടിച്ചൂടാന്തരം ' ഒന്നു തണുപ്പിക്കാന്‍ എത്തുന്നു. പതിവനുസരിച്ചു ഒരേ തൂവല്‍ പക്ഷികള്‍ ഒന്നിച്ചിരുന്നു കൊക്കുരുമ്മുന്ന നല്ല നേരങ്ങള്‍ കോഴിക്കോട്ടല്ലാതെ മറ്റൊരു ദിക്കിലും ഇങ്ങനെ കാണുകയില്ല.(വെറുതെയല്ല കോഴിക്കോട്ടു തമ്ബടിച്ചു കൂടിയ സാഹിത്യകാരന്മാരും കലാകാരന്മാരും കുറ്റിയും പറിച്ച്‌ ഇവിടം വിടാത്തത്) പറഞ്ഞു വന്നത് കോഴിക്കോട്ട് തന്നെ ആടയിരുന്ന എന്റെ ജീവതത്തെ സക്രിയമായും സജീവമായും നിലനിര്‍ത്തിയത് ഇവിടത്തെ ആരോഗ്യ കലാ പുഷ്ക്കലമായ അവസ്ഥയും അന്തരീക്ഷവുമാണ്. അതിനെയെല്ലാം ഇല്ലാതാക്കും വിധത്തിലാണല്ലോ കോറോണാ ബാധയുടെ ആശങ്കയുടെ വിഷം നമ്മുടെ ജീവിതാന്തരീക്ഷത്തെ തീണ്ടിയത്.

ആ വിഷം നമ്മുടെ കൊച്ചു കേരളത്തില്‍ നിന്ന് ഇല്ലാതാക്കാന്‍ നമ്മുടെ പ്രിയപ്പെട്ട ജനകീയ സര്‍ക്കാര്‍ വേണ്ടുന്ന എല്ലാ പരിപാടികളും ഫലപ്രദമാം വിധം ആസൂത്രണം ചെയ്ത് നടപ്പാക്കികൊണ്ടിരിക്കയാണ്. അതിന്റെ പ്രധാന ഇനമാണ് പൊതുസമ്ബര്‍ക്ക പരിപാടികളില്‍ നിന്ന് വിട്ടു നില്‍ക്കുക എന്ന ആഹ്വാനം. അതിനാലാണ് എന്റെ സായാഹ്നങ്ങള്‍ വീട്ടില്‍ തന്നെയാക്കിയത്. ഈ അകന്നു നില്‍ക്കലിലൂടെയാണ് കോഴിക്കോടന്‍ പൂരായിരങ്ങളുടെ ഒളി ചിതറും നഷ്ടബോധങ്ങളെ കുറിച്ചോര്‍ക്കാന്‍ തോന്നുന്നത്. ആയിരങ്ങള്‍ ആഘോഷമാടിയ കടപ്പുറം ശൂന്യം, സംഗീതം തുളുമ്ബും തെക്കേപ്പുറം മാളികയിലെ ഹാര്‍മോണിയപ്പെട്ടിയും തൊട്ടരികിലെ തബലയും മൂകം. മാളിക കൂട്ടായ്മ വേണ്ടന്ന് വെച്ചു. തളി പത്മശ്രീയിലെ കര്‍ണാട്ടിക്ക് സംഗീത കച്ചേരികള്‍ നിലച്ചു. ടൌണ്‍ ഹാളും ടാഗോര്‍ ഹാളും കളിവിളക്കുകള്‍ തെളിയിക്കുന്നത് രോഗാശങ്കകള്‍ അകന്ന് മാറിയ ശേഷം.

നാടിനെ ഗ്രസിച്ച രോഗ ഭീഷണിക്കെതിരായി സര്‍ക്കാരിനൊപ്പം അണിചേര്‍ന്ന് പ്രവര്‍ത്തിക്കേണ്ടത് സ്വന്തം ഉത്തരവാദിത്തമാണെന്ന് കരുതിയിറങ്ങിയവര്‍ക്കാവുന്നത് ചെയ്തു കൊടുക്കുകയാണല്ലോ എന്റെയും ചുമതല. നഗരത്തിലെ ഇപ്പോഴത്തെ താല്‍ക്കാലികമായ വൈരസ്യത്തേക്കുറിച്ചാധി പൂണ്ടിരിക്കുന്നതല്ലല്ലോ എന്റെ ശരിമാര്‍ഗ്ഗം.


Next Story

Related Stories