TopTop

സ്വാതന്ത്ര്യ മോഹവുമായി സ്കോട്ട്‌ലാന്റ്; കരാറില്ലാത്ത ബ്രെക്സിറ്റിനെതിരെ പടുകൂറ്റൻ റാലി

സ്വാതന്ത്ര്യ മോഹവുമായി സ്കോട്ട്‌ലാന്റ്; കരാറില്ലാത്ത ബ്രെക്സിറ്റിനെതിരെ പടുകൂറ്റൻ റാലി

കരാർ ഇല്ലാതെ ബ്രെക്സിറ്റ് നടപ്പാക്കാനുള്ള തീരുമാനത്തിനെതിരെ പശ്ചാത്തലത്തില്‍ എഡിൻബർഗിലെ തെരുവുകളില്‍ വൻ പ്രതിഷേധ മാർച്ച്. സ്കോട്ടിഷ് അനുകൂല സ്വാതന്ത്ര്യ മാർച്ചില്‍ ആയിരക്കണക്കിന് ആളുകൾ പങ്കെടുത്തു. ബ്രിട്ടന് യൂറോപ്യന്‍ യൂണിയനില്‍നിന്നും പിന്മാരാനാണ് താല്‍പര്യം, സ്കോട്ട്ലാന്‍ഡിന് തുടരാനും. 2016-ല്‍ നടന്ന ഹിത പരിശോധനയില്‍ സ്കോട്ടിഷ് ജനതയില്‍ ഭൂരിഭാഗവും ഇ.യുവില്‍തന്നെ തുടരാനാണ് താല്‍പര്യപ്പെട്ടത്. അതോടെയാണ് സ്കോട്ട്‌ലാന്‍ഡിന്റെ സ്വാതന്ത്ര്യ മോഹത്തിന് വലിയ ചിറകുകള്‍ വെച്ചതും.

നേരത്തെ യുകെയിൽ നിന്ന് വേർപെടുത്തുന്നതിനെ പിന്തുണയ്ക്കുന്ന ഗ്രൂപ്പുകളും സംഘടനകളും ചേർന്ന് ഗ്ലാസ്‌ഗോ, ആബർ‌ഡീൻ, പെർത്ത് എന്നിവിടങ്ങളിൽ കൂറ്റന്‍ റാലികള്‍ സംഘടിപ്പിച്ചിരുന്നു. ഇപ്പോള്‍ എല്ലാവരും ഒരുമിച്ച് 'ഓൾ അണ്ടർ വൺ ബാനർ' (എയുഒബി) എന്ന പേരിലാണ് സമരത്തിനിറങ്ങുന്നത്. ഹോളിറൂഡ് പാർക്കിൽനിന്നും ആരംഭിച്ച മാർച്ച് മെഡോസിൽ അവസാനിക്കുമെന്നാണ് പ്രതീക്ഷിച്ചിരുന്നത്. എന്നാല്‍ നഗരമധ്യത്തിൽ എത്തിയപ്പോഴേക്കും റോഡുകള്‍ അടയ്ക്കപ്പെട്ടു. 'നമുക്കെന്താണ് വേണ്ടത്? സ്വാതന്ത്ര്യം' എന്ന മുദ്രാവാക്യം ഉയര്‍ത്തിക്കൊണ്ട് ബാൻഡുകളുടെയും, ബൈക്ക് റാലികളുടെയും മറ്റു വര്‍ണ്ണപൊലിമകളോടെയുമാണ്‌ മാര്‍ച്ച് സംഘടിപ്പിക്കപ്പെട്ടത്.

സ്വാതന്ത്ര്യം വെണമെന്ന ആവശ്യം 2014 മുതല്‍തന്നെ സ്കോട്ട്ലാന്‍ഡില്‍ നിന്നും ഉയർന്നു തുടങ്ങിയിരുന്നു. എന്നാല്‍ യു.കെ എന്ന കൂട്ടായ്മയെ അനുകൂലിക്കുന്നവര്‍ ചേര്‍ന്നാണ് അന്നവരെ പിന്തിരിപ്പിച്ചത്. യു.കെയില്‍ നിന്നും പിന്മാറിയാല്‍ യൂറോപ്യന്‍ യൂണിയനില്‍നിന്നുതന്നെ പുറത്തുപോകുമെന്ന കാരണം പറഞ്ഞായിരുന്നു അന്ന് പിന്തിരിപ്പിക്കൽ നടപടി. സ്പെയിനും ബെല്‍ജിയവുമായിരുന്നു അന്നു സ്കോട്ട്ലാന്‍ഡിന്‍റെ മോഹങ്ങള്‍ക്കുമേല്‍ കരിനിഴല്‍ വീഴ്ത്തിയത്. അതിനും ഒരു കാരണമുണ്ടായിരുന്നു. സ്പെയിനിലെ കാറ്റലോണിയന്‍ പ്രവിശ്യയും വര്‍ഷങ്ങളായി സ്വാതന്ത്ര്യമോഹവുമായി നടക്കുകയാണ്. സ്കോട്ട്ലാന്‍ഡിന്‍റെ ആവശ്യം അംഗീകരിക്കപ്പെട്ടാല്‍ തുടര്‍ചലനങ്ങള്‍ സ്പെയിനിലും ഉണ്ടാകുമെന്ന് ഉറപ്പായിരുന്നു. അതാണ്‌ സ്പെയിൻ ഇത്തരം ഒരു നീക്കം നടത്തിയത്.
അതേസമയം, സ്കോട്ടിഷ് ജനതയില്‍ ഭൂരിഭാഗവും ഇപ്പോള്‍ ഇ.യു വിടുന്നതിനെ അനുകൂലിക്കുന്നുവെന്നും റിപ്പോര്‍ട്ടുകളുണ്ട്. യു.കെയുടെ കൂടെ നിന്നില്ലെങ്കില്‍ അത് ആഭ്യന്തര സമ്പദ് വ്യവസ്ഥയെ സാരമായി ബാധിച്ചേക്കുമെന്ന ആശങ്കയാണ് കാരണം. എന്നാല്‍, ഇ.യു-വില്‍ അംഗത്വം ലഭിക്കുകയും അതുവഴി വാണിജ്യ – വ്യാപാര ബന്ധങ്ങള്‍ സുഗമമാക്കുന്നതിനായി രൂപീകരിച്ച കസ്റ്റംസ് യൂണിയനിലും അംഗമാവുകയും ചെയ്യുന്നതിലൂടെ മറ്റൊന്നും പേടിക്കേണ്ടതില്ലെന്നാണ് യു.കെയില്‍ നിന്നും സ്വാതന്ത്ര്യം വേണമെന്ന് ആവശ്യപ്പെടുന്നവര്‍ പറയുന്നത്.


Next Story

Related Stories