TopTop
Begin typing your search above and press return to search.

പാരീസ് ഉടമ്പടി നടപ്പാക്കുന്നതിൽ സമവായമില്ല, മാഡ്രിഡ് കാലാവസ്ഥാ ഉച്ചകോടി അനിശ്ചിതത്വത്തിൽ; പ്രതിഷേധം ശക്തം

പാരീസ് ഉടമ്പടി നടപ്പാക്കുന്നതിൽ സമവായമില്ല, മാഡ്രിഡ് കാലാവസ്ഥാ ഉച്ചകോടി അനിശ്ചിതത്വത്തിൽ; പ്രതിഷേധം ശക്തം

സ്‍പെയിനിലെ മാഡ്രിഡിൽ നടക്കുന്ന കാലാവസ്ഥാ ഉച്ചകോടി അഭിപ്രായ സമവായമുണ്ടാക്കാനാവാതെ അനിശ്ചിതത്വത്തില്‍. ചര്‍ച്ചകള്‍ വെള്ളിയാഴ്ച അവസാനിക്കേണ്ടതായിരുന്നു. എന്നാല്‍ പാരീസ് ഉടമ്പടി നടപ്പിലാക്കുന്നത് സംബന്ധിച്ച് രാജ്യങ്ങൾ തമ്മിൽ അഭിപ്രായ സമവായത്തില്‍ എത്താതായതോടെ മാരത്തൺ ചര്‍ച്ചകള്‍ തുടരുകയാണ്. ഈ ഉച്ചകോടിയും കാര്യമായ പുരോഗതിയൊന്നും ഉണ്ടാക്കാനാവാതെ പിരിയേണ്ടിവന്ന സാഹചര്യത്തില്‍ ലോകമെമ്പാടുമുള്ള പരിസ്ഥിതി പ്രവര്‍ത്തകര്‍ നിരാശയിലാണ്.

കാലാവസ്ഥാവ്യതിയാനം സംബന്ധിച്ച് മുമ്പത്തേതിനെക്കാൾ ഭിന്ന നിലപാടിലാണ് രാജ്യങ്ങളുള്ളതെന്നും കാലാവസ്ഥാ ഉടമ്പടി ഒപ്പിടുന്നതിലേക്ക് ചർച്ച എത്തിയേക്കില്ലെന്നും ഉച്ചകോടിയില്‍ പങ്കെടുക്കുന്ന ചില അംഗങ്ങള്‍ വ്യക്തമാക്കുന്നു. കാർബൺ മാർക്കറ്റ്, ഭൗമതാപനില വർധിക്കുന്നതുകൊണ്ടുണ്ടാകുന്ന നഷ്ടം നികത്തൽ എന്നിവയുൾപ്പെടെയുള്ള വിഷയങ്ങളിലാണ് വെള്ളിയാഴ്ച അഭിപ്രായഭിന്നത രൂക്ഷമായത്. പാരീസ് കരാർ വൈകിപ്പിക്കുന്നത് ഓസ്ട്രേലിയ, യു.എസ്., കാനഡ, ബ്രസീൽ, ഇന്ത്യ, ചൈന തുടങ്ങിയ രാജ്യങ്ങളാണെന്ന് ചെറുദ്വീപുരാജ്യങ്ങളുടെ സഖ്യത്തിലെ (എ.ഒ.എസ്.ഐ.എസ്) അംഗങ്ങള്‍ ആരോപിക്കുന്നു.

ഭൗമതാപനിലയിലെ വർധന രണ്ടുഡിഗ്രി സെൽഷ്യൽസിൽ അധികമാകാതിരിക്കാൻ നടപടി സ്വീകരിക്കുകയെന്നതാണ് 2015-ൽ വന്ന പാരീസ് ഉടമ്പടിയുടെ പ്രധാനലക്ഷ്യം. എന്നാല്‍ യൂറോപ്യൻ യൂണിയൻ അടക്കമുള്ള ചില രാജ്യങ്ങള്‍ ഹരിതഗൃഹ വാതക ബഹിര്‍ഗമനം കുറയ്ക്കുന്നതിനുള്ള പുതിയ ദീർഘകാല ലക്ഷ്യങ്ങളുമായി മുന്നോട്ട് വന്നു. ചിലിയാണ് അന്തിമ കരാറുമായി രംഗത്തെത്തിയത്. എന്നാല്‍ മറ്റു രാജ്യങ്ങള്‍ അതിനെ എതിര്‍ക്കുന്നു. അതിനിടയിലും കോസ്റ്റാറിക്കയുടെ നേതൃത്വത്തിൽ ബ്രിട്ടൻ, ജർമ്മനി, സ്പെയിൻ, ന്യൂസിലൻഡ് എന്നിവയുൾപ്പെടെ 31 രാജ്യങ്ങളില്‍ നിന്നുള്ള പ്രതിനിധി സംഘം ചർച്ചകൾക്ക് വ്യക്തത വരുത്താൻ ശ്രമിക്കുന്നുണ്ട്. ആഗോള താപനില 1.5 ഡിഗ്രി സെന്റിഗ്രേഡ്‌ ആയി പരിമിതപ്പെടുത്തുക എന്നതാണ് പ്രധാന ലക്ഷ്യം.

COP25 എന്നറിയപ്പെടുന്ന ഈ വർഷത്തെ ഉച്ചകൊടിയില്‍ നിന്നും വലിയ മുന്നേറ്റങ്ങളൊന്നും ആരും പ്രതീക്ഷിച്ചിരുന്നില്ല. എന്നാല്‍ ഏറ്റവും കുറഞ്ഞത് രാജ്യങ്ങള്‍തമ്മില്‍ അല്‍പം സഹകരണ മനോഭാവമെങ്കിലും പ്രകടിപ്പിക്കുമെന്ന് പ്രതീക്ഷിച്ചിരുന്നു. ആഗോള താപനില 2 ഡിഗ്രി സെന്റിഗ്രേഡ്‌ കവിയാതെ കക്കുന്നതിനുള്ള ചുരുക്കം ചില നടപടികലെങ്കിലും പ്രഖ്യാപിക്കുമെന്ന് കരുതിയിരുന്നു. ചില സമ്പന്ന രാജ്യങ്ങളുടെ ഭാഗത്തുനിന്നുണ്ടാകുന്ന നിരുത്തരവാദപരമായ നിലപാടുകളില്‍ ദരിദ്ര രാജ്യങ്ങൾ പ്രകോപിതരായി. യൂറോപ്യൻ യൂണിയനും ചില വികസ്വര രാജ്യങ്ങളുടെ ഒരു കൂട്ടായ്മയും മികച്ചൊരു പദ്ധതി കൊണ്ടുവരാന്‍ പാരമാവധി പരിശ്രമിക്കുന്നുണ്ട്.


Next Story

Related Stories