TopTop
Begin typing your search above and press return to search.

എബോളയെ അതിജീവിച്ച സിയറ ലിയോണ്‍ മാതൃക, കൊറോണയെ ആഫ്രിക്ക നേരിടുന്നതിങ്ങനെയൊക്കെയാണ്; കൂടാതെ ആഫ്രിക്കന്‍ മലയാളികള്‍ ശ്രദ്ധിക്കേണ്ട ചില കാര്യങ്ങളും

എബോളയെ അതിജീവിച്ച സിയറ ലിയോണ്‍ മാതൃക,  കൊറോണയെ ആഫ്രിക്ക നേരിടുന്നതിങ്ങനെയൊക്കെയാണ്; കൂടാതെ ആഫ്രിക്കന്‍ മലയാളികള്‍ ശ്രദ്ധിക്കേണ്ട ചില കാര്യങ്ങളും

ലിസോത്തോ, മലാവി, സിയറ ലിയോൺ, സാവോ ടോമേ ആൻഡ് പ്രിൻസിപ്പേ, സൗത്ത് സുഡാൻ, ബോട്സ്വാന, ബുറുണ്ടി, കൊമോറോസ് എന്നീ ആഫ്രിക്കൻ രാജ്യങ്ങളിൽ മാർച്ച് 29 വരെ കൊറോണ റിപ്പോർട്ട് ചെയ്യപ്പെട്ടിട്ടില്ല. (ലോകാരോഗ്യ സംഘടന)

എന്നാൽ ലോകാരോഗ്യ സംഘടന നൽകുന്ന വിവരമനുസരിച്ച് 4351 കൊറോണ കേസുകളാണ് ആഫ്രിക്കൻ ഭൂഖണ്ഡത്തിൽ നിന്നും റിപ്പോർട്ട് ചെയ്തിട്ടുള്ളത്. ദക്ഷിണാഫ്രിക്കയിലാണ് ഏറ്റവും കൂടുതൽ രോഗബാധിതരുള്ളത്, 1187 പേർ. ഈജിപ്ത് ( 576 ) അൾജീരിയ (454 ), മൊറോക്കോ (437 ) ടുണീഷ്യ (228 ) സെനഗൽ (130), മൗറീഷ്യസ് (102 ) ഘാന (141), കോട് ദേ ഐവറി (140) ബുർകിന ഫാസോ (207 ) കാമറോൺ (113) എന്നി രാജ്യങ്ങളിലാണ് നൂറിലധികം കൊറോണ കേസുകൾ റിപ്പോർട്ട് ചെയ്തിട്ടുള്ളത്. ബാക്കി ആഫ്രിക്കൻ രാജ്യങ്ങളിൽ എല്ലാം നൂറിൽ താഴെയാണ് കൊറോണ റിപ്പോർട്ട് ചെയ്തവരുടെ എണ്ണം.

എബോള നാശം വിതച്ച സിയറ ലിയോൺ ഇന്ന് വരെ കൊറോണ വിമുക്തമാണ്. അയൽ രാജ്യങ്ങളായ ഗിനിയയിലും ലൈബീരിയയിലും കൊറോണ റിപ്പോർട്ട് ചെയ്യപ്പെട്ടിട്ടുണ്ട്. അതിർത്തികളിൽ നിന്ന് രോഗം പടരുന്നത് പ്രതിരോധിക്കുന്നതിന്റെ ഭാഗമായി, സിയറ ലിയോൺ അതിർത്തികൾ എല്ലാം തന്നെ അടച്ചു, മാർച്ച് 24 മുതൽ പന്ത്രണ്ട് മാസത്തേക്ക് ആരോഗ്യ അടിയന്തരാവസ്ഥ പ്രസിഡന്റ് ജൂലിയസ് പ്രഖ്യാപിച്ചിട്ടുണ്ട് ഗിനിയയും, ലൈബീരിയയും കൊറോണ പ്രതിരോധത്തിന്റെ ഭാഗമായി അടിയന്തരാവസ്ഥയിൽ കൂടി കടന്നു പോവുകയാണ്. എബോള മരണം വിതച്ച ഈ മൂന്ന് രാജ്യങ്ങളും, കൊറോണ പ്രതിരോധ പ്രവർത്തനങ്ങൾ ഊർജിതമാക്കിയിട്ടുണ്ട്.

ചൈനയുമായി നിരന്തര വ്യാപാര ബന്ധങ്ങൾ ഉണ്ടായിട്ടും ആഫ്രിക്കയിൽ റിപ്പോർട്ട് ചെയ്യുന്ന കൊറോണ കേസുകൾ എല്ലാം തന്നെ യൂറോപ്പില്‍ യാത്ര കഴിഞ്ഞു ആഫ്രിക്കയിൽ എത്തിയവരിൽ നിന്ന് പകർന്നതാണെന്നു കാണാം (WHO). അതുകൊണ്ട് തന്നെ ഘാ , ദക്ഷിണാഫ്രിക്ക ,സിംബാവെ , കെനിയ എന്നീ രാജ്യങ്ങൾ കൊറോണ ബാധിത രാജ്യങ്ങളിൽ നിന്നുള്ള വ്യോമഗതാഗതം പൂർണമായും നിർത്തിവെച്ചിരിക്കുകയാണ്.

എബോളയും കൊറോണയും സിയറ ലിയോണും

സിയറ ലിയോണിലെ മണ്ടോ ഭാഷയിൽ, എബോളയെ വിളിക്കുന്നത് "bonda wote " എന്നാണ്. " family turn around " അഥവാ കുടുംബത്തെ കീഴ്മേൽ മറിക്കുന്നത് എന്നർത്ഥം. കോവിഡിനും എബോളയ്ക്കുമുള്ള സാമ്യങ്ങൾ അത് കുടുംബത്തെ മുഴുവൻ ബാധിക്കാനുള്ള സാധ്യതയാണ്. രോഗബാധ കുടുബത്തിന്റെ (വിശാല അർത്ഥത്തിൽ രാജ്യത്തിന്‍റെ) അടിസ്ഥാന ശീലങ്ങളെ തന്നെ മാറ്റിമറിക്കും. സാമൂഹ്യ അകലം, ഐസൊലേഷൻ, കുടുംബങ്ങളിലെ പ്രായമായവരുടെയും , രോഗബാധിതരുടെയും പ്രശ്നങ്ങൾ, 'ലോക്ക് ഡൌൺ' എന്നിവ ഒരു വ്യക്തിയുടെ ജീവിതത്തെ അടിമുടി മാറ്റാൻ കെല്പുള്ളവയാണ്. രാജ്യത്തിന്‍റെ സാമൂഹ്യ സാമ്പത്തിക ക്രമങ്ങളെ പൂർണമായും മാറ്റിയെഴുതും.

സിയറ ലിയോണിൽ എബോളയുടെ സമയത്ത് സ്ഥാപിതമായ കമ്മ്യൂണിറ്റി കെയർ സെന്ററുകൾ, അടിസ്ഥാന സൗകര്യങ്ങൾ ഇല്ലാതിരുന്ന ഒരു രാജ്യം ഒരു മഹാമാരിയെ അതിജീവിച്ചതിന്റെ ഉദാഹരണമാണ്. കുടുംബങ്ങളും, രോഗബാധിതരും, ആരോഗ്യപ്രവർത്തകരുടെയും ഇടയിൽ ഉണ്ടായിരുന്ന ഭയത്തെയും, ഉത്‌കണ്ഠകളെയും അകറ്റി, സഹകരണത്തിലേക്കും സഹവർത്തിത്വത്തിലേക്കും എത്തിച്ചത് കമ്മ്യൂണിറ്റി കെയർ സെന്ററുകളാണ്.

ആശുപത്രികളോ ആരോഗ്യകേന്ദ്രങ്ങളോ ഇല്ലാതിരുന്ന ഗ്രാമങ്ങളിൽ, പ്രാഥമിക പരിശീലനം ലഭിച്ച, സർക്കാർ ജോലികളുടെ ഭാഗമല്ലാതിരുന്ന ആരോഗ്യ സന്നദ്ധ പ്രവർത്തകരായിരുന്നു കമ്മ്യൂണിറ്റി കെയർ സെന്ററിന്റെ ഭാഗമാകാൻ എത്തിയത്. സഹജീവികളെ മരണത്തിന് വിട്ടു കൊടുക്കാൻ മനസില്ലാതിരുന്ന സാധാരണക്കാരും, രോഗത്തിന്റെ എല്ലാ സാധ്യതകളെയും മനസ്സിലാക്കിക്കൊണ്ട് കമ്മ്യൂണിറ്റി കെയർ സെന്ററുകളുടെ ഭാഗമായി. പരിചിതമായ മുഖങ്ങൾ, തങ്ങൾക്കു വേണ്ടപ്പെട്ടവർ രോഗപ്രതിരോധ പ്രവർത്തനങ്ങളുടെ ഭാഗമായതോടു കൂടി, ഗ്രാമങ്ങളിലെ ജനങ്ങൾ രോഗപ്രതിരോധ പ്രവർത്തനങ്ങളുടെ ഭാഗമായി. മോഡേൺ മെഡിസിനെ ഭയത്തോടു കൂടി കണ്ടിരുന്ന ജനതയിലേക്കു, സിയറ ലിയോണിൽ ആരോഗ്യപ്രവർത്തകർ ഇറങ്ങി ചെന്നത് കമ്മ്യൂണിറ്റി കെയർ സെന്ററുകളിലൂടെയാണ്. കമ്മ്യൂണിറ്റി കെയർ സെന്ററുകളുടെ പ്രവർത്തന ഫലമായി എബോളയുടെ വ്യാപനം കുറഞ്ഞു. കമ്മ്യൂണിറ്റി കെയർ സെന്ററുകൾക്ക് കൈകാര്യം ചെയ്യാൻ കഴിയാതിരുന്ന രോഗികളെ താത്കാലികമായി നിർമിച്ച ഇന്റെൻസീവ് കെയർ യൂണിറ്റുകളിൽ ശുശ്രൂഷിച്ചിരുന്നത് സൈന്യമായിരുന്നു.

മറ്റൊരു ശ്രദ്ധിക്കേണ്ട വസ്തുത "ക്വാറന്റൈൻ " ചെയ്യപ്പെടേണ്ടതിന്റെ ഗൗരവം മനസിലാക്കി ഗ്രാമങ്ങൾ സ്വയം " ക്വാറന്റൈൻ " നടപടികൾ സിയറ ലിയോണിൽ സ്വീകരിച്ചു. സർക്കാർ സംവിധാനങ്ങൾക്കു നിർബന്ധിച്ചു, അടിച്ചേല്പിക്കേണ്ടുന്ന ഒന്നായിരുന്നില്ല സിയറ ലിയോണിലെ ക്വാറന്റൈൻ. 1991-2002 കാലഘട്ടങ്ങളിൽ ആഭ്യന്തര കലാപ കാലത്ത്, നുഴഞ്ഞു കയറ്റക്കാരെ പ്രതിരോധിക്കാൻ ഓരോ ഗ്രമത്തിലും യുവാക്കളുടെ സംഘങ്ങൾ ഉണ്ടായിരുന്നു. ഈ സംഘങ്ങൾ എബോള കാലത്ത് പുറത്ത് നിന്നും വരുന്ന രോഗ വാഹകരായ മനുഷ്യരെ തിരിച്ചറിയാനും, അവരെ ഐസൊലേറ്റ് ചെയ്യുന്നതിനുമുള്ള ആരോഗ്യപ്രവർത്തകരായി മാറി.

വൃദ്ധരും, കിടപ്പ് രോഗികളും, ഭിന്നശേഷിയുള്ളവരും സിയറ ലിയോണിൽ കമ്മ്യൂണിറ്റി കെയർ സെന്ററുകൾ വഴി സംരക്ഷിക്കപ്പെട്ടിരുന്നു. അറുപത് വയസിന് മുകളിലുള്ളവർ കോവിഡ് കാലത്ത് മരണത്തിന് വിട്ടു കൊടുക്കേണ്ടി വരുന്ന ഇറ്റലിയും സ്പെയിനും നമ്മുടെ മുന്നിലുള്ളപ്പോൾ സിയറ ലിയോൺ വ്യത്യസ്തമാകുന്നത് അവിടെയാണ്.

സിയറ ലിയോണിൽ എബോളക്കാലത്ത് പറഞ്ഞിരുന്ന പോലെ കുടുംബങ്ങൾ എപിഡമോളജിസ്റ്റുകളെ പോലെ ചിന്തിക്കണം. സാമൂഹിക അകലം, മാനസിക ഒരുമ, വ്യക്തി ശുചിത്വം, കരുതൽ എന്നിവ കൊണ്ട് മാത്രമേ കോവിഡിനെ പ്രതിരോധിക്കാൻ കഴിയുകയുള്ളു.

ആഫ്രിക്ക നേരിടുന്ന വെല്ലുവിളികൾ

കോറോണയെ പ്രതിരോധിക്കുന്നത്തിന്റെ ഭാഗമായി ബഹുഭൂരിപക്ഷം ആഫ്രിക്കൻ രാജ്യങ്ങളും അതിർത്തികൾ അടച്ചു, സാമൂഹിക ചടങ്ങുകൾ, ഫുട്ബാൾ മത്സരങ്ങൾ, സംഗീത നിശകൾ എന്നിവ നിർത്തലാക്കി. സാമൂഹ്യ വ്യാപനം തടയുന്നതിന്റെ ഭാഗമായി പൊതുഗതാഗതം പല ആഫ്രിക്കൻ രാജ്യങ്ങളിലും നിർത്തലാക്കി എങ്കിലും പ്രായോഗിക തലത്തിൽ നടപ്പിലാകുന്നില്ല. അടിസ്ഥാന സൗകര്യങ്ങളുടെ അഭാവം, ആരോഗ്യ പ്രവർത്തകരുടെ എണ്ണത്തിലുള്ള കുറവ്, ആശുപത്രികളുടെ അഭാവം എന്നിവ ആഫ്രിക്കൻ രാജ്യങ്ങൾ നേരിടുന്ന കനത്ത വെല്ലുവിളിയാണ്.

കൊറോണയുടെ വ്യാപനത്തെ ലാഘവത്തോടെ എടുക്കുന്നത് കൊണ്ടുതന്നെ സാമൂഹ്യ വ്യാപനം തടയാൻ സർക്കാർ സംവിധാനങ്ങൾക്ക് കഴിയാതെ പോകുന്നുണ്ട്. അന്ധവിശ്വാസങ്ങളും വ്യാജപ്രചാരണങ്ങളും തടയുന്നതിൽ സർക്കാർ സംവിധാനങ്ങൾക്ക് കഴിയാത്തത് കോവിഡിന്റെ വ്യാപനത്തെ സഹായിക്കും.

ആഫ്രിക്കൻ മലയാളികൾ ശ്രദ്ധിക്കേണ്ടത്

ഇന്ത്യ ലോക്ക് ഡൌൺ ആണ്. വ്യോമ, നാവിക ഗതാഗത മാർഗങ്ങൾ പൂർണമായും നിലച്ചിരിക്കുമ്പോൾ അടിയന്തിര ഘട്ടങ്ങളിൽ നാട്ടിലേക്ക് തിരികെ വരാൻ കഴിയില്ല എന്ന ചിന്ത ഉണ്ടാക്കുന്ന ഉത്കണ്ഠകൾ അതിജീവിക്കേണ്ടതുണ്ട്. സാമൂഹിക അകലം പാലിക്കുക എന്നുള്ളതും, കോറോണയെ പ്രതിരോധിക്കാനുള്ള നിർദേശങ്ങൾ പാലിക്കുക എന്നുള്ളതുമാണ് ഇപ്പോൾ ചെയ്യാൻ കഴിയുന്നത്.

എംബസികൾ ഇല്ലാത്ത രാജ്യങ്ങളിൽ മലയാളി കൂട്ടായ്‍മകളുടെയും, ഇന്ത്യൻ കൂട്ടായ്മയുടെയും ഭാഗമാകുന്നത്‌ വിവരങ്ങൾ പങ്കുവെയ്ക്കുനന്തിനും മാനസിക പിന്തുണ ലഭിക്കുന്നതിനും സഹായിക്കും. അടിയന്തിര ആവശ്യങ്ങൾക്ക് വിദേശ കാര്യ മന്ത്രാലയം ഹെല്‍പ്പ് ഡെസ്ക് തുടങ്ങിയിട്ടുണ്ട്. വിദേശ കാര്യ മന്ത്രാലയം പുറപ്പെടുവിച്ച ആഫ്രിക്കയുമായി ബന്ധപ്പെട്ട .കോവിഡ് കണ്ട്രോൾ റൂം - ടോൾ ഫ്രീ നമ്പർ - 18 00 11 87 97 , +91 -11 -230 12 113 ,+91-11 -230 -14 -104, +91 -11 230 -17 -905 , ഫാക്സ് നമ്പർ - +91 -11 -230 -18 -158 ,ഇമെയിൽ - covid19@mea.gov.in .വിദേശകാര്യമന്ത്രാലയത്തിൽ ആഫ്രിക്കൻ മേഖലയുമായി ബന്ധപ്പെടേണ്ട ഔദ്യോഗിക വ്യക്തികളുടെ വിവരങ്ങൾ Mr. R. Ravindra. JS (C&WA) - +91 -11- 490 -18-431,. Ms. Aarsha N.S. IFS (OT) - Mr. Ashok Kumar R. IFS (OT ) . +91 -975 -18-88-687.


സോമി സോളമന്‍

സോമി സോളമന്‍

വിദ്യാഭ്യാസ പ്രവർത്തക

Next Story

Related Stories