TopTop
Begin typing your search above and press return to search.

സെസും, സര്‍ചാര്‍ജും കാലിയാക്കുന്ന സംസ്ഥാന ഖജനാവുകള്‍

സെസും, സര്‍ചാര്‍ജും കാലിയാക്കുന്ന സംസ്ഥാന ഖജനാവുകള്‍

കിഫ്ബി കഴിഞ്ഞാല്‍ സംസ്ഥാന ധനമന്ത്രി തോമസ് ഐസക് ഏറ്റവുമധികം പ്രതീക്ഷ പുലര്‍ത്തിയ ഒന്നായിരുന്നു ചരക്കു സേവന നികുതി (ജിഎസ്ടി). ഉപഭോഗ സംസ്ഥാനമായ കേരളത്തിന്റെ വരുമാനം ഗണ്യമായി ഉയര്‍ത്തുന്നതിന് ജിഎസ്ടി വഴിയൊരുക്കം എന്നായിരുന്നു ഐസക്കിന്റെ അനുമാനം. സാമ്പത്തിക മാന്ദ്യവും മഹാമാരിയും മൂലം ജിഎസ്ടി വരുമാനം കൂപ്പുകുത്തുന്നതിന് മുമ്പു തന്നെ ഐസക്കിന്റെ ആത്മവിശ്വാസം അസ്ഥാനത്താണെന്ന വീക്ഷണം പുലര്‍ത്തിയവര്‍ ധാരാളമായിരുന്നു. നികുതി ചുമത്താനുള്ള സംസ്ഥാനങ്ങളുടെ ഭരണഘടനപരമായ അവകാശം കേന്ദ്രത്തിന് തീറെഴുതുന്ന ജിഎസ്ടി സംവിധാനം സംസ്ഥാനങ്ങളുടെ പരിമിതമായ സാമ്പത്തിക അധികാരങ്ങള്‍ കൂടി ഇല്ലാതാക്കുമെന്നായിരുന്നു വിമര്‍ശനങ്ങളുടെ ഊന്നല്‍.

'ജിഎസ്ടി ബിസിനസ്സിന് നല്ലത് ഫെഡറലിസത്തിന് കുരുക്ക്' എന്നപേരില്‍ ദ ഹിന്ദു ദിനപത്രത്തിന്റെ സോഷ്യല്‍ അഫയേഴ്സ് പത്രാധിപര്‍ ജി. സമ്പത്ത് 2015-ജൂണില്‍ എഴുതിയ ലേഖനങ്ങളില്‍ ഇക്കാര്യങ്ങള്‍ വിശദീകരിച്ചിരുന്നു. മാന്ദ്യവും, മഹാമാരിയും നികുതി പിരിവിനെ തെക്കോട്ട് എടുത്തതോടെ ജിഎസ്ടി-യെ കുറിച്ചുള്ള കേരളത്തിന്റെ കണക്കു കൂട്ടലുകള്‍ ജലരേഖയായി. കേരളത്തിന്റെ മാത്രമല്ല മറ്റു സംസ്ഥാനങ്ങളുടെയും സ്ഥിതി സമാനമാണ്. ജിഎസ്ടി നഷ്ടപരിഹാരം നല്‍കുന്നതിനുള്ള കേന്ദ്ര സര്‍ക്കാരിന്റെ വിമുഖതയും, നഷ്ടപരിഹാര തുകയുടെ ഒരു വിഹിതം സംസ്ഥാനങ്ങള്‍ സ്വന്തം നിലയില്‍ റിസര്‍വ് ബാങ്കില്‍ നിന്നും വായ്പയെടുക്കാന്‍ നിര്‍ബന്ധിതമായതും സംസ്ഥാനങ്ങളുടെ ധനകാര്യ അവകാശങ്ങള്‍ പരമദയനീയമായി മാറിയതിന്റെ തെളിവാണ്. കോവിഡ് മഹാമാരിയായി പടരുന്നതിനും മുമ്പുതന്നെ സംസ്ഥാനങ്ങള്‍ തങ്ങളുടെ ദയനീയസ്ഥിതി വിളംബരം ചെയ്യാന്‍ തുടങ്ങിയിരുന്നു. ജിഎസ്ടി നഷ്ടപരിഹാരവുമായി ബന്ധപ്പെട്ട് 2019 നവംബര്‍ 20-ന് ഡല്‍ഹിയില്‍ ചേര്‍ന്ന ഒമ്പത് സംസ്ഥാന ധനമന്ത്രിമാരുടെ യോഗം അംഗീകരിച്ച പ്രസ്താവന ഈയൊരു സ്ഥിതിവിശേഷത്തിന്റെ ഉദാഹരണമാണ്. 'സംസ്ഥാനങ്ങളുടെ ധനപരമായ പരമാധികാരം ജിഎസ്ടി-യുടെ വരുതിയിലാക്കുന്നതിന് സമ്മതിച്ചതിനുള്ള' കാരണം നഷ്ടപരിഹാരം നല്‍കമെന്നുള്ള ഉറപ്പായിരുന്നുവെന്ന് പ്രസ്താവന പറയുന്നു. ഇത്രയൊക്കെ ആയിട്ടും സംസ്ഥാനങ്ങളുടെ ധനപരമായ പരമാധികാരം അടിയറവ് വച്ചത് ഒരു രാഷ്ട്രീയവിഷയമായി ഇപ്പോഴും ആരും ഉയര്‍ത്തുന്നില്ലെന്നതാണ് ആശ്ചര്യകരം.

.ജിഎസ്ടി വഴി സംസ്ഥാനങ്ങളുടെ പരിമിതമായ ധനകാര്യ പരമാധികാരം പോലും ഇല്ലാതാക്കിയ കേന്ദ്രസര്‍ക്കാര്‍ സംസ്ഥാനങ്ങളെ സാമ്പത്തികമായി കൂടുതലായി ഞെരുക്കുന്ന രീതി ഇത്തവണത്തെ ബജറ്റിലും തുടരുന്നു. കേന്ദ്ര സര്‍ക്കാരിന്റെ നികുതി വരുമാനം സംസ്ഥാനങ്ങളുമായി പങ്കു വയ്ക്കുന്നതാണ് കേന്ദ്രവും, സംസ്ഥാനങ്ങളും തമ്മിലുള്ള സാമ്പത്തിക ഇടപാടുകളുടെ അടിത്തറ. കേന്ദ്രസര്‍ക്കാര്‍ ഒരോ അഞ്ചു കൊല്ലവും നിയമിക്കുന്ന ധനകാര്യ കമീഷന്‍ ആണ് ഈ പങ്കു വയ്ക്കലിന്റെ വാസ്തുഘടന രൂപപ്പെടുത്തുന്നത്. 14-ാം ധനകാര്യ കമീഷന്‍ നല്‍കിയ ശിപാര്‍ശയനുസരിച്ച് കേന്ദ്രസര്‍ക്കാരിന്റെ നികുതി വരുമാനത്തിന്റെ 42 ശതമാനം സംസ്ഥാനങ്ങളുമായി പങ്കു വയ്ക്കണം എന്നായിരുന്നു. 15-ാം ധനകാര്യ കമീഷന്‍ ഇപ്പോള്‍ സമര്‍പ്പിച്ച ശിപാര്‍ശയനനുസരിച്ച് ഇത് 41 ശതമാനമായി കുറച്ചു. സംസ്ഥാനങ്ങളുടെ വിഹിതം 41 അല്ലെങ്കില്‍ 42 ശതമാനം എന്നു കേള്‍ക്കുമ്പോള്‍ സ്വാഭാവികമായും കൊള്ളാവുന്ന സംഗതിയാണ് എന്നു തോന്നും. പക്ഷെ കേന്ദ്ര സര്‍ക്കാര്‍ അടുത്ത കാലത്തായി സ്വീകരിച്ചിട്ടുള്ള നയമനുസരിച്ച് സംസ്ഥാനങ്ങള്‍ക്ക് അര്‍ഹതപ്പെട്ട വിഹിതം നിഷേധിക്കുന്നതിനുള്ള ആസൂത്രിതമായ ശ്രമം നടക്കുന്നുവെന്നു സംശയിക്കേണ്ടിയിരിക്കുന്നു.

ധനകാര്യ കമീഷന്‍ ശിപാര്‍ശ പ്രകാരം കേന്ദ്ര നികുതി വരുമാനം മാത്രമാണ് സംസ്ഥാനങ്ങളുമായി പങ്ക് വയ്ക്കേണ്ടത്. സര്‍ചാര്‍ജുകളും, സെസ്സുകളും വഴി കേന്ദ്രത്തിന് ലഭിക്കുന്ന വരുമാനം സംസ്ഥാനങ്ങളുമായി പങ്ക് വയ്ക്കേണ്ടതില്ല. നികുതി കൂട്ടുന്നതിന് പകരം സര്‍ചാര്‍ജും, സെസ്സും ഏര്‍പ്പെടുത്തുന്നതു വഴി സംസ്ഥാനങ്ങള്‍ക്ക് ലഭിക്കേണ്ട വരുമാനത്തിന്റെ പങ്ക് കുറയ്ക്കുന്ന വിദ്യയാണ് കേന്ദ്രം നടപ്പിലാക്കുന്നത്. ഇത്തവണത്തെ ബജറ്റില്‍ കേന്ദ്രം ഒരുപടി കൂടെ കടന്ന് നിലവിലുള്ള നികുതിയുടെ ഒരു നിശ്ചിത ശതമാനം സെസ്സായി പരിവര്‍ത്തനപ്പെടുത്തി സംസ്ഥാനങ്ങളുടെ വിഹിതം ഗണ്യമായി കുറയ്ക്കുന്ന പ്രക്രിയ കൂടുതല്‍ ശക്തമാക്കിയിരിക്കുന്നു. ധനന്ത്രി നിര്‍മല സീതരാമന്‍ തിങ്കളാഴ്ച അവതരിപ്പിച്ച ബജറ്റില്‍ പ്രഖ്യാപിച്ച അഗ്രി ഇന്‍ഫ്ര സെസ്സ് ഈയൊരു സമീപനത്തിന്റെ ലക്ഷണമൊത്ത മാതൃകയാണ്.

കാര്‍ഷിക മേഖലയിലെ അടിസ്ഥാന സൗകര്യങ്ങള്‍ വികസിപ്പിക്കാനുള്ള പണം ശേഖരിക്കുന്നതിനുള്ള മാര്‍ഗം പെട്രോളിനും, ഡീസലിനും, മദ്യത്തിനും, മറ്റു ചില ഉല്‍പ്പന്നങ്ങള്‍ക്കും ഏര്‍പ്പെടുത്തിയ സെസ്സാണ്. ഈ സെസ്സ് പിരിക്കുന്നതിന്റെ രീതിയാണ് സംസ്ഥാനങ്ങള്‍ക്ക് വിനയാകുന്നത്. പെട്രോളിനും, ഡീസലിനും യഥാക്രമം 2.50, 4 രൂപ വീതം സെസ്സ് ആണ് ഏര്‍പ്പെടുത്തിയിട്ടുളളത്. പക്ഷേ ഇതിന്റെ ഭാരം പുതുതായി ജനങ്ങള്‍ വഹിക്കേണ്ടി വരില്ല. ബ്രാന്‍ഡ് ചെയ്യാത്ത പെട്രോളിന് നിലവിലുള്ള എക്സൈസ്, അഡീഷണല്‍ എക്സൈസ് നികുതികള്‍ യഥാക്രമം 1.58, 1-രൂപ വീതം കുറയ്ക്കുകയും പകരം സെസ്സ് ഏര്‍പ്പെടുത്തുകയുമായിരിന്നു. ഡീസലിന്റെ കാര്യത്തിലും എക്സൈസ്, അഡീഷണല്‍ എക്സൈസ് തീരുവയില്‍ കുറവ് വരുത്തി സെസ്സ് ആക്കി മാറ്റുകയായിരുന്നു. ഇറക്കുമതി ചെയ്യുന്ന മദ്യത്തിന്റെ അടിസ്ഥാന കസ്റ്റംസ് തീരുവ 150 ശതമാനം എന്ന നിലയില്‍ നിന്നും 50 ശതമാനമാക്കി കുറച്ചതിനു ശേഷം 100 ശതമാനം സെസ്സ് ആക്കി മാറ്റുകയായിരുന്നു. മറ്റു ചില ഉല്‍പ്പന്നങ്ങളുടെ കാര്യത്തിലും ഈ നിലയിലുള്ള മാറ്റങ്ങള്‍ ശ്രീമതി സീതാരാമന്‍ നടത്തി.

ജനങ്ങളെ നേരിട്ടു ബാധിക്കാത്ത ഇത്തരം നികുതി പരിഷ്‌ക്കാരങ്ങള്‍ കൊണ്ട് എന്താണ് കുഴപ്പം എന്ന ചോദ്യം സ്വാഭാവികമാണ്. എക്സൈസ് ഡ്യൂട്ടി, അഡീഷണല്‍ എക്സൈസ് ഡ്യൂട്ടി, കസ്റ്റംസ് തീരുവ എന്നിവയില്‍ നിന്നുള്ള വരുമാനം സംസ്ഥാന സര്‍ക്കാരുകളുമായി കേന്ദ്രം പങ്കു വയ്ക്കണം. സെസ്സാവുമ്പോള്‍ പങ്കു വയ്ക്കേണ്ടതില്ല. കേന്ദ്രസര്‍ക്കാര്‍ സെസും, സര്‍ചാര്‍ജും കൂടുതലായി ഏര്‍പ്പെടുത്തുന്നതിന്റെ രഹസ്യം ഇതാണ്. കാനേജി ഇന്ത്യ (Carneige India) സ്ഥാപനത്തിലെ ഫേലോ ആയ സുയാഷ് റായിയുടെ അഭിപ്രായത്തില്‍ കേന്ദ്രം ഇത്തരം നടപടികള്‍ സ്വീകരിക്കുന്നത് സംസ്ഥാനങ്ങളുമായി വരുമാനം പങ്ക് വയ്ക്കുന്നതിന്റെ വിഹിതം കുറയ്ക്കുന്നതിന് വേണ്ടിയാണ്. കേന്ദ്രത്തിന്റെ എക്സൈസ് ഡ്യൂട്ടി വരുമാനത്തിന്റെ 10-15 ശതമാനം മാത്രമായിരുന്നു 2017-18 വരെ സെസിന്റെ വിഹിതം. എന്നാല്‍ ഇപ്പോള്‍ അത് 50 ശതമാനം ആയി ഉയര്‍ന്നുവെന്ന് ഒരു ലേഖനത്തില്‍ അദ്ദേഹം പറയുന്നു. (1). അതായത് എക്സൈസ് വരുമാനത്തില്‍ നിന്നും സംസ്ഥാനങ്ങള്‍ക്ക് ലഭിച്ചിരുന്ന വിഹിതത്തിന്റെ പങ്ക് കഴിഞ്ഞ മൂന്നു വര്‍ഷത്തിനുള്ളില്‍ 35 ശതമാനത്തോളം കുറഞ്ഞു. ജിഎസ്ടി സമ്പ്രദായം അംഗീകരിച്ചതോടെ സാമ്പത്തിക പരമാധികാരം ഏറെക്കുറെ ഇല്ലാതായ സംസ്ഥാനങ്ങളെ കൂടുതല്‍ ഗുരുതരമായ സാമ്പത്തിക പ്രതിസന്ധികളിലേക്ക് കേന്ദ്രം തള്ളിവിടുന്നതിന്റെ ഉദാഹരണമാണ് കേന്ദ്രത്തിന്റെ വരുമാനത്തില്‍ സെസ്-സര്‍ചാര്‍ജുകളുടെ വിഹിതം ഉയരുന്ന പ്രവണത.

1: സുയാഷ് റായി: Budget 2021: The ghosts of the Past, Present and Future: ദ വയര്‍ ജനുവരി 30, 2021

.


കെ.പി സേതുനാഥ്

കെ.പി സേതുനാഥ്

മാധ്യമപ്രവര്‍ത്തകന്‍

Next Story

Related Stories