TopTop
Begin typing your search above and press return to search.

ഭൂമിയോടും പ്രകൃതിയോടും മനുഷ്യര്‍ ചെയ്ത ക്രൂരതയുടെ ഫലമാണ് കോവിഡ് ദുരന്തം, വീടുകളിൽ തളച്ചിടപ്പെട്ട ഈ സമയം തന്നെ നാം ഇടപെട്ടേ മതിയാവൂ

ഭൂമിയോടും പ്രകൃതിയോടും മനുഷ്യര്‍ ചെയ്ത ക്രൂരതയുടെ ഫലമാണ് കോവിഡ് ദുരന്തം, വീടുകളിൽ തളച്ചിടപ്പെട്ട ഈ സമയം തന്നെ നാം ഇടപെട്ടേ മതിയാവൂ

"I See the Earth ! What a beautiful sight ! " ഈ ആശ്ചര്യ പ്രകടനം ഉണ്ടായത് ലോകത്തെ ആദ്യത്തെ ബഹിരാകാശ സഞ്ചാരിയായ യൂറി ഗഗാറിനിൽ നിന്നാണ്. ബഹിരാകാശത്തു നിന്ന് ഭൂമിയെ നോക്കിക്കണ്ട ഗഗാറിൻ അത്ഭുതപ്പെട്ടുപോയതിന്റെ ആഴം ആ വരികളിൽ നിന്ന് നമുക്ക് വായിച്ചെടുക്കാം. മനേഹരകാഴ്ചയായി കാണപ്പെട്ട ഭൂമി ഒരു മഹാമാരിയുടെ പിടിയിലമർന്ന്, ജനജീവിതം സ്തംഭിച്ച്, കബന്ധങ്ങളുടെ ഘോഷയാത്രക്ക് ശമനമില്ലാതായിരിക്കുന്ന സ്ഥിതിയിലാണിപ്പോൾ.ലോകസാമ്പത്തികരംഗം പ്രതിസന്ധിയിൽപ്പെട്ട് ഉഴറുന്ന സമയത്താണ് കോവിഡ്19 വിനാശം വിതക്കുന്നത് എന്ന പ്രത്യേകതയുമുണ്ട്. കാലാവസ്ഥാ വ്യതിയാനവും മലിനീകരണമുൾപ്പെടെയുള്ള പ്രശ്നങ്ങളും സമ്പദ് വ്യവസ്ഥക്ക് പ്രഹരമേൽപ്പിക്കുകയാണ്. പ്രകൃതിക്ക് പകരം വെക്കാൻ കഴിയുന്നതിനേക്കാൾ കൂടുതൽ വിഭവങ്ങൾ ഉപയോഗിക്കുന്നതിന്റെ ഫലമായാണ് ഇവയെല്ലാം സംഭവിക്കുന്നത്. സാമ്പത്തിക വികസനത്തിന്റെ കണക്കുകളിൽ തെളിയുന്ന അക്കങ്ങളിൽ അഭിരമിച്ചിരിക്കുന്നവർക്ക് ഭൂമി ചൂഷണത്തിനു മാത്രമുള്ള ഒന്നായിരുന്നു. ഭൂമിയെ, പ്രകൃതിയെ ചൂഷണം ചെയ്യാതെ മനുഷ്യവർഗ്ഗത്തിന് മുന്നോട്ടുപോകാനാവുകയില്ല എന്നതിനെ പിൻപറ്റി കുതിക്കുകയായിരുന്നു ലോകം.

പതിനാറാം നൂറ്റാണ്ടിലെ വ്യാവസായിക വിപ്ലവത്തോടെ മുതലാളിത്ത ഉത്പാദനപ്രക്രിയക്ക് കരുത്തേറി. കൂടുതൽ ഉൽപ്പാദിപ്പിക്കുക, ഉൽപ്പാദിപ്പിക്കുന്നതെല്ലാം വിറ്റഴിക്കുക എന്നതിലൂടെ ധനികരാവുക എളുപ്പമായി മാറി. ലാഭം കേന്ദ്രബിന്ദുവായപ്പോൾ പരമാവധി ഉത്പാദനം എന്നായി ചിന്ത. ഉത്പാദിപ്പിക്കുന്നതെല്ലാം വിറ്റഴിക്കാൻ പാകത്തിൽ കൂടുതൽ ശക്തമായ കമ്പോളത്തെ രൂപപ്പെടുത്തിയാണ് പരമാവധി ഉപഭോഗം എന്നത് യാഥാർത്ഥ്യമാക്കിയത്. പരമാവധി ലാഭം എന്നതും മാറി എങ്ങിനേയും പണമുണ്ടാക്കുക എന്നതിലേക്കെത്തിയപ്പോൾ ഭൂമിയെ അനിയന്ത്രിതമായ ചൂഷണത്തിന് വിധേയമാക്കുന്നതാണ് നാം കണ്ടത്. ഇതിനെ വികസനം എന്നു പേരിട്ടുവിളിക്കുക എന്ന തന്ത്രപരമായ സമീപനവും മുതലാളിത്തത്തിന്റെ വക്താക്കൾ സ്വീകരിച്ചു. സമയവും ദൈവവുമെല്ലാം പണമാണെന്ന ചിന്താഗതിക്ക് കരുത്തേറിയപ്പോൾ ഭൂമി സമാനതകളില്ലാത്ത കൊള്ളയടിക്കലുകൾക്ക് വിധേയയായി. എങ്ങിനെയും പണമുണ്ടാക്കാനുള്ള ആർത്തിയോടെ പ്രാദേശികമായി നടക്കുന്ന ചൂഷണങ്ങൾ മുതൽ കോർപ്പറേറ്റുകളുടെ കൊള്ളകൾ വരെ വികസനം എന്ന ലേബലൊട്ടിച്ച് മുന്നേറുമ്പോൾ പരിസ്ഥിതി നാശം വ്യാപകമാവുകയും എല്ലാ ജീവജാലങ്ങളുടേയും നിലനിൽപ്പിനാധാരമായ ഒരേയൊരു ഭൂമിയിൽ ജീവിതങ്ങൾ തകർന്നടിയുകയും ചെയ്യുകയാണ്.

അമേരിക്കക്കാരിയായ റേച്ചൽ കാഴ്സൺ എഴുതിയ 'നിശബ്ദവസന്തം' (Silent Spring) എന്ന പുസ്തകം 1962 ൽ പുറത്തിറങ്ങിയപ്പോൾ അന്നേവരെ ശരിയെന്നു കരുതിയ പലതും കീഴ്മേൽ മറിഞ്ഞു. വ്യാവസായിക കൃഷിയുടെ ദുരിതങ്ങളും ദുരന്തങ്ങളും വിവരിച്ച റേച്ചൽ കാഴ്സൺ, കർഷക മിത്രമായി വ്യാഖ്യാനിക്കപ്പെട്ടിരുന്ന രാസകീടനാശിനിയായ DDTയുടെ ഉപയോഗം ഏൽപ്പിച്ച കനത്ത ആഘാതങ്ങളെ അനാവരണം ചെയ്യുകയുമുണ്ടായി. മുതലാളിത്ത വികസനത്തിന്റെ രീതികളും അതുമൂലം പ്രകൃതിക്കുണ്ടാവുന്ന അപകടങ്ങളും അതോടെ ചർച്ചാ വിഷയമായിമാറി. എണ്ണ ചോർച്ച, ഫാക്ടറികളുടെ മലിനീകരണം, അസംസ്കൃത മലിനജലം, വിഷ മാലിന്യങ്ങൾ, കീടനാശിനികൾ, വന്യമൃഗങ്ങളുടെ വംശനാശം എന്നിവയെ ഗൗരവത്തിലെടുക്കാൻ ജനങ്ങൾ തയ്യാറാവുന്നതാണ് പിന്നീട് കണ്ടത്. അമേരിക്കയിൽ തന്നെ അതിന്റെ ആദ്യ ബഹിർസ്ഫുരണങ്ങൾ ഉണ്ടായി. വിസ്കോൺസനിൽ നിന്നുള്ള അമേരിക്കൻ സെനറ്ററായ ഗെയ്ലോർഡ് നെൽസൺ വിദ്യാർത്ഥികൾ ഉൾപ്പെടെയുള്ളവരെ സംഘടിപ്പിച്ച് പരിസ്ഥിതി സംരക്ഷണത്തിനായി മുന്നിട്ടിറങ്ങി. കാലിഫോർണിയയിലെ സാന്താ ബാർബറയിൽ വൻതോതിലുണ്ടായ എണ്ണച്ചോർച്ചയുടെ ദുരിതങ്ങൾ നേരിട്ടു ബോധ്യപ്പെട്ട ആളായിരുന്നു നെൽസൺ. വിയറ്റ്നാമിനെനെതിരെ അമേരിക്ക നടത്തിയ യുദ്ധത്തിൽ പ്രതിഷേധിച്ച് അമേരിക്കൻ കാമ്പസുകൾ തിളച്ചുമറിഞ്ഞ കാലവുമായിരുന്നു അത്. വിദ്യാർത്ഥി പ്രക്ഷോഭം അമേരിക്കൻ ജനതയെ ഏറെ സ്വാധീനിച്ചതും ഭരണാധികാരികളെ തിരുത്തിച്ചതും മറ്റൊരു ചരിത്രം. വിദ്യാർത്ഥിപ്രക്ഷോഭത്തിന്റെ ഊർജ്ജം ഭൂമിയെ സംരക്ഷിക്കാനായും വിനിയോഗിക്കണമെന്ന നെൽസന്റെ അഭിപ്രായം അമേരിക്കൻ കാമ്പസുകൾ ഏറ്റെടുത്തു. ഹാർവാർഡ് സർവ്വകലാശാലയിലെ വിദ്യാർത്ഥിയായിരുന്ന ഡെനിസ് ഹെയ്സ് വിദ്യാർത്ഥികളെ ഏകോപിപ്പിക്കാൻ നെൽസണൊപ്പം മുന്നിട്ടിറങ്ങി. അമേരിക്കൻ ജനത ഈ പ്രവർത്തനങ്ങൾക്ക് എല്ലാവിധമായ പിന്തുണയും നൽകി. അങ്ങിനെയാണ് 1970 ഏപ്രിൽ 22 ന്റെ ആദ്യ ഭൗമദിനാചരണം നടക്കുന്നത്. അന്ന് കാലാവസ്ഥാ വ്യതിയാനം, വനനശീകരണം, രാസ-തീവ്രമായ കൃഷി എന്നിവ അസ്തിത്വ പ്രതിസന്ധികളായി മാറിയിരുന്നില്ല.മുഖ്യപ്രശ്നം മലിനീകരണമായിരുന്നു. വ്യാവസായവൽക്കരണത്തിലൂടെ അതിക്രമിച്ചുകയറുന്ന വിഷവസ്തുക്കളിൽ നിന്ന് വിലയേറിയ വിഭവങ്ങളായ വായു, ജലം, ഭൂമി, ജീവജാലങ്ങൾ എന്നിവയെ സംരക്ഷിക്കാനുള്ള നടപടികൾക്കു വേണ്ടി രംഗത്തിറങ്ങാനുള്ള ആഹ്വാനമായിരുന്നു നെൽസണും ഹെയ്സുമെല്ലാം നടത്തിയത്. അത് ഒരു ജനക്കൂട്ടത്തെ ആകർഷിക്കാൻ പര്യാപ്തവുമായിരുന്നു. അമേരിക്കൻ ജനസംഖ്യയിൽ പത്തുശതമാനത്തിലധികം പേർ അതായത് രണ്ടുകോടിയിലധികം ആളുകൾ വ്യാവസായിക വികസനത്തിന്റെ തിക്തഫലങ്ങൾക്കെതിരെ, പരിസ്ഥിതിയെ സംരക്ഷിക്കാൻ അന്നത്തെ പരിപാടികളിൽ പങ്കാളികളായി രംഗത്തിറങ്ങിയത് ഒരു പുത്തൻ അനുഭവമായി മാറി.

ഒന്നാമത്തെ ഭൗമദിനാചരണം കേവലമൊരു പരിപാടിയായി ഒടുങ്ങിയില്ല . യുദ്ധവിരുദ്ധപ്രക്ഷോഭങ്ങളിലൂടെ ഭരണകൂടത്തെ വിറപ്പിച്ച വിദ്യാർത്ഥികളുടെ ശക്തി ഇതിന്റെ പിന്നിലുള്ളത് നന്നായി ബോധ്യപ്പെട്ട അധികാരികൾ ഭൗമദിനാചരണപരിപാടികളിലൂടെ ഉന്നയിച്ച വിഷയങ്ങളിൽ ശ്രദ്ധ പതിപ്പിക്കാൻ നിർബന്ധിതരായി.1970 അവസാനമാകുമ്പോഴേക്കും അമേരിക്ക, എൻവയൺമെന്റൽ പ്രൊട്ടക്ഷൻ ഏജൻസി രൂപീകരിച്ചു. ദേശീയ പരിസ്ഥിതി വിദ്യാഭ്യാസ നിയമം,തൊഴിൽ സുരക്ഷയും ആരോഗ്യവും നിയമം , ശുദ്ധവായു നിയമം എന്നിങ്ങനെ നിരവധി നിയമങ്ങളും അതേ വർഷം പാസാക്കാൻ അവർ നിർബന്ധിതരായി.ശുദ്ധജല സംരക്ഷണനിയമം,വംശനാശഭീഷണി നേരിടുന്ന ജീവികളുടെ സംരക്ഷണ നിയമം എന്നിവ ഉൾപ്പെടെ അസംഖ്യം നിയമങ്ങളും തൊട്ടടുത്ത വർഷങ്ങളിൽ പാസാക്കാനും അതിനനുസരിച്ച് പ്രവർത്തിക്കാനും അമേരിക്ക തയ്യാറായത് ഭൗമദിനാചരണത്തിന്റെ നേട്ടമായിരുന്നു.

ഒന്നാമത്തെ ഭൗമദിനാചരണത്തിന്റെ ഊർജ്ജം ലോകമാകെ പടർന്നു.1972 ൽ UNന്റെ ആദ്യ അന്താരാഷ്ട്ര പരിസ്ഥിതി കൺവൻഷൻ സ്റ്റോക്ക് ഹോമിൽ ചേർന്നു. മണ്ണും ജലവും അന്തരീക്ഷവും സസ്യജന്തുജാലങ്ങളും പ്രകൃതിയുടെ ആവാസവ്യവസ്ഥയുടെ ഭാഗമായ എല്ലാത്തിനേയും ഈ തലമുറക്കും വരും തലമുറകൾക്കുവേണ്ടിയും കാത്തു സംരക്ഷിക്കാൻ ആ സമ്മേളനം പ്രതിജ്ഞയെടുത്തു.ലോക രാഷ്ട്രങ്ങൾ ഇതിനനുസരിച്ച് നിരവധി തീരുമാനങ്ങൾ കൈക്കൊണ്ടു. ഭാരതത്തിന്റെ ഭരണഘടനയിൽ നാൽപ്പത്തിരണ്ടാം ഭേദഗതിയായി പരിസ്ഥിതി സംരക്ഷണം സ്ഥാനം പിടിച്ചതും അങ്ങിനെയാണ്. സ്റ്റോക്ക്ഹോം കൺവൻഷനിൽ അവതരിപ്പിച്ച സുപ്രധാന രേഖ "ഒരേ ഒരു ഭൂമി " എന്നപേരിലുള്ളതായിരുന്നു. ബ്രിട്ടീഷ് സാമ്പത്തിക വിദഗ്ദ്ധയായ ബാർബറ വാർഡ്, അമേരിക്കൻ മൈക്രോ ബയോളജിസ്റ്റായ റെനേ ഡൂബോസ് എന്നിവർ തയ്യാറാക്കി അവതരിപ്പിച്ച ആ രേഖ പ്രഖ്യാപിച്ചത്, " ഈ ഭൂമി പോയ തലമുറകളിൽ നിന്ന് നമുക്ക് പൈതൃകമായി കിട്ടിയ സ്വത്തല്ല . ഭാവി തലമുറകളിൽ നിന്ന് നാം കടം വാങ്ങിയതാണ് " എന്നായിരുന്നു.ഈ ചിന്താഗതിക്ക് വലിയ അംഗീകാരം ലഭിച്ചെങ്കിലും പണത്തോടുള്ള ഒടുങ്ങാത്ത ആർത്തിയുമായി മുന്നേറുന്ന മുതലാളിത്ത വികസനരീതികൾ ഭൂമിയെയും പ്രകൃതിയെയും കടുത്ത ചൂഷണത്തിന് വിധേയമാക്കുന്നതാണ് പിന്നെയും കണ്ടത്.

'ഒരേ ഒരു ഭൂമി' എന്ന രേഖയിൽ ഭൂമിയുടെ ഉടമകളെപ്പറ്റി സൂചിപ്പിച്ച നിലപാട്, അതിനും നൂറുകൊല്ലങ്ങൾക്കുമുമ്പ് മൂലധനത്തിൽ മാർക്സ് കുറേക്കൂടി വ്യക്തമായിത്തന്നെ രേഖപ്പെടുത്തിയിരുന്നു. "ഭൂമി ആരുടേയും സ്വകാര്യസ്വത്തല്ല.എല്ലാവരുടെയും പൊതുസ്വത്തുമല്ല. ഭൂമിയിൽ ജീവിക്കുന്ന നമ്മൾ താൽക്കാലിക ഗുണഭോക്താക്കൾ മാത്രമാണ്.ഒരു നല്ല കാരണവരേപ്പോലെ ഇന്നത്തേക്കാൾ ഭൂമിയെ മെച്ചപ്പെടുത്തി വരും തലമുറകൾക്ക് കൈമാറാൻ നാം ബാധ്യസ്ഥരാണ് " എന്നായിരുന്നു മാർക്സ് മൂലധനത്തിൽ വിശദീകരിച്ചത്. മുതലാളിത്തം തൊഴിലാളി വർഗ്ഗത്തെ മാത്രമല്ല ചൂഷണത്തിന് വിധേയമാക്കുന്നതെന്നും പ്രകൃതിയേയും കാൽക്കീഴിലിട്ട് ചവുട്ടി മെതിക്കുകയാണെന്നും മാർക്സ് തിരിച്ചറിഞ്ഞിരുന്നു. ഈ ചൂഷണങ്ങളാണ് ആഗോളതാപനത്തിനും കാലാവസ്ഥാ വ്യതിയാനത്തിനും മലിനീകരണത്തിനുമെല്ലാം കാരണമായിരിക്കുന്നത്. അതേ ചൂഷണം തന്നെയാണ് നാം നേരിട്ടുകൊണ്ടിരിക്കുന്ന കോവിഡ് 19 എന്ന മഹാമാരിയുടെ പിന്നിലുമുള്ളതെന്ന യാഥാർത്ഥ്യത്തെ ഉള്ളിൽ കുടിയിരുത്താൻ ജനതയും ഭരണകൂടങ്ങളും തയ്യാറായേ മതിയാവൂ. കാലാവസ്ഥാവ്യതിയാനവും ആവാസവ്യവസ്ഥകളുടെ നാശവുമെല്ലാം ഇപ്പോഴത്തെ ദുരന്തത്തിന്റെ മുഖ്യ കാരണങ്ങളിൽപ്പെടുന്നവയാണ്.

കാലാവസ്ഥാ വ്യതിയാനം ജീവിവർഗ്ഗങ്ങൾക്ക് കനത്ത ബുദ്ധിമുട്ടാണ് സൃഷ്ടിക്കുന്നത്. വനനശീകരണം വർദ്ധിക്കുന്നതിന്റെ ഭാഗമായി വന്യജീവികളുടെ ആവാസവ്യവസ്ഥക്കും വലിയ തകർച്ച സംഭവിക്കുന്നു. ഇത് മൂലം മനുഷ്യനും വന്യജീവികളും തമ്മിലുണ്ടായിരുന്ന അകലം കുറയുകയാണ്. വന്യജീവികളുടെ ആവാസവ്യവസ്ഥയിലേക്കുള്ള മനുഷ്യരുടെ കടന്നു കയറ്റം സൃഷ്ടിക്കുന്ന അപകടങ്ങൾ ചെറുതല്ല.പകർച്ച വ്യാധികളിൽ 75 ശതമാനവും വന്യജീവികളിൽ നിന്നാണ് പകരുന്നതെന്ന് UNEP തലവൻ ഇംഗർ ആൻഡേഴ്സൺ അടുത്തിടെ പറഞ്ഞത് മറക്കാതിരിക്കാം. 40 ശതമാനം പ്രാണികളോടൊപ്പം ഒരു ദശലക്ഷം ഇനം സസ്യങ്ങളും ജന്തുക്കളും വംശനാശ ഭീഷണിയിലാണെന്ന് ജൈവവൈവിധ്യ, ആവാസവ്യവസ്ഥാ സേവനങ്ങളെക്കുറിച്ചുള്ള ഇന്റർ ഗവൺമെന്റൽ സയൻസ്-പോളിസി പ്ലാറ്റ്ഫോമിന്റെ 2019 ലെ റിപ്പോർട്ടിൽ പറയുന്നു. വേൾഡ് ഇക്കണോമിക് ഫോറം അടുത്തിടെ സൂചിപ്പിച്ചതും ശ്രദ്ധേയമായിരുന്നു. കഴിഞ്ഞ 50 വർഷത്തിനിടയിൽ ലോകത്തിലെ എല്ലാ വന്യജീവികളുടെയും 60 ശതമാനം നഷ്ടപ്പെട്ടു, അതേസമയം കഴിഞ്ഞ 60 വർഷത്തിനിടെ പുതിയ പകർച്ചവ്യാധികളുടെ എണ്ണം നാലിരട്ടിയായി വർദ്ധിക്കുകയും ചെയ്തു എന്നായിരുന്നു ഇക്കണോമിക് ഫോറത്തിന്റെ പഠനം വിശദീകരിച്ചത്. പകർച്ചവ്യാധി വ്യാപനം കാലാവസ്ഥയുമായി ഏറെ ബന്ധപ്പെട്ടിരിക്കുന്നു . കാലാവസ്ഥാ വ്യതിയാനം പകർച്ചവ്യാധികളുടെ സംക്രമണ രീതികളിൽ മാറ്റം വരുത്തുകയും ത്വരിതപ്പെടുത്തുകയും ചെയ്യുന്നുണ്ട് എന്നത് ഗൗരവതരമാണ്. ആഗോള താപനിലയിൽ ഏകദേശം ഒരു ഡിഗ്രി സെൽഷ്യസ് ഉയരുന്നത് ചില ജീവിവർഗങ്ങളുടെ സമൃദ്ധി, ജനിതക ഘടന, സ്വഭാവം, നിലനിൽപ്പ് എന്നിവയിൽ മാറ്റം വരുത്തുന്നുവെന്നും പഠനങ്ങൾ വെളിവാക്കുന്നുണ്ട്.

കോവിഡ്19 പോലുള്ള രോഗങ്ങൾ വർദ്ധിക്കാൻ കാരണമാവുന്നത് വനനശീകരണമാണെന്നും ഇന്ന് ബോധ്യപ്പെടുന്നുണ്ട്. അമേരിക്കയിലെ സ്റ്റാൻഫോർഡ് യൂണിവേഴ്സിറ്റിയിലെ 'സ്കൂൾ ഓഫ് എർത്ത്, എനർജി , ആന്റ് എൻവയൺമെന്റൽ സയൻസിന്റെ' പുതിയ പഠനം വനനശീകരണം കൊറോണ വ്യാപനത്തിന്റെ ആക്കം വർദ്ധിപ്പിച്ചതിനെപ്പറ്റി പ്രതിപാദിക്കുന്നതാണ്. വനഭൂമി കൃഷിഭൂമിയായി പരിവർത്തനം ചെയ്യുന്നത് ദുരന്തങ്ങൾ സൃഷ്ടിക്കുന്നതായി അവർ വ്യക്തമാക്കുന്നു.1980 നും 2000 നും ഇടയിൽ ഉഷ്ണമേഖലാ പ്രദേശങ്ങളിൽ 100 ദശലക്ഷം ഹെക്ടർ കാർഷിക വ്യാപനമുണ്ടായി. അത് ഫ്രാൻസിന്റേയും ജർമ്മനിയുടെയും വലുപ്പത്തിന് തുല്യമാണെന്നും പഠനം പറയുന്നു. പ്രകൃതിദത്ത വനങ്ങളേയും ആവാസവ്യവസ്ഥകളേയും കാർഷികാവശ്യങ്ങൾക്കും മറ്റുമായി രൂപാന്തരപ്പെടുത്തുമ്പോൾ സൂനോട്ടിക് രോഗങ്ങൾ (മൃഗങ്ങളിൽ നിന്ന് മനുഷ്യരിലേക്ക് പകരുന്ന രോഗങ്ങൾ ) ഏറുക തന്നെ ചെയ്യും.

പതിനായിരം കൊല്ലങ്ങൾക്കു മുമ്പ് കൃഷി ആരംഭിച്ചതു മുതലാണ് മനുഷ്യൻ മൃഗങ്ങളുമായി കൂടുതൽ അടുത്തിടപഴകാൻ തുടങ്ങിയത്. കൃഷിയുടെ വ്യാപനത്തിന് സഹായിക്കുന്ന മൃഗങ്ങളെ മെരുക്കിവളർത്തിയത് ഭക്ഷ്യോൽപ്പാദനം വർദ്ധിക്കുന്നതിന് ഉപകരിച്ചു. വളർത്തുമൃഗങ്ങൾ അങ്ങിനെ കൃഷിക്കും മനുഷ്യനും ഏറെ സഹായകമായി മാറി. ഇന്ന് ലോകത്തിന്റെ പകുതി ഭൂമി കൃഷിക്കായി മാറ്റപ്പെട്ടിരിക്കുകയാണ്. ഇത് മനുഷ്യരും വന്യജീവികളും തമ്മിലുള്ള അടുത്ത ബന്ധത്തിലേക്ക് നയിച്ചു. പ്രകൃതിയും കാർഷിക ബിസിനസും ഖനനവും മറ്റ് മനുഷ്യ പ്രവർത്തനങ്ങളും തമ്മിലുള്ള അവിശുദ്ധ ബന്ധത്തിലാണ് പകർച്ചവ്യാധികൾ ഉണ്ടാകുന്നതെന്ന് ഗവേഷകർക്ക് പണ്ടേ അറിയാം. പശ്ചിമാഫ്രിക്കയിൽ എബോള പൊട്ടിപ്പുറപ്പെട്ടത് വനനശീകരണത്തിന്റെ ഫലമായാണ്. ഉഗാണ്ടയിലെ ഉഷ്ണമേഖലാ വനങ്ങളുടെ നാശം ആമസോൺ കാടുകളുടെ നാശം എന്നിവയെല്ലാം നമുക്കു മേൽ ദുരിതങ്ങൾ വർഷിക്കുമെന്നതിൽ തർക്കം വേണ്ട .ജൈവവൈവിധ്യ നഷ്ടവും കാലാവസ്ഥാ വ്യതിയാനവും പരസ്പരം കുഴപ്പങ്ങളെ രൂക്ഷമാക്കുകയാണ്. ജീവജാലങ്ങളുടെയും ആവാസവ്യവസ്ഥകളുടെയും നഷ്ടം കാലാവസ്ഥാ തകരാറിന് കാരണമാവുകയും ഇത് ജൈവവൈവിധ്യ നഷ്ടത്തെ ത്വരിതപ്പെടുത്തുകയും ചെയ്യുന്നു.ഇവ രണ്ടും മഹാമാരികളുടെ ഉയർച്ചയ്ക്ക് കാരണമാകുന്നുവെന്നാണ് ശാസ്ത്രലോകം പറയുന്നത്.

മലിനീകരണ മേഖലകളിൽ താമസിക്കുന്നവർക്ക് അപകടസാധ്യത കൂടുതലാണ് എന്നതിന് ഇന്ന് രണ്ടു പക്ഷമില്ല. മലിനമായ വായു ശ്വാസകോശരോഗങ്ങൾക്ക് കാരണമാകുന്നുവെന്ന് മാത്രമല്ല , ഓരോ വർഷവും ലോകത്ത് 83 ലക്ഷം പേർ ഇതുമൂലം അകാലമരണത്തിനടിപ്പെടുകയും ചെയ്യുന്നു. ഗ്ലോബൽ അലയൻസ് ഓൺ ഹെൽത്ത് ആന്റ് പൊല്യൂഷൻ ( GAHP) ന്റെ 2019ലെ റിപ്പോർട്ട് , അകാലമരണങ്ങളുടെ ഒരു പ്രധാന കാരണം മലിനീകരണമാണെന്ന് വിശദീകരിക്കുന്നു.പതിനഞ്ച് ശതമാനം അകാലമരണങ്ങൾ മലിനീകരണം മൂലം സംഭവിക്കുന്നുവെന്നും അവർ ചൂണ്ടിക്കാട്ടി. ഇതിൽ മുന്നിൽ നിൽക്കുന്ന രണ്ടു രാജ്യങ്ങൾ ഇന്ത്യയും ചൈനയുമാണ്. ഇന്ത്യ-23ലക്ഷം, ചൈന-18ലക്ഷം എന്നാണ് ആ റിപ്പോർട്ടിൽ രേഖപ്പെടുത്തിയിരിക്കുന്നത്. 2003 ൽ സാർസ് വിനാശം വിതച്ച ചൈനയിൽ മലിനീകരണം കുറഞ്ഞ പ്രദേശത്തുള്ളവരേക്കാൾ ഇരട്ടിയിലധികം ആളുകൾ മലിനീകരണമുള്ള പ്രദേശങ്ങളിൽ മരണപ്പെട്ടതായി കണ്ടെത്തിയിരുന്നു. വായുമലിനീകരണം മൂലമുണ്ടാകുന്ന ആരോഗ്യപ്രശ്നങ്ങൾ കോവിഡ് മരണനിരക്കിനെ ബാധിക്കും എന്നതും ലോകം അനുഭവിച്ചറിയുകയാണ്. കോവിഡിന്റെ പശ്ചാത്തലത്തിൽ ഹാർവാർഡ് TH ചാൻ സ്കൂൾ ഓഫ് പബ്ലിക്ക് ഹെൽത്തിലെ കാലാവസ്ഥാ, ആരോഗ്യ,ആഗോള പരിസ്ഥിതിവിഭാഗം തലവൻ ആരോൺ ബർണസ്റ്റൈനെ ഉദ്ദരിച്ച് വാഷിംഗ്ടൺ പോസ്റ്റ് റിപ്പോർട്ടു ചെയ്തത് "വായു മലിനീകരണത്തിനിരയായവരിലും പുകവലിക്കാരിലും കോവിഡ് അപകട സാധ്യത കൂടുതലാണ് " എന്നായിരുന്നു.

വനനശീകരണം, വ്യവസായ കൃഷി, അനധികൃത വന്യജീവി വ്യാപാരം, കാലാവസ്ഥാവ്യതിയാനം , മറ്റ് പരിസ്ഥിതി നശീകരണങ്ങൾ എന്നിവ പകർച്ചവ്യാധികളുടെ വ്യാപനം വർദ്ധിപ്പിക്കും എന്നത് ഈ കോവിഡ് കാലം നമ്മെ പഠിപ്പിക്കുന്നു. WHO അടക്കമുള്ള സ്ഥാപനങ്ങളുടെ ശാസ്ത്രീയ വിശകലനം ഇപ്പോഴും എത്തിനിൽക്കുന്നത് ചൈനയിലെ വുഹാൻ മാർക്കറ്റിലെ വന്യജീവി വ്യാപാരത്തിലാണെന്നതും ശ്രദ്ധേയമാണ്. ലോകത്തിലെ വലിയ കുറ്റകൃത്യങ്ങളിൽ നാലാമത്തേതാണ് അനധികൃത വന്യജീവിവ്യാപാരം. അനധികൃത വന്യജീവി വ്യാപാരവും കച്ചവട കേന്ദ്രങ്ങളും വ്യാപകമാവുന്നുണ്ട്. വന്യമായതിനെ വന്യമായിത്തന്നെ നിലനിർത്തുകയാണ് വേണ്ടത്. പ്രകൃതി പുന:സ്ഥാപനത്തിനായി ചിലവഴിക്കുന്ന ഓരോ ഡോളറിനും ഒൻപത് ഡോളറിന്റെ നേട്ടമുണ്ടാവുമെന്ന് കണക്കാക്കിയത് വേൾഡ് എക്കണോമിക്ക് ഫോറമാണ് . പരിസ്ഥിതി വിഷയങ്ങളോട് മുഖം തിരിച്ചു നിന്ന സാമ്പത്തിക ശക്തികളുടെ ഈ കൂട്ടായ്മക്ക് ഇന്ന് ഇതിനെ അവഗണിക്കാൻ പറ്റാതായിരിക്കുകയാണ്. ലോകത്തിന്റെ ജി.ഡി.പി യുടെ പകുതിയിലധികവും പ്രകൃതിയെ ആശ്രയിച്ചിരിക്കുന്നുവെന്നും അവരുടെ Nature Risk Rising Report ( NRRR)ന് പറയേണ്ടിവന്നു.

പരിസ്ഥിതി സംരക്ഷണത്തിനായി കൈയ്മെയ് മറന്നിറങ്ങേണ്ടതിന്റെ ആവശ്യകത ലോകമാകെ അടച്ചുപൂട്ടപ്പെട്ടിരിക്കുന്ന ഈ വേളയിൽ പോലും ജനതയുടെ ഉള്ളിൽ കയറുന്നില്ല എങ്കിൽ പിന്നെ ഒന്നും ചെയ്യാനാവില്ല. പണ്ടെന്നോ ഒരു പ്ലേഗ് ,ഇപ്പോൾ ഒരു കോവിഡ്19 , ഇതു കഴിഞ്ഞാൽ അടുത്ത നൂറ്റാണ്ടിൽ വേറൊരു മഹാമാരി എന്ന് തീർപ്പുകൽപ്പിക്കുന്നവരുണ്ടാകാം. 2018 ലെ പ്രളയത്തിന്റെ കാലത്ത് നൂറ്റാണ്ടിലൊന്ന് എന്ന് വിധിയെഴുതിയവർ ഉണ്ടായിരുന്നു. 2019ൽ വീണ്ടും പ്രളയമെത്തിയപ്പോൾ എല്ലാ കണക്കുകൂട്ടലുകളും പിഴച്ചു .2020 ൽ വീണ്ടും പ്രളയമുണ്ടാവാനുള്ള സാധ്യത പ്രവചിച്ചിരിക്കുകയുമാണ്. മഹാമാരികളുടെ കാര്യവും അതുപോലെയാണ്. അവ ഇനിയും നമ്മെ തകർക്കാതിരിക്കാൻ നാം ക്രിയാത്മകമായി ഇടപെട്ടേ മതിയാകൂ. പ്രകൃതിയെ കാത്തു പുലർത്തുക എന്ന ചുമതല ഒരു ദൈവത്തേയും ഏൽപ്പിച്ച് മാറിയിരിക്കാനാവുകയില്ലെന്നും ഈ മഹാമാരിക്കാലം നമ്മെ നന്നായി പഠിപ്പിച്ചിട്ടുണ്ട്.

മഹാമാരിയിൽ നിന്ന് ഭരണകൂടങ്ങൾ പാഠം പഠിക്കുമോ എന്നതും പ്രസക്തമായ ചോദ്യമാണ്. ഭരണാധികാരിയെ നയിക്കുന്ന താൽപ്പര്യത്തിനനുസരിച്ചിരിക്കും അതിന്റെ ഉത്തരം. മരണത്തിന്റെ ഗ്രാഫ് അനുദിനം ഉയർന്നുകൊണ്ടിരിക്കുമ്പോൾ അമേരിക്കൻ പ്രസിഡന്റ് ട്രംപ് ചില സുപ്രധാന തീരുമാനങ്ങൾ കൈക്കൊണ്ടത് ഇതുമായി ചേർത്തു വായിക്കേണ്ടതാണ്. വാഹനങ്ങളുടെ ഇന്ധനക്ഷമതാ നിലവാരം കുറക്കാൻ തീരുമാനിച്ചതായിരുന്നു അതിലൊന്ന്. ഒബാമയുടെ കാലത്ത് കാലാവസ്ഥാ വ്യതിയാനത്തെ ചെറുക്കാൻ കൈക്കൊണ്ട സുപ്രധാനമായ നടപടി ഇതോടെ ഇല്ലാതായിരിക്കുകയാണ്. പുതിയ തീരുമാനം മൂലം നൂറുകോടി ടൺ കാർബൺ ഡൈ ഓക്സൈഡിന്റെ പുറം തള്ളലുണ്ടാകുമെന്നും ഇത് ഭൂമിയുടെ ചൂട് വർദ്ധിപ്പിക്കുമെന്നും ഈ രംഗത്തെ വിദഗ്ധർ ചൂണ്ടിക്കാട്ടിയത് മാർച്ച് 31ന് ന്യൂയോർക്ക് ടൈംസ് പത്രം തന്നെ റിപ്പോർട്ടുചെയ്യുകയുണ്ടായി. ഈ തീരുമാനം മൂലം 8000 കോടി ഗ്യാലൻ പെട്രോളിന്റെ അധിക ഉപയോഗത്തിനും വഴിവെക്കുമെന്ന് റിപ്പോർട്ടിൽ ചൂണ്ടിക്കാട്ടുന്നുണ്ട്. ഇതിനേക്കാൾ ഗൗരവതരമായ മറ്റൊരു തീരുമാനം കൂടി ട്രംപ് കൈക്കൊണ്ടു. ഒന്നാമത്തെ ഭൗമദിനാചരണത്തെ തുടർന്ന് രൂപീകരിച്ച എൻവയൺമെന്റ് പ്രൊട്ടക്ഷൻ ഏജൻസിയുടെ പ്രവർത്തനങ്ങളിലെ സുപ്രധാന ഇനങ്ങളിലൊന്നായ കമ്പനികളെ നിരീക്ഷിക്കൽ, റിപ്പോർട്ടുകൾ തയ്യാറാക്കൽ എന്നിവയെല്ലാം അനിശ്ചിതകാലത്തേക്ക് നിർത്തിവെച്ചിരിക്കുന്നു എന്നതാണത്. വ്യവസായ സ്ഥാപനങ്ങൾ നടത്തുന്ന മലിനീകരണമടക്കമുള്ള കാര്യങ്ങൾ നോക്കാനാളില്ലാത്ത സ്ഥിതിയായി. കൊവിഡിന്റെ പേരിൽ വമ്പൻമാർക്ക് നൽകുന്ന ഇളവുകൾ പരിസ്ഥിതിക്ക് കനത്ത പ്രഹരമേൽപ്പിക്കുന്ന തരത്തിലായിരിക്കുന്നു.

ഇത് അമേരിക്കയുടെയോ ട്രംപിന്റെയോ മാത്രം കഥയല്ല. ചെറുകിട വ്യവസായങ്ങളുടെ പരിസ്ഥിതി മാനദണ്ഡങ്ങൾ താൽക്കാലികമായി നിർത്തിവെക്കുകയാണെന്ന് ചൈനീസ് പരിസ്ഥിതി മന്ത്രാലയം മാർച്ച് മാസത്തിൽ തീരുമാനം കൈക്കൊണ്ട്, തങ്ങളും മോശക്കാരല്ലെന്ന് തെളിയിച്ചു. അമേരിക്കയും ചൈനയും മാതൃകയായാൽ ഭൂമിയിൽ ജീവിതം അസാദ്ധ്യമായിത്തീരും. പുര കത്തുമ്പോൾ വാഴ വെട്ടണമെന്ന് തീരുമാനിച്ചുറപ്പിച്ചവരെ തിരുത്താനും നമ്മുടെയും ഭാവിതലമുറകളുടേയും ജീവിതത്തെ സുരക്ഷിതമാക്കാനും ഇപ്പോൾ നാം ഇടപെട്ടേ മതിയാവൂ. വീടുകളിൽ തളച്ചിടപ്പെട്ട ഈ സമയം തന്നെയാണ് ഇത്തരമൊരു തീരുമാനത്തിന് നല്ലത്. ലോകമെല്ലാം പാക്കേജുകൾ പ്രഖ്യാപിക്കുകയും നടപ്പിലാക്കിത്തുടങ്ങുകയും ചെയ്തിട്ടുണ്ട്. മനുഷ്യനും പ്രകൃതിയും കേന്ദ്രബിന്ദുവാകുന്ന തരത്തിൽ അതിനെ പുന:സംഘടിപ്പിക്കാൻ, ഹരിത സമ്പദ്ഘടനയെ സൃഷ്ടിക്കാൻ നാം ഇടപെടണം.

അമ്പതു വർഷങ്ങൾക്ക് മുമ്പ് ആദ്യത്തെ ഭൗമദിനത്തിൽ 20 ദശലക്ഷം ആളുകൾ തെരുവിലിറങ്ങി. ഇപ്പോൾ നമ്മളേയും മറ്റുള്ളവരേയും സംരക്ഷിക്കാൻ നാം വീട്ടിൽ തന്നെ ഇരിക്കുകയാണ്. ഇത് രണ്ടും അനിവാര്യമായതുപോലെ, ജീവിക്കാൻ കഴിയുന്ന ഒരു ഭൂമിക്കും ഭാവിക്കുമായി ഒരുമിച്ച് ആവശ്യപ്പെടാൻ വീട്ടിലിരുന്നും പ്രവർത്തിക്കേണ്ടത് അത്യന്താപേക്ഷിതമാണ്.നിരവധി മഹാമാരികളെ മറികടന്നാണ് മാനവരാശി ഇതുവരെ എത്തിയത്. തീർച്ചയായും നമ്മൾ കോവിഡ് 19നേയും അതിജീവിക്കുക തന്നെ ചെയ്യും.എന്നാൽ ആഗോള താപനത്തേയും കാലാവസ്ഥാ വ്യതിയാനത്തേയും എളുപ്പത്തിൽ അതിജീവിക്കാൻ കഴിയുമെന്ന് ആർക്കും പറയാൻ കഴിയുന്നില്ല. "കാലാവസ്ഥാ വ്യതിയാനം ഇതുവരെയും ഒരു അദൃശ്യ പിശാചായിരുന്നതിനാൽ വേഗത്തിൽ പ്രവർത്തിക്കേണ്ടതിന്റെ ആവശ്യകത ആളുകൾക്ക് ബോധ്യപ്പെട്ടിരുന്നില്ല " എന്നും " നമ്മുടെ ലോകം യഥാർത്ഥത്തിൽ നമുക്ക് ചുറ്റും കത്തുകയാണ് " എന്നെല്ലാമുള്ള ഗ്രേറ്റ തൻബെർഗിന്റെ വാക്കുകൾക്ക് ചെവി കൊടുക്കാം. കാലാവസ്ഥാ നീതിക്കും , ഭാവിക്കും, നമ്മൾ ഏറെ ഇഷ്ടപ്പെടുന്ന എല്ലാവർക്കും ആരോഗ്യത്തോടെ ജീവിക്കാൻ ആരോഗ്യമുള്ള ഭൂമിക്കായി നമുക്ക് പ്രയത്നിക്കാം.

(Azhimukham believes in promoting diverse views and opinions on all issues. They need not always conform to our editorial positions)


പി പ്രസാദ്

പി പ്രസാദ്

പരിസ്ഥിതി പ്രവര്‍ത്തകന്‍, സി പി ഐ സംസ്ഥാന സമിതി അംഗം, ചെയര്‍മാന്‍, കേരള ഹൌസിംഗ് ബോര്‍ഡ്,

Next Story

Related Stories