TopTop
Begin typing your search above and press return to search.

'ആയിരം കണ്ണുമായ് കാത്തിരുന്നു നിന്നെ ഞാന്‍...' കോവിഡ് ഭീതിയില്‍ ആശ്വാസമേകാന്‍ ഒരു ഇറ്റാലിയന്‍ വൈദികന്റെ മലയാളം പാട്ട്

ആയിരം കണ്ണുമായ് കാത്തിരുന്നു നിന്നെ ഞാന്‍... കോവിഡ് ഭീതിയില്‍ ആശ്വാസമേകാന്‍ ഒരു ഇറ്റാലിയന്‍ വൈദികന്റെ മലയാളം പാട്ട്

കോവിഡ് രോഗത്തെക്കുറിച്ചുള്ള ഭയത്തിലും ആശങ്കയിലും വിഷമിക്കുന്ന മനുഷ്യര്‍ക്ക് ആശ്വാസമേകാന്‍ മലയാളം ഗാനവുമായി ഒരു ഇറ്റാലിയന്‍ വൈദികന്‍. ഫാദര്‍ സിമോണെ ബാര്‍ബിയേരിയാണ് 'ആയിരം കണ്ണുമായ് കാത്തിരുന്നു നിന്നെ ഞാന്‍' എന്ന ഗാനം വിഷമമനുഭവിക്കുന്ന മനുഷ്യര്‍ക്കായി പാടുന്നത്. കടല്‍ കടന്നൊരു പാട്ട് എന്ന പേരില്‍ യൂട്യൂബില്‍ ഈ ഗാനം അപ്ലോഡ് ചെയ്തിട്ടുണ്ട്.

ഫാദര്‍ സിമോണെ ബാര്‍ബിയേരി, ഈ ഗാനം ആദ്യമായി കേള്‍ക്കുന്നത് ഒരു മലയാളി സുഹൃത്തില്‍ നിന്നുമാണെന്നാണ് വീഡിയോയില്‍ പറയുന്നത്. റോമിലെ പഠനകാലത്തായിരുന്നു അത്. ഇപ്പോള്‍ സെന്‍ട്രല്‍ ഇറ്റലിയിലെ ലിവോര്‍ണോ പട്ടണത്തില്‍ നിന്നുമാണ് ഫാദര്‍ ഈ ഗാനം ആലപിക്കുന്നത്. 'കോവിഡ് 19 രോഗത്തെക്കുറിച്ചുള്ള ഭയത്താലും ആശങ്കയാലും വിഷമിക്കുന്ന മനുഷ്യര്‍ക്ക് ഈ ഗാനം ആശ്വാസകരമാകുമെന്നു ഞാന്‍ വിചാരിക്കുന്നു', ഈ പാട്ടു പാടാനുള്ള കാരണമായി ഫാദര്‍ പറയുന്നതിതാണ്.

1984-ല്‍ ഫാസിലിന്റെ സംവിധാനത്തിലൊരുങ്ങിയ നോക്കെത്താദൂരത്ത് കണ്ണും നട്ട് എന്ന ചിത്രത്തിലെ ഗാനമാണ് ആയിരം കണ്ണുമായ് കാത്തിരുന്നു നിന്നെ ഞാന്‍ എന്നത്. ജെറി അമല്‍ദേവ് സംഗീതം നല്‍കിയിരിക്കുന്ന ഗാനം കെ.എസ് ചിത്രയും കെ.ജെ യേശുദാസും ആലപിച്ചിട്ടുണ്ട്. പിന്നീട് വിനീത് ശ്രീനിവാസന്റെ തട്ടത്തിന്‍ മറയത്ത് എന്ന സിനിമയിലും ഈ ഗാനം ഉണ്ടായിരുന്നു. ഇവിടെ അണ്‍പ്ലഗ്ഡ് വേര്‍ഷനായ തട്ടത്തിന്‍ മറയത്തിലെ ഗാനമാണ് ഫാദര്‍ ആലപിക്കുന്നത്.

കോവിഡ് 19 ഏറ്റവും കൂടുതല്‍ ബാധിച്ച രാജ്യങ്ങളില്‍ ഒന്നാണ് ഇറ്റലി. രണ്ട് ലക്ഷത്തില്‍ കൂടുതല്‍ ആളുകള്‍ക്ക് ബാധിച്ച രോഗം ഇതിനോടകം മുപ്പതിനായിരത്തില്‍ കൂടുതല്‍ ആളുകളുടെ ജീവനെടുത്തു കഴിഞ്ഞു.


Next Story

Related Stories