TopTop
Begin typing your search above and press return to search.

ബൊളീവിയന്‍ പ്രസിഡന്റ് ഇവോ മൊറേല്‍സ് രാജി വച്ചു

ബൊളീവിയന്‍ പ്രസിഡന്റ് ഇവോ മൊറേല്‍സ് രാജി വച്ചു

ബൊളീവിയന്‍ പ്രസിഡന്റ് ഇവോ മൊറേല്‍സ് രാജി പ്രഖ്യാപിച്ചു. സൈന്യം സ്ഥാനമൊഴിയണമെന്ന് ആവശ്യപ്പെടുകയും പോലീസ് പിന്തുണ പിന്‍വലിക്കുകയും ചെയ്തതോടെയാണ് രാജി. തിരഞ്ഞെടുപ്പില്‍ കൃത്രിമവും അട്ടിമറിയും നടത്തിയാണ് മൊറേല്‍സ് അധികാരത്തിലെത്തിയതെന്ന് ആരോപിച്ച്‌ ജനം തെരുവിലിറങ്ങിയതോടെ കഴിഞ്ഞ മൂന്ന്‍ ആഴ്ചയോളമായി രാജ്യത്ത് അശാന്തി പടരുകയായിരുന്നു. 2006-ലാണ് മൊറേല്‍സ് ആദ്യമായി ബൊളീവിയയില്‍ പ്രസിഡന്റായത്. 'രാജ്യത്തിന്റെ നന്മ'ക്കായി താന്‍ സ്ഥാനമൊഴിയുകയാണെന്നും, പ്രതിപക്ഷത്തെ ഉദ്ദേശിച്ച്‌ 'ഇരുണ്ട ശക്തികള്‍ ജനാധിപത്യത്തെ നശിപ്പിച്ചു'വെന്നും അദ്ദേഹം പറഞ്ഞു.

അതേസമയം, മൊറേല്‍സിന് രാഷ്ട്രീയ അഭയം നല്‍കാന്‍ തയ്യാറാണെന്ന് മെക്സിക്കന്‍ വിദേശകാര്യ സെക്രട്ടറി മാര്‍സെലോ എബ്രാര്‍ഡ് ഒരു ട്വീറ്റിലൂടെ അറിയിച്ചു. ഉന്നത സര്‍ക്കാര്‍ ഉദ്യോഗസ്ഥരും 20 നിയമസഭാ സാമാജികരും ഇപ്പോള്‍തന്നെ ലാ പാസിലെ മെക്സിക്കന്‍ അംബാസഡറുടെ വസതിയിലാണ് ഉള്ളതെന്നും അദ്ദേഹം കൂട്ടിച്ചേര്‍ത്തു.

ബൊളീവിയന്‍ സായുധ സേനയുടെ കമാന്‍ഡര്‍-ഇന്‍-ചീഫ് വില്യംസ് കലിമാനാണ് മൊറേല്‍സിനോട്‌ അധികാരം ഒഴിയാന്‍ ആവശ്യപ്പെട്ടത്. വൈസ് പ്രസിഡന്റ് അല്‍വാരോ ഗാര്‍സിയ ലിനേറയും രാജിവച്ചു. തിരഞ്ഞെടുപ്പ് വിജയത്തിന്റെ സാധുത അന്താരാഷ്ട്ര നിരീക്ഷണ സംഘടനയായ ഓര്‍ഗനൈസേഷന്‍ ഓഫ് അമേരിക്കന്‍ സ്റ്റേറ്റ്സ് (ഒ.എ.എസ്.) ചോദ്യം ചെയ്തതിനു പിന്നാലെയായിരുന്നു മൊറെയ്‍ല്‍സിന്റെ രാജി. വിവിധ ഇടങ്ങളില്‍ ഇതുവരെ ഉണ്ടായ ആക്രമണങ്ങളുടെ ഭാഗമായി മൂന്നുപേര്‍ കൊല്ലപ്പെട്ടു.

പുതിയ തിരഞ്ഞെടുപ്പിന് മുന്‍പായി രാജ്യത്തെ തിരഞ്ഞെടുപ്പ് കമ്മിഷന്‍ പിരിച്ചുവിടുകയും പാര്‍ലമെന്റ് നിര്‍ദേശിക്കുന്ന അംഗങ്ങളെ ഉള്‍പ്പെടുത്തി പുനഃസംഘടിപ്പിക്കുകയും ചെയ്യുമെന്നും മൊറേല്‍സ് പറഞ്ഞു. എന്നാല്‍, പുതിയ തിരഞ്ഞെടുപ്പില്‍ മത്സരിക്കുമോ എന്ന കാര്യം അദ്ദേഹം ഇനിയും വ്യക്തമാക്കിയിട്ടില്ല. ഞായറാഴ്ച ബൊളീവിയയില്‍ നടന്ന പ്രതിഷേധത്തില്‍ പ്രക്ഷോഭകര്‍ സര്‍ക്കാര്‍ ചാനലുകളായ ബൊളീവിയ ടെലിവിഷനും റേഡിയോ പാട്രിയ ന്യുവേയും പിടിച്ചെടുത്തിരുന്നു. മൊറേല്‍സിന്‍റെ ജല്‍പനങ്ങള്‍ അതേപടി ആവര്‍ത്തിക്കുന്നു എന്ന് ആരോപിച്ചുകൊണ്ട്‌ അവിടെ നിന്നുള്ള മുഴുവന്‍ സംപ്രേഷണവും തടസ്സപ്പെടുത്തുകയും ജീവനക്കാരെ ഇറക്കിവിടുകയും ചെയ്തതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു.


Next Story

Related Stories