TopTop
Begin typing your search above and press return to search.

പലസ്തീനിലെ ഇസ്രയേലി വാസസ്ഥലങ്ങള്‍ നിയമവിരുദ്ധമല്ല എന്ന് യുഎസ്; അന്താരാഷ്ട്ര നിയമ ലംഘനത്തിൽ വ്യക്തമായ നിലപാട് മാറ്റം

പലസ്തീനിലെ ഇസ്രയേലി വാസസ്ഥലങ്ങള്‍ നിയമവിരുദ്ധമല്ല എന്ന് യുഎസ്; അന്താരാഷ്ട്ര നിയമ ലംഘനത്തിൽ വ്യക്തമായ നിലപാട് മാറ്റം

പലസ്തീനിലെ ഭൂമി കയ്യേറി ഇസ്രയേല്‍ അനധികൃതമായി നിര്‍മ്മിച്ച വാസസ്ഥലങ്ങളേയും കയ്യേറ്റത്തേയും നിയമവിരുദ്ധമായി കാണേണ്ടതില്ല എന്ന് യുഎസ്. അന്താരാഷ്ട്ര നിയമത്തിനും യുഎസ് നയത്തിനും മിക്കവാറും എല്ലാ യുഎസ് സഖ്യകക്ഷികളും പിന്തുടര്‍ന്നുവരുന്ന നയത്തിനുമെല്ലാം വിരുദ്ധമായ മാറ്റമാണ് യുഎസ് വിദേശകാര്യ സെക്രട്ടറി മൈക്ക് പോംപിയോ പ്രഖ്യാപിച്ചത്. സെറ്റില്‍മെന്റുകള്‍ അന്താരാഷ്ട്ര നിയമത്തിന് വിരുദ്ധമാണ് എന്ന നിലപാട് സമാധാനപ്രക്രിയയ്ക്ക് പ്രത്യേകിച്ച് ഗുണമൊന്നും ചെയ്തിട്ടില്ലെന്ന് മൈക്ക് പോംപിയോ അഭിപ്രായപ്പെട്ടു.

ഈ സംഘര്‍ഷത്തിന് (ഇസ്രയേല്‍ - പലസ്തീന്‍) ഒരിക്കലും നിയമപരമായ പരിഹാരം കണ്ടെത്താന്‍ കഴിയില്ല എന്നതാണ് സത്യം. ആരാണ് ശരി, ആരാണ് തെറ്റ് എന്ന് അന്താരാഷ്്ട്ര നിയമപ്രകാരം പരിശോധിക്കുന്നത് സമാധാനമുണ്ടാക്കില്ല എന്നും മൈക്ക് പോംപിയോ അഭിപ്രായപ്പെട്ടു. സെറ്റില്‍മെന്റുകളുടെ നിയമസാധുത ഇസ്രയേലി കോടതികളാണ് തീരുമാനിക്കേണ്ടത്. ഇസ്രയേലികളും പലസ്തീനികളും സമഗ്രമായ ഒരു സമാധാന ധാരണയിലെത്തവുകയാണെങ്കില്‍ യുഎസ് അതിനെ മുന്‍വിധിയോടെ കാണില്ല - പോംപിയോ പറഞ്ഞു. അതേസമയം ജെറുസലേമിലെ യുഎസ് എംബസി ജെറുസലേം, വെസ്റ്റ് ബാങ്ക്, ഗാസ എന്നിവിടങ്ങളിലേയ്ക്ക് യാത്ര ചെയ്യുന്നത് ഒഴിവാക്കണമെന്ന് യുഎസ് പൗരന്മാര്‍ക്ക് മുന്നറിയിപ്പ് നല്‍കി.

മൈക്ക് പോംപിയോയുടെ ഈ പ്രഖ്യാപനത്തിലൂടെ ട്രംപ് ഗവണ്‍മെന്റ് നടത്തിയിരിക്കുന്നത് അന്താരാഷ്ട്ര നിയമത്തിന് പകരം കാടന്‍ നിയമം നടപ്പാക്കാനാണ് എന്ന് പലസ്തീന്‍ നേതാവ് സായിബ് എറികാത്ത് പ്രതികരിച്ചു. ജോര്‍ദാന്‍ വിദേശകാര്യ മന്ത്രി അയ്മാന്‍ സഫാദിയും യുഎസ് പ്രസ്താവനയ്‌ക്കെതിരെ രൂക്ഷവിമര്‍ശനവുമായി രംഗത്തെത്തി. അന്താരാഷ്ട്ര നിയമത്തിന്റെ തുറന്ന ലംഘനമാണ് ഇതെന്നും ഇത് അപകടകരമായ പ്രത്യാഘാതങ്ങളുണ്ടാക്കുമെന്നും ജോര്‍ദാന്‍ വിദേശകാര്യ മന്ത്രി പറഞ്ഞു. അതേസമയം ചരിത്രപരമായ ഒരു തെറ്റ് തിരുത്തുകയാണ് യുഎസ് എന്നും അവര്‍ യാഥാര്‍ത്ഥ്യം തിരിച്ചറിഞ്ഞിരിക്കുകയാണ് എന്നും ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു പ്രതികരിച്ചു.


Next Story

Related Stories