TopTop
Begin typing your search above and press return to search.

അസംബ്ലി തെരഞ്ഞെടുപ്പ്: മഹാരാഷ്ട്രയിലും ഹരിയാനയിലും കോണ്‍ഗ്രസ്സിനെ വെല്ലുവിളിക്കുന്നത് പാര്‍ട്ടിയിലെ പോര്

അസംബ്ലി തെരഞ്ഞെടുപ്പ്: മഹാരാഷ്ട്രയിലും ഹരിയാനയിലും കോണ്‍ഗ്രസ്സിനെ വെല്ലുവിളിക്കുന്നത് പാര്‍ട്ടിയിലെ പോര്

മഹാരാഷ്ട്രയിലും ഹരിയാനയിലും അസംബ്ലി തെരഞ്ഞെടുപ്പുകളിലേക്ക് ഇനി ആഴ്ചകളുടെ ദൂരമേയുള്ളൂ. 2014ലെ അസംബ്ലി തെരഞ്ഞെടുപ്പില്‍ ഈ രണ്ട് സംസ്ഥാനങ്ങളിലും ബിജെപി മികച്ച വിജയമാണ് നേടിയിരുന്നത്. തിരിച്ചുപിടിക്കുന്നതിലേക്ക് എത്തിയില്ലെങ്കിലും മികച്ചൊരു മത്സരം കാഴ്ച വെക്കാന്‍ കോണ്‍ഗ്രസ്സിന് ഇവിടങ്ങളില്‍ കഴിയുമോയെന്ന സന്ദേഹമുണര്‍ത്തുന്ന തരത്തിലുള്ള വാര്‍ത്തകളാണ് വന്നുകൊണ്ടിരിക്കുന്നത്. മഹാരാഷ്ട്രയില്‍ തെരഞ്ഞെടുപ്പ് പ്രചാരണവുമായി സഹകരിക്കില്ലെന്ന് പ്രഖ്യാപിച്ച്‌ രംഗത്തു വന്നിരിക്കുന്നത് മുതിര്‍ന്ന കോണ്‍ഗ്രസ് നേതാവായ സഞ്ജയ് നിരുപം ആണ്. ഹരിയാനയിലും ഒരു മുതിര്‍ന്ന നേതാവ് തന്നെയാണ് കോണ്‍ഗ്രസ്സിനെ ചുറ്റിക്കുന്നത്. അശോക് തന്‍വാര്‍ പ്രതിഷേധമറിയിച്ച്‌ എല്ലാ ഭാരവാഹിത്വത്തില്‍ നിന്നും ഒഴിഞ്ഞിരിക്കുകയാണ്. സോണിയ ഗാന്ധി തെരഞ്ഞെടുപ്പുമായി ബന്ധപ്പെട്ട തന്റെ വാക്കുകള്‍ക്ക് ചെവി നല്‍കാന്‍ പോലും തയ്യാറായില്ലെന്നാണ് ഇദ്ദേഹത്തിന്റെ പരാതി.

2014ലെ അസംബ്ലി തെരഞ്ഞെടുപ്പില്‍ മാത്രമല്ല, ഇക്കഴിഞ്ഞ ലോക്സഭാ തെരഞ്ഞെടുപ്പിലും കോണ്‍ഗ്രസ്സിന് ഈ രണ്ടു സംസ്ഥാനങ്ങളില്‍‌ അനക്കമുണ്ടാക്കാന്‍ കഴിഞ്ഞിരുന്നില്ല. ഈ യാഥാര്‍ത്ഥ്യം നിലനില്‍ക്കെയാണ് മുതിര്‍ന്ന നേതാക്കള്‍ തന്നെ രംഗത്തിറങ്ങിയുള്ള ചെളിയേറ് നടക്കുന്നത്. 2014ല്‍ മഹാരാഷ്ട്രയില്‍ കോണ്‍ഗ്രസ് നേടിയത് 42 സീറ്റുകള്‍ മാത്രമായിരുന്നു. ബിജെപിക്ക് 122 സീറ്റും ശിവസേനയ്ക്ക് 63 സീറ്റും ഇവിടെ നേടാന്‍ കഴിഞ്ഞിരുന്നു. ഹരിയാനയില്‍‌ 2014ല്‍ 47 സീറ്റാണ് ബിജെപി നേടിയത്. നാഷണല്‍ ലോക്ദള്‍ 19 സീറ്റ് നേടി. ഇതിനും താഴെ 15 സീറ്റ് മാത്രമാണ് കോണ്‍ഗ്രസ്സിന് ലഭിച്ചത്.

താന്‍ നിര്‍ദ്ദേശിച്ച സ്ഥാനാര്‍ത്ഥിയെ നിര്‍ത്താഞ്ഞതാണ് മഹാരാഷ്ട്രയില്‍ സഞ്ജയ് നിരുപത്തെ പ്രകോപിപ്പിച്ചത്. ഒറ്റയാളെ മാത്രമേ മുംബൈയില്‍ താന്‍ നിര്‍ദ്ദേശിച്ചുള്ളൂവെന്നും അതുപോലും നിരാകരിക്കപ്പെട്ടുവെന്നും അദ്ദേഹം പരാതി പറയുന്നു. വ്രണിതനായ നിരുപം പ്രതിഷേധമറിയിച്ച്‌ വ്യാഴാഴ്ച തുടര്‍ച്ചയായി ട്വീറ്റുകളിട്ടു. താന്‍ പ്രചാരണത്തിനിറങ്ങില്ലെന്ന് നേതൃത്വത്തെ അറിയിച്ചു കഴിഞ്ഞതാണെന്നും അത് തന്റെ അവസാന തീരുമാനമാണെന്നും അദ്ദേഹം പറഞ്ഞു. എന്നാല്‍ പാര്‍ട്ടിയോട് ഗുഡ്ബൈ പറയാന്‍ സമയമായിട്ടില്ലെന്നാണ് താന്‍ പ്രതീക്ഷിക്കുന്നതെന്നും അദ്ദേഹം കുറിച്ചു. എന്നാല്‍ നേതൃത്വം തന്നോട് പെരുമാറുന്ന രീതി വെച്ചു നോക്കിയാല്‍ പാര്‍ട്ടി വിടുന്ന നാള്‍ അധികം ദൂരെയല്ലെന്നു താക്കീതും അദ്ദേഹം നല്‍കുന്നുണ്ട്. വലിയ പരിക്കാണ് മഹാരാഷ്ട്രയിലെ കോണ്‍ഗ്രസ്സിന്റെ പ്രചാരണത്തിന് ഇദ്ദേഹത്തിന്റെ പരസ്യമായ പ്രഖ്യാപനത്തിലൂടെ സംഭവിച്ചിരിക്കുന്നത്.

താന്‍ നല്‍കിയ 13 നിര്‍ദ്ദേശങ്ങള്‍ ഹൈക്കമാന്‍ഡ് നിരാകരിച്ചെന്നാണ് ഹരിയാനയില്‍ അശോക് തന്‍വാര്‍ പറയുന്ന പരാതി. തന്റെ കത്തിനോട് നേതാക്കളാരും പ്രതികരിച്ചില്ല. ഇത് പാര്‍ട്ടി പ്രവര്‍ത്തകരുടെ ആത്മവീര്യം ചോര്‍ത്തിയെന്നും അദ്ദേഹം പറയുന്നു. ബിജെപിക്ക് എളുപ്പത്തില്‍ ജയിച്ചു കയറാവുന്ന വിധത്തില്‍ ടിക്കറ്റ് വിതരണം നടന്നെന്നും ഇദ്ദേഹത്തിന് ആരോപണമുണ്ട്.

ഈ കത്തിനു പിന്നാലെ ബുധനാഴ്ച തന്‍വാറും കൂട്ടരും സോണിയ ഗാന്ധിയുടെ ഔദ്യോഗിക വസതിക്കു മുമ്ബില്‍ സമരം നടത്തി. സീറ്റ് വിതരണത്തില്‍ അഴിമതി നടന്നിട്ടുണ്ടെന്ന ഗുരുതര ആരോപണവും ഉന്നയിച്ചു.

5 കോടി രൂപ വീതം വാങ്ങിയാണ് കോണ്‍ഗ്രസ് ഹരിയാനയിലെ ഓരോ അസംബ്ലി സീറ്റിലും സ്ഥാനാര്‍ത്ഥികളെ നിര്‍ത്തിയിരിക്കുന്നതെന്ന് അദ്ദേഹം ആരോപിച്ചു. മുന്‍ മുഖ്യമന്ത്രി കൂടിയായ ഭൂപീന്ദര്‍ സിങ് ഹൂദയെയാണ് ഇദ്ദേഹം ലാക്കാക്കുന്നതെന്ന് വ്യക്തമാണ്. ഹൂദയാകട്ടെ തന്‍വാറിനെതിരെ ശക്തമായ ആക്രമണവുമായി എത്തിയിട്ടുണ്ട്. പാര്‍ട്ടിയുടെ ഇന്നത്തെ ദുസ്ഥിതിക്ക് കാരണം തന്‍വാറാണെന്നുവരെ അദ്ദേഹം ആരോപിച്ചു.

മഹാരാഷ്ട്രയിലാണെങ്കില്‍ ഇനിയും പ്രശ്നങ്ങള്‍ നിരവധിയാണ് പാര്‍ട്ടിയില്‍. ലോക്സഭാ തെരഞ്ഞെടുപ്പിനു തൊട്ടു മുമ്ബാണ് നടി ഊര്‍മിള കോണ്‍ഗ്രസ് വിട്ട് ബിജെപിയില്‍ ചേര്‍ന്നത്. നിക്ഷിപ്ത താല്‍പര്യക്കാരുടെ ആഭ്യന്തര രാഷ്ട്രീയം പാര്‍ട്ടിയെ നശിപ്പിക്കുന്നുവെന്ന ആരോപണവും അവര്‍ ഉന്നയിക്കുകയുണ്ടായി. പുതിയ യുവനേതാവായി ദേശീയ തലത്തില്‍ തന്നെ അവതരിപ്പിക്കപ്പെടുന്ന മിലിന്ദ് ദിയോറ സഞ്ജയ് നിരുപമിന്റെ കടുത്ത ശത്രുവാണ്.


Next Story

Related Stories