TopTop
Begin typing your search above and press return to search.

കുമാരസ്വാമി സര്‍ക്കാരിനെ പിരിച്ചുവിടണം - കര്‍ണാടക ഗവര്‍ണര്‍ക്ക് ബിജെപിയുടെ നിവേദനം

കുമാരസ്വാമി സര്‍ക്കാരിനെ പിരിച്ചുവിടണം - കര്‍ണാടക ഗവര്‍ണര്‍ക്ക് ബിജെപിയുടെ നിവേദനം
നിയമസഭയില്‍ ഭൂരിപക്ഷം നഷ്ടമായ സാഹചര്യത്തില്‍ കുമാരസ്വാമിയുടെ നേതൃത്വത്തിലുള്ള സഖ്യ സര്‍ക്കാരിനെ പിരിച്ചുവിടണമെന്ന് ബിജെപി. ഇക്കാര്യം ആവശ്യപ്പെട്ട് ഗവര്‍ണര്‍ വാജുഭായ് വാലയ്ക്ക് ബിജെപി നിവേദനം നല്‍കി. വിശ്വാസ വോട്ടിന്റെ പ്രശ്‌നം ഉദിക്കുന്നില്ലെന്ന് ബിജെപി സംസ്ഥാന അധ്യക്ഷനും പ്രതിപക്ഷ നേതാവുമായ ബിഎസ് യെദിയൂരപ്പ പറഞ്ഞു. കോണ്‍ഗ്രസ്, ജെഡിഎസ് എംഎല്‍എമാരുടെ രാജിയില്‍ തീരുമാനമെടുക്കാന്‍ സ്പീക്കറോട് ആവശ്യപ്പെടണമെന്ന് ബിജെപിയുടെ നിവേദനത്തില്‍ പറയുന്നു.

14 എംഎല്‍എമാര്‍ രാജി വയ്ക്കുകയും രണ്ട് സ്വതന്ത്ര എംഎല്‍എമാര്‍ പിന്തുണ പിന്‍വലിക്കുകയും ചെയ്തതോടെ നിയമസഭയില്‍ 119 അഗംങ്ങളുണ്ടായിരുന്ന കോണ്‍ഗ്രസ് - ജെഡിഎസ് സഖ്യം 103ലേയ്ക്ക് ചുരുങ്ങുകയും 105 സീറ്റുണ്ടായിരുന്ന ബിജെപിയുടെ പിന്തുണ 107ലേയ്ക്ക് ഉയരുകയും ചെയ്തു. 14 എംഎല്‍എമാരുടെ രാജി സ്പീക്കര്‍ അംഗീകരിച്ചാല്‍ ബാക്കിയുള്ള 211 സീറ്റില്‍ 106 സീറ്റാണ് കേവല ഭൂരിപക്ഷത്തിന് വേണ്ടത്.

തങ്ങളുടെ രാജി അംഗീകരിക്കാത്തതിനെതിരെ എംഎല്‍എമാര്‍ സുപ്രീം കോടതിയെ സമീപിച്ചിരിക്കുകയാണ്. എംഎല്‍എമാരുടെ രാജിയില്‍ അടുത്ത തിങ്കളാഴ്ച തീരുമാനമെടുക്കാമെന്നാണ് സ്പീക്കര്‍ കെആര്‍ രമേഷ് അറിയിച്ചിരിക്കുന്നത്. വിമത എംഎല്‍എമാര്‍ മുംബയ് ഹോട്ടലില്‍ തുടരുകയാണ്. ഇവരെ അനുനയിപ്പിക്കാനും രാജിയില്‍ നിന്ന് പിന്തിരിപ്പിക്കാനുമുള്ള ശ്രമം കോണ്‍ഗ്രസും ജെഡിഎസും തുടരുകയാണ്. കോണ്‍ഗ്രസ് നേതാവ് ഡികെ ശിവകുമാര്‍ എംഎല്‍എമാരെ കാണാനായി ഹോട്ടലിലെത്തിയെങ്കിലും പൊലീസ് തടഞ്ഞു. മുഖ്യമന്ത്രി കുമാരസ്വാമിയില്‍ നിന്നും ശിവകുമാറില്‍ നിന്നും തങ്ങള്‍ക്ക് ഭീഷണിയുണ്ടെന്ന് പറഞ്ഞ് എംഎല്‍എമാര്‍ പൊലീസിനെ സമീപിച്ചിരുന്നു.

Next Story

Related Stories