ബിഹാർ തെരഞ്ഞെടുപ്പിൽ എൻഡിഎ സഖ്യത്തെ നിതീഷ് തന്നെ നയിക്കുമെന്ന് ഷാ; ആശയക്കുഴപ്പങ്ങൾക്ക് അന്ത്യമായി

പൗരത്വ നിയമഭേദഗതിയുമായി ബന്ധപ്പെട്ട് ബിഹാറിൽ എൻഡിഎ സഖ്യത്തിനുള്ളിൽ വിള്ളൽ രൂപപ്പെട്ടിട്ടുണ്ടെന്ന അഭ്യൂഹം ശക്തമാകുന്നതിനിടെ കാര്യങ്ങളിൽ വ്യക്തത വരുത്തി ബിജെപി അധ്യക്ഷൻ അമിത് ഷാ രംഗത്ത്. ജെഡിയു നേതാവും മുഖ്യമന്ത്രിയുമായ നിതീഷ് കുമാറിന്റെ നേതൃത്വത്തിൽ ബിഹാർ തെരഞ്ഞെടുപ്പിനെ എൻഡിഎ നേരിടുമെന്ന് അദ്ദേഹം പ്രസ്താവിച്ചു. ബിഹാറിലെ വൈശാലിയിൽ നടന്ന പൊതുയോഗത്തിലായിരുന്നു ഈ പ്രഖ്യാപനം.

ജെഡിയു സംസ്ഥാന വൈസ് പ്രസിഡണ്ടായ പ്രശാന്ത് കിഷോർ പൗരത്വ നിയമത്തിനും പൗരത്വ രജിസ്റ്ററിനുമെതിരെ തുടർച്ചയായി പ്രസ്താവനകളിറക്കിക്കൊണ്ടിരിക്കുന്ന സാഹചര്യം ജെഡിയുവിലും എൻഡിഎയിലും ആശയക്കുഴപ്പം സൃഷ്ടിച്ചിരുന്നു. നിരവധി ജെഡിയു നേതാക്കൾ ഈ വിഷയത്തിൽ‌ അതൃപ്തരാണ്. എന്നാൽ നിതീഷ് കുമാർ പാർലമെന്റിലെടുത്ത നിലപാട് തന്നെ തുടരുകയാണെന്ന സന്ദേശം ഇതിനകം പാർട്ടിക്ക് നൽകിക്കഴിഞ്ഞു. പാര്‍ലമെന്റിൽ ജെഡിയുവിന്റെ കൂടി പിന്തുണയോടെയാണ് പൗരത്വ നിയമം പാസ്സായത്.

"എല്ലാ അഭ്യൂഹങ്ങൾക്കും അന്ത്യം കുറിക്കുകയാണ്. ബിഹാറിൽ അടുത്ത തെരഞ്ഞെടുപ്പിൽ നിതീഷ് കുമാറിന്റെ നേതൃത്വത്തിൽ മത്സരിക്കും," അമിത് ഷാ പറഞ്ഞു. മുസ്ലിം സഹോദരങ്ങളോട് പൗരത്വനിയമ ഭേദഗതി എന്താണെന്ന് പറഞ്ഞുതരുന്നതിനാണ് താന്‍ ഇവിടെ എത്തിയതെന്നും വൈശാലിയിൽ അദ്ദേഹം പറഞ്ഞു.

നിതീഷ് കുമാർ പൗരത്വ നിയമത്തിന്റെ കാര്യത്തില്‍ വ്യക്തതയുള്ള ഒരു നിലപാട് ഇതുവരെ എടുത്തിട്ടില്ല. ഇടയ്ക്കൊരിക്കൽ എൻആർസി നടപ്പാക്കില്ലെന്ന് പറഞ്ഞുവെങ്കിലും പിന്നീട് അതിന് തുടർച്ചയായി ഒരു പ്രസ്താവന നടത്താൻ അദ്ദേഹം തുനിഞ്ഞില്ല.