TopTop
Begin typing your search above and press return to search.

നരേന്ദ്രമോദി ട്വിറ്ററില്‍ ഫോളോ ചെയ്യുന്ന ഗുഞ്ജ കപൂര്‍ വേഷപ്രച്ഛന്നയായി ഷഹീന്‍ബാഗില്‍; സമരക്കാര്‍ പിടിച്ച്‌ പൊലീസിലേല്‍പ്പിച്ചു

നരേന്ദ്രമോദി ട്വിറ്ററില്‍ ഫോളോ ചെയ്യുന്ന ഗുഞ്ജ കപൂര്‍ വേഷപ്രച്ഛന്നയായി ഷഹീന്‍ബാഗില്‍; സമരക്കാര്‍ പിടിച്ച്‌ പൊലീസിലേല്‍പ്പിച്ചു

ഡല്‍ഹിലെ ഷഹീന്‍ബാഗിലെ പൗരത്വ വിരുദ്ധ പ്രക്ഷോഭത്തിലേക്ക് വേഷപ്രച്ഛന്നയായി എത്തിയ വനിതയെ പിടികൂടി പൊലീസില്‍ ഏല്‍പ്പിച്ചതായി റിപ്പോര്‍ട്ട്. ഗുഞ്ജ കപൂര്‍ എന്നുപേരായ ഇവരെ ഷഹീന്‍ബാഗില്‍ സമരത്തിലുള്ളവരാണ് തിരിച്ചറിഞ്ഞ് പിടികൂടിയത്. ബുര്‍ഖ ധരിച്ചാണ് ഇവര്‍ പന്തലിലെത്തിയത്.

സോഷ്യല്‍ മീഡിയയില്‍ സംഘപരിവാര്‍ പ്രചാരകയാണ് ഗുഞ്ജ കപൂര്‍. ഇവരെ നരേന്ദ്രമോദി, രവിശങ്കര്‍ പ്രസാദ്, തേജസ്വി സൂര്യ തുടങ്ങിയ ബിജെപിയിലെ പ്രമുഖര്‍ ട്വിറ്ററില്‍ ഫോളോ ചെയ്യുന്നുണ്ട്. റൈറ്റ് നരേറ്റീവ് എന്നൊരു യൂറ്റൂബ് ചാനലിലെ ക്യൂറേറ്റര്‍ കൂടിയാണിവര്‍‌.

പ്രക്ഷോഭകര്‍ക്കിടയിലേക്ക് കടന്നുവന്ന ഇവര്‍ നിരന്തരമായി ചോദ്യങ്ങളുന്നയിച്ചതോടെയാണ് സംശയമുയര്‍ന്നത്. ഇവര്‍ കൈയിലുള്ള ക്യാമറയില്‍ ദൃശ്യങ്ങള്‍ പകര്‍ത്തുന്നുമുണ്ടായിരുന്നു. പൊലീസ് പിടികൂടി കൊണ്ടുപോകുമ്ബോള്‍ എന്തിനാണ് ക്യാമറ കൈയില്‍ കരുതിയിരുന്നതെന്ന് ചോദിച്ച മാധ്യമപ്രവര്‍ത്തകരോട് 'ഇതില്‍ മാധ്യമങ്ങള്‍ക്കുള്ള ചൂടന്‍ വിഷയങ്ങളൊന്നുമില്ല, മാറ്!' എന്നായിരുന്നു അവരുടെ മറുപടി.

നരേന്ദ്രമോദി തന്നെ ഫോളോ ചെയ്യുന്നതിന്റെ നോട്ടിഫിക്കേഷന്‍ സ്ക്രീന്‍ഷോട്ട് എടുത്ത് പിന്‍ ചെയ്തു വെച്ചിട്ടുണ്ട് ഗുഞ്ജ കപൂര്‍ തന്റെ ട്വിറ്റര്‍ പേജില്‍. ഇന്ത്യയെ 'വിശ്വഗുരു' ആക്കാനായി പ്രവര്‍ത്തിക്കുന്ന കാലാള്‍പ്പടയാളികളാണ് തങ്ങളെന്ന് ഈ ട്വീറ്റില്‍ ഗുഞ്ജ പറയുന്നു.

ഗുഞ്ജയെ ചോദ്യം ചെയ്തു വരികയാണെന്ന് പൊലീസ് അറിയിക്കുന്നു. ഷഹീന്‍ ബാഗിലെ പ്രക്ഷോഭകര്‍ക്കിടയിലേക്ക് വലതുപക്ഷ തീവ്രവാദികള്‍ തോക്കുമായി കടന്നുവന്നതും വെടിയുതിര്‍ത്തതുമായ സംഭവങ്ങള്‍ക്കു പിന്നാലെയാണിത്.


Next Story

Related Stories