കേരളത്തിനു പിന്നാലെ പഞ്ചാബും; പൗരത്വ നിയമത്തിനെതിരെ പ്രമേയം പാസ്സാക്കും

പൗരത്വ നിയമത്തിനെതിരെ പഞ്ചാബും പ്രമേയം പാസ്സാക്കുമെന്ന് റിപ്പോർട്ട്. കേരളത്തിന്റെ മാതൃക പിന്തുടർന്നാണ് ഈ നീക്കം. കേരളത്തിൽ ഭരണപക്ഷവും പ്രതിപക്ഷവും ഒരുമിച്ചെടുത്ത തീരുമാനപ്രകാരം പ്രത്യേക നിയമസഭാ സമ്മേളനം ചേർന്ന് പ്രമേയം പാസ്സാക്കുകയായിരുന്നു. പ്രമേയം പാസ്സാക്കിയതിനു പിന്നാലെ അതിനു പിന്തുണ പ്രഖ്യാപിച്ച് രംഗത്തെത്തിയവരിലൊരാളാണ് പഞ്ചാബ് മുഖ്യമന്ത്രി ക്യാപ്റ്റൻ അമരീന്ദർ സിങ്. പഞ്ചാബിൽ പൗരത്വ നിയമം നടപ്പാക്കില്ലെന്നും അദ്ദേഹം പ്രഖ്യാപിക്കുകയുണ്ടായി.

കോൺഗ്രസ് ഭരിക്കുന്ന സംസ്ഥാനങ്ങളിൽ പൗരത്വ നിയമഭേദഗതിയോട് മൃദുസമീപനം സ്വീകരിക്കുന്നത് ചർച്ചയായ സാഹചര്യത്തിലാണ് പഞ്ചാബിന്റെ ഈ നിക്കമെന്നത് ശ്രദ്ധേയമാണ്. പൗരത്വ നിയമഭേദഗതിക്ക് ദുഷ്ടലാക്കുകകളിലെന്ന് ഇനിയും ആരും കരുതരുതെന്ന് കഴിഞ്ഞദിവസം കോൺഗ്രസ് പ്രവർത്തക സമിതി യോഗത്തിൽ സോണിയാ ഗാന്ധി പ്രസ്താവിക്കുകയുണ്ടായി. വിവിധ സംസ്ഥാനങ്ങളിലെ കോൺഗ്രസ് നേതാക്കൾ പൗരത്വ നിയമഭേദഗതിയോട് മൃദുസമീപനം സ്വീകരിക്കുന്നതിന്റെ പശ്ചാത്തലത്തിലായിരുന്നു സോണിയയുടെ ഈ പ്രസ്താവന.

ഇതിനിടെ കേരളം പൗരത്വ നിയമത്തിൽ വരുത്തിയ ഭേദഗതിക്കെതിരെ സുപ്രീംകോടതിയെ സമീപിച്ചിട്ടുണ്ട്. രാജ്യത്തിന്റെ ഭരണഘടനയുടെ വ്യവസ്ഥകളെ ലംഘിക്കുന്നതാണ് ഈ നിയമഭേദഗതിയെന്നാണ് കേരളം വാദിക്കുന്നത്.