TopTop
Begin typing your search above and press return to search.

വീണ്ടും രാഷ്ട്രീയപ്രസംഗം: ആര്‍ട്ടിക്കിള്‍ 370 റദ്ദാക്കിയത് ചരിത്രപരമായ നടപടിയെന്ന് കരസേനാ മേധാവി

വീണ്ടും രാഷ്ട്രീയപ്രസംഗം: ആര്‍ട്ടിക്കിള്‍ 370 റദ്ദാക്കിയത് ചരിത്രപരമായ നടപടിയെന്ന് കരസേനാ മേധാവി

കാശ്മീരിന്റെ പ്രത്യേക സ്വയംഭരണാധികാരം നീക്കം ചെയ്തതിനെ 'ചരിത്രപരമായ നടപടി'യെന്ന് വിശേഷിപ്പിച്ച്‌ കരസേനാ മേധാവി എംഎം നരവേന്‍ രംഗത്ത്. പട്ടാള ഉദ്യോഗസ്ഥരുടെ രാഷ്ട്രീയ പ്രസ്താവനകള്‍ രാജ്യത്ത് ചര്‍ച്ച ചെയ്യപ്പെടുന്നതിനിടയിലാണ് വീണ്ടുമൊരു രാഷ്ട്രീയ പ്രസ്താവന പുറത്തുവരുന്നത്. പടിഞ്ഞാറുള്ള അയല്‍രാജ്യത്തു നിന്ന് മറഞ്ഞു നിന്നുള്ള യുദ്ധപരിപാടികള്‍ അവസാനിച്ചത് ഭരണഘടനയിലെ ആര്‍ട്ടിക്കിള്‍ 370 നീക്കം ചെയ്തതു കൊണ്ടാണെന്ന് അദ്ദേഹം അവകാശപ്പെട്ടു.

ജമ്മു കാശ്മീരിനെ 'മുഖ്യധാരാ സമൂഹ'വുമായി കൂട്ടിച്ചേര്‍ക്കാന്‍ ആര്‍ട്ടിക്കിള്‍ 370 നീക്കം ചെയ്ത നടപടിക്ക് സാധിക്കുമെന്ന് നരവേന്‍ പറഞ്ഞു. സൈനികദിന പരിപാടിയില്‍ പങ്കെടുത്ത് സംസാരിക്കുകയായിരുന്നു. അദ്ദേഹം.

ഭീകരവാദത്തോട് ഒരുതരത്തിലും വിട്ടുവീഴ്ച ചെയ്യില്ലെന്ന് നരവേന്‍ പറഞ്ഞു. ഭീകരവാദികളെ നേരിടാന്‍ സൈന്യത്തിന്റെ പക്കല്‍ ധാരാളം ഉപാധികളുണ്ടെന്നും അവയെല്ലാം ഉപയാഗിക്കാന്‍ മടിക്കില്ലെന്നും അദ്ദേഹം താക്കീത് നല്‍കി.

മുന്‍ കരസേനാ മേധാവി ബിപിന്‍ റാവത്ത് നടത്തിയ രാഷ്ട്രീയ പ്രസംഗങ്ങള്‍ ഏറെ വിമര്‍ശിക്കപ്പെട്ടിരുന്നു. പട്ടാളം രാഷ്ട്രീയ കാര്യങ്ങളില്‍ ഇടപെടുന്ന കീഴ്‌വഴക്കം രാജ്യത്തില്ല. പാകിസ്താനിലാണ് ഇത്തരം സൈനിക ഇടപെടലുകള്‍ രാഷ്ട്രീയത്തിലുണ്ടാകാറുള്ളതെന്നും അവിടെ പട്ടാള അട്ടിമറികള്‍ സാധാരണമാണെന്നും ചൂണ്ടിക്കാണിക്കപ്പെടുകയുണ്ടായി. എന്നാല്‍ ബിപിന്‍ റാവത്ത് തുടര്‍ച്ചയായി ഇത്തരം പ്രസ്താവനകള്‍ പുറപ്പെടുവിച്ചു കൊണ്ടിരുന്നു. ഇപ്പോഴത്തെ കരസേനാ മേധാവി നരവേന്‍ അധികാരമേറ്റെടുത്തതിനു പിന്നാലെ, നിയന്ത്രണരേഖയ്ക്കപ്പുറത്തുള്ള പ്രദേശങ്ങള്‍ ആക്രമിച്ച്‌ പിടിച്ചെടുക്കണമെങ്കില്‍ തങ്ങള്‍ക്ക് ഉത്തരവ് ലഭിച്ചാല്‍ മാത്രം മതിയെന്ന പ്രസ്താവന നടത്തുകയുണ്ടായി. ഇതും ഏറെ വിമര്‍ശിക്കപ്പെട്ടു. 'പണിയെടുത്താല്‍ മതി, സംസാരിക്കേണ്ടതില്ല' എന്ന് വിമര്‍ശിച്ച്‌ കോണ്‍ഗ്രസ് രംഗത്തു വന്നു.


Next Story

Related Stories