Top

സംസ്ഥാനത്തെ എല്ലാ കസ്റ്റഡി മരണങ്ങളും ഇനി സിബിഐ അന്വേഷിക്കും

സംസ്ഥാനത്തെ എല്ലാ കസ്റ്റഡി മരണങ്ങളും ഇനി സിബിഐ അന്വേഷിക്കും

കേരളത്തിലെ എല്ലാ കസ്റ്റ‍ഡി മരണങ്ങളിലും ഇനി സിബിഐ അന്വേഷണം. തൃശൂര്‍ പാവറട്ടിയില്‍ എക്‌സൈസ് കസ്റ്റഡിയില്‍ പ്രതി മരിച്ച സംഭവത്തിൽ സിബിഐ അന്വേഷണത്തിന് ശുപാർശ ചെയ്യാനുമുള്ള തീരുമാനത്തിനൊപ്പമാണ് സർക്കാറിന്റെ നയപരമായ നടപടി. ഇതോടെ സംസ്ഥാനത്ത് ഇനിയുണ്ടാകുന്ന എല്ലാ കസ്റ്റഡി മരണങ്ങളും സിബിഐ അന്വേഷിക്കാൻ നടപടി ഉണ്ടാകും. സുപ്രീം കോടതി നിർദേശത്തിന്റെ പശ്ചാത്തലത്തിലാണ് നടപടി.

എന്നാൽ സംസ്ഥാനത്ത് മുൻപ് നടന്ന മറ്റ് കസ്റ്റഡി മരണക്കേസുകളും സിബിഐയ്ക്ക് വിടുമോ എന്ന കാര്യം വ്യക്തമല്ല. നേരത്തെ ഏറെ വിവാദം സൃഷ്ടിച്ച നെടുങ്കണ്ടത്തെ രാജ്കുമാറിന്റെ കസ്റ്റഡി മരണത്തിന്റെ അന്വേഷണം സിബിഐക്ക് വിട്ടിരുന്നു.

കസ്റ്റ‍ഡി മരണക്കേസുകൾ സംഭവിച്ചാൽ കർശന നടപടിയുണ്ടാകുമെന്ന് ഉന്നതതല പൊലീസ് യോഗത്തിലും അറിയിച്ചിട്ടുണ്ടെന്ന് മന്ത്രിസഭാ യോഗത്തിൽ മുഖ്യമന്ത്രി വ്യക്തമാക്കുകയായിരുന്നു. ഇനി കസ്റ്റഡി മരണങ്ങളുണ്ടായാൽ അത് സിബിഐക്ക് വിടുമെന്ന കാര്യം ഉന്നത പൊലീസ് ഉദ്യോഗസ്ഥരെ അറിയിച്ചതായും മുഖ്യമന്ത്രി പറഞ്ഞു.
അതിനിടെ, പാവറട്ടി കസ്റ്റഡി മരണ കേസിൽ രണ്ട് പേർ കൂടി അറസ്റ്റിലായി. കസ്റ്റഡിയിലുണ്ടായിരുന്ന എക്സൈസ് ഉദ്യോഗസ്ഥരായ മഹേഷ്, സ്മിബിൻ എന്നിവരുടെ അറസ്റ്റാണ് അന്വേഷണ സംഘം രേഖപ്പെടുത്തിയത്. ഇതോടെ കൊലക്കുറ്റം ചുമത്തി കേസെടുത്ത ഏഴ് പേരിൽ അറസ്റ്റിലായവരുടെ എണ്ണം അഞ്ചായി. കസ്റ്റഡിമരണക്കേസില്‍ മൂന്ന് എക്സൈസ് ഉദ്യോഗസ്ഥര്‍ ഇന്നലെ അറസ്റ്റിലായിരുന്നു. ഇതിന് പിന്നാലെയാണ് സ്മിബിനും മഹേഷും ഇന്നലെ സ്റ്റേഷനിൽ ഹാജരായത്.
ഒളിവിലുള്ള മറ്റ് രണ്ടു പേർ ഇന്ന് ഹാജരാകുമെന്നാണ് സൂചന. എക്സൈസ് പ്രിവൻറീവ് ഓഫീസര്‍മാരായ അനൂപ്, ജബ്ബാര്‍ സിവില്‍ ഓഫീസര്‍ നിതിൻ എന്നിവരാണ് കഴിഞ്ഞ ദിവസം അറസ്റ്റിലായത്. അന്വേഷണസംഘത്തിനു മുന്നില്‍ ഇവർ ഹാജരാകുകയായായിരുന്നു. നേരത്തെ അറസ്റ്റിലായ മൂന്നു പേരെയും പ്രതിയെ കൊണ്ടുപോയ പാവറട്ടിയിലെ ഗോഡൗണില്‍ എത്തിച്ച് അന്വേഷണ സംഘം തെളിവെടുപ്പ് നടത്തുകയും ചെയ്തിരുന്നു.
എന്നാൽ പ്രതിയെ കസ്റ്റ‍ഡിയിലെടുത്ത പ്രിവൻറീവ് ഓഫീസർ ശ്രീജിത്തിനെ സാക്ഷിയാക്കാനാണ് നീക്കം. സാക്ഷി മൊഴികളില്‍ നിന്ന് ശ്രീജിത്ത് മർദ്ദിച്ചിട്ടില്ലെന്ന് വ്യക്തമായതോടെയാണ് ഇദ്ദേഹത്തെ പ്രതിപട്ടികയിൽ നിന്നും ഒഴിവാക്കിയത്. മർദ്ദനത്തിൽ പ്രതിഷേധിച്ച് ശ്രീജിത്ത് ജീപ്പിൽ നിന്നും ഇറങ്ങിപ്പോവുകയായിരുന്നെന്നാണ് വിവരം.


Next Story

Related Stories