TopTop
Begin typing your search above and press return to search.

AZHIMUKHAM PLUS | 'ഗള്‍ഫ് സമൃദ്ധി'യുടെ അന്ത്യം? ആശങ്കകള്‍ ശക്തമാകുന്നു; എണ്ണ വഴുക്കലില്‍ കാലിടറുന്ന കേരള മാതൃക

AZHIMUKHAM PLUS | ഗള്‍ഫ് സമൃദ്ധിയുടെ അന്ത്യം? ആശങ്കകള്‍ ശക്തമാകുന്നു; എണ്ണ വഴുക്കലില്‍ കാലിടറുന്ന കേരള മാതൃക
(ആഗോള സമ്പദ്‌വ്യവസ്ഥ കടുത്ത മാന്ദ്യത്തിന്റേയും പ്രതിസന്ധികളുടേയും മധ്യേയാണ്. കഴിഞ്ഞ നൂറ്റാണ്ടിലെ ഗ്രേറ്റ് ഡിപ്രഷനു ശേഷം ലോകം നേരിടുന്ന ഏറ്റവും കടുത്ത സാമ്പത്തിക പ്രതിസന്ധി. കോവിഡ്-19 മഹാമാരിയായി പടരുന്നതിനു മുമ്പുതന്നെ ലോക ബാങ്കും, അന്താരാഷ്ട്ര നാണയ നിധിയുമടക്കമുള്ളവ സാമ്പത്തിക പ്രതിസന്ധിയെ പറ്റിയുള്ള വ്യാകുലതകളില്‍ പെട്ടിരുന്നു. കോവിഡിന്റെ വ്യാപനത്തോടെ കാര്യങ്ങള്‍ കൂടുതല്‍ രൂക്ഷമായി. ആഗോളപ്രത...

ഇത് പോലുള്ള മികച്ച ഫീച്ചറുകള്‍, ലേഖനങ്ങള്‍, അന്വേഷണാത്മക റിപ്പോര്‍ട്ടുകള്‍, അഭിമുഖങ്ങള്‍ എന്നിവ സാധ്യമാവണമെങ്കില്‍ നിങ്ങളുടെ പിന്തുണ കൂടിയേ തീരൂ. അഴിമുഖം പ്ലസിന്റെ വരിക്കാരാകൂ.

നിര്‍ഭയ മാധ്യമപ്രവര്‍ത്തനത്തെ പിന്തുണയ്ക്കൂ

Support Azhimukham >

(ആഗോള സമ്പദ്‌വ്യവസ്ഥ കടുത്ത മാന്ദ്യത്തിന്റേയും പ്രതിസന്ധികളുടേയും മധ്യേയാണ്. കഴിഞ്ഞ നൂറ്റാണ്ടിലെ ഗ്രേറ്റ് ഡിപ്രഷനു ശേഷം ലോകം നേരിടുന്ന ഏറ്റവും കടുത്ത സാമ്പത്തിക പ്രതിസന്ധി. കോവിഡ്-19 മഹാമാരിയായി പടരുന്നതിനു മുമ്പുതന്നെ ലോക ബാങ്കും, അന്താരാഷ്ട്ര നാണയ നിധിയുമടക്കമുള്ളവ സാമ്പത്തിക പ്രതിസന്ധിയെ പറ്റിയുള്ള വ്യാകുലതകളില്‍ പെട്ടിരുന്നു. കോവിഡിന്റെ വ്യാപനത്തോടെ കാര്യങ്ങള്‍ കൂടുതല്‍ രൂക്ഷമായി. ആഗോളപ്രതിസന്ധിയുടെ പൊതു ദുരിതങ്ങളോടൊപ്പം നമ്മുടെ സവിശേഷമായ പ്രശ്നങ്ങള്‍ കൂടി ചേരുമ്പോള്‍ കേരളത്തിന്റെ സ്ഥിതി കൂടുതല്‍ സങ്കീര്‍ണ്ണം. ഈ പശ്ചാത്തലത്തിലാണ് നമ്മുടെ സാമ്പത്തികമേഖലയുടെ സവിശേഷതയായ 'റെമിറ്റന്‍സ് എക്കോണമി'യുടെഭാവി എന്താവുമെന്നതടക്കമുള്ള ചോദ്യങ്ങള്‍. പ്രവാസികള്‍ മടങ്ങിവരുമെന്ന ആശങ്കകള്‍ക്കപ്പുറം ഈ വിഷയത്തെപ്പറ്റി കേരളത്തില്‍ ഗൗരവമായ ആലോചനകള്‍ നടക്കുന്നതിന്റെ സൂചനകളില്ല. ഗള്‍ഫ് മേഖലയില്‍ സംഭവിക്കുന്ന മാറ്റങ്ങളും അത് പ്രവാസി സമൂഹങ്ങളില്‍ സൃഷ്ടിക്കാനിടയുള്ള പ്രത്യാഘാതങ്ങളെയും ദൂരവ്യാപകമായ മാറ്റങ്ങളെയും പറ്റി ആഴത്തിലുള്ള ആലോചനകള്‍ സംഭവിക്കുന്നുമില്ല. മുതിര്‍ന്ന മാധ്യമ പ്രവര്‍ത്തകനായ കെ.പി. സേതുനാഥ് ആ പ്രശ്‌നങ്ങള്‍ വിശദമായി പരിശോധിക്കുകയാണ് നാലു ഭാഗങ്ങളിലായി പൂര്‍ത്തിയാകുന്ന 'എണ്ണ വഴുക്കലില്‍ കാലിടറുന്ന കേരള മാതൃക' എന്ന ലേഖനപരമ്പരയിലൂടെ).

ഭാഗം 1

കഴിഞ്ഞ നൂറ്റാണ്ടിലെ മഹാമാന്ദ്യം അഥവാ ഗ്രേറ്റ് ഡിപ്രഷനു ശേഷം ആഗോള സമ്പദ്വ്യവസ്ഥ നേരിടുന്ന ഏറ്റവും കടുത്ത മാന്ദ്യത്തിന്റെ നടുവിലാണ് ലോകം. കോവിഡ്-19 മഹാമാരിയായി പടരുന്നതിനു മുമ്പുതന്നെ ലോക ബാങ്കും, അന്താരാഷ്ട്ര നാണയ നിധിയുമടക്കമുള്ള ബുദ്ധികേന്ദ്രങ്ങള്‍ മുതല്‍ സഖാവ് തോമസ് ഐസക്കിന്റെ ഏറ്റവും ഒടുവിലത്തെ ബഡ്ജറ്റു പ്രസംഗത്തില്‍ വരെ സാമ്പത്തിക പ്രതിസന്ധിയെ പറ്റിയുള്ള വ്യാകുലതകള്‍ വ്യക്തമായിരുന്നു. കോവിഡിന്റെ വ്യാപനത്തോടെ 1920-30 കളിലെ മഹാമാന്ദ്യത്തിനേക്കാള്‍ കടുത്ത പ്രതിസന്ധിയാവും ഒരുപക്ഷെ ലോകം നേരിടുകയെന്നു പറയുന്നവരും വിരളമല്ല.

കേരളത്തിന്റെ സാമ്പത്തികമേഖലയും ഈ പ്രതിസന്ധിയില്‍ നിന്നും മുക്തമല്ല. ആഗോളപ്രതിസന്ധിയുടെ പൊതുവായ ദുരിതങ്ങളോടൊപ്പം കേരളത്തിന്റെ സവിശേഷമായ പ്രശ്നങ്ങള്‍ കൂടി ചേരുമ്പോള്‍ നമ്മുടെ സ്ഥിതി കൂടുതല്‍ രൂക്ഷമാവുന്നതിനാണ് സാധ്യത. നവ-ലിബറല്‍ നയങ്ങളുടെ ഭാഗമായി 1980 കള്‍ മുതല്‍ ഉരുത്തിരിഞ്ഞ ആഗോളീകരണത്തിന്റെ ഭാവി ഒരു ചോദ്യചിഹ്നമായി ഉയരുന്നുവെന്നതാണ് കോവിഡ്-കോവിഡാനന്തര കാലത്തെ സാമ്പത്തിക പ്രതിസന്ധിയുടെ പശ്ചാത്തലത്തില്‍ നടക്കുന്ന ചര്‍ച്ചകളിലെ ഒരു മുഖ്യപ്രമേയം.

നിലവിലുള്ള ആഗോള മൂലധനവ്യവസ്ഥയുടെ ജിഹ്വകളിലൊന്നായ എക്കണോമിസ്റ്റു വാരികയുടെ 2020 മെയ് 14-ലക്കത്തിലെ തലക്കെട്ട് 'ഗുഡ് ബൈ ഗ്ലോബലൈസേഷന്‍' എന്നായിരുന്നു. കോവിഡ് സൃഷ്ടിച്ച ലോക്ഡൗണിനു മുമ്പുതന്നെ ആഗോളീകരണം തകര്‍ച്ചയുടെ വക്കിലായെന്നു സാക്ഷ്യപ്പെടുത്തുന്ന എക്കണോമിസ്റ്റിന്റെ വിലയിരുത്തലില്‍ 1990-2000 ദശകമായിരുന്നു ആഗോളീകരണത്തിന്റെ അതിവേഗതയുടെ കാലം. വാണിജ്യം, മൂലധനകൈമാറ്റം, പുറംകരാറിനെ അടിസ്ഥാനമാക്കിയുള്ള മാനുഫാക്ചറിംഗ്-സേവന മേഖലകളിലെ വികേന്ദ്രീകരണം, സ്വകാര്യവല്‍ക്കരണം തുടങ്ങി സാമ്പത്തികമേഖലയുമായി ബന്ധപ്പെട്ട എല്ലാ രംഗങ്ങളിലും ഈ അതിവേഗത ദൃശ്യമായിരുന്നു.

അതിനു മുമ്പുള്ള കാലഘട്ടത്തിലൊന്നും കാണാത്ത വിധത്തിലുളള ഈ വേഗത 2008 ലെ ആഗോളവിപണികളിലുണ്ടായ തകര്‍ച്ചയോടെ വഴിമുട്ടി. പകര്‍ച്ചവ്യാധിയുടെ വ്യാപനത്തിനു മുമ്പുതന്നെ അപകടത്തിലായ സ്ഥിതിവിശേഷം അമേരിക്ക-ചൈന വാണിജ്യയുദ്ധം രൂക്ഷമാക്കി. ചുരുക്കത്തില്‍ കഴിഞ്ഞ ഏതാനും വര്‍ഷങ്ങളായി തട്ടിയും, മുട്ടിയും നീങ്ങിയിരുന്ന ആഗോളീകരണത്തിന് മേല്‍ പതിച്ച അശനിപാതമായി കോവിഡ് മഹാമാരി മാറിയിരിക്കുന്നു.

തകര്‍ച്ച മനസ്സിലാക്കാന്‍ ചില കണക്കുകള്‍

ചില കണക്കുകള്‍ ഇപ്പോഴത്തെ അവസ്ഥയെ മനസ്സിലാക്കുവാന്‍ ഉപകരിക്കും. ബ്രിട്ടനിലെ ഹീത്രൂ വിമാനത്താവളം വഴി യാത്ര ചെയ്തവരുടെ എണ്ണം 97 ശതമാനം കുറഞ്ഞു. മെക്സിക്കോയില്‍ നിന്നുള്ള മോട്ടോര്‍ കാറുകളുടെ കയറ്റുമതി 90 ശതമാനം ഇടിഞ്ഞു. ശാന്തസമുദ്രം വഴിയുള്ള കണ്ടെയ്നര്‍ നീക്കത്തിന്റെ 21 ശതമാനവും റദ്ദു ചെയ്യപ്പെട്ടു (2020 മെയ്-മാസത്തിലെ ഈ കണക്കുകളില്‍ കഴിഞ്ഞ മൂന്നു മാസത്തിനിടയില്‍ ഗുണപരമായ വലിയ മെച്ചമൊന്നും രേഖപ്പെടുത്തിയതായി അറിവില്ല) അടച്ചുപൂട്ടല്‍ പൂര്‍ണ്ണമായും അവസാനിക്കുന്നതോടെ ഈ മേഖലകളെല്ലാം തിരിച്ചുവരവിന്റെ പാതയിലാവുമെന്ന കാര്യത്തില്‍ സംശയമില്ലെങ്കിലും അതിന്റെ വ്യാപ്തി പഴയതു പോലാവില്ല. ഇതാണ് മുഖ്യധാരയിലെ പണ്ഡിതരുടെ വിലയിരുത്തല്‍.

ആഗോളതലത്തില്‍ സാമ്പത്തികമേഖല അനുഭവിക്കുന്ന ഈയൊരു മുരടിപ്പിന്റെ പശ്ചാത്തലത്തിലാണ് കേരളത്തിന്റെ സാമ്പത്തികമേഖലയുടെ സവിശേഷതയായ 'റെമിറ്റന്‍സ് എക്കോണമി'യുടെ (വിദേശത്തും, ഇന്ത്യയുടെ മറ്റു ഭാഗങ്ങളിലുമുള്ള മലയാളി പ്രവാസികള്‍ അയക്കുന്ന പണം) ഭാവി എന്താവുമെന്ന ചോദ്യം പ്രസക്തമാകുന്നത്. റെമിറ്റന്‍സ് എക്കോണമിയുടെ ഗണ്യഭാഗവും സംഭാവന ചെയ്യുന്ന ഗള്‍ഫ് മേഖലയുടെ ഇപ്പോഴത്തെ സ്ഥിതിയും അത് കേരളത്തിന്റെ സാമ്പത്തികമേഖലയില്‍ സൃഷ്ടിക്കാനിടയുള്ള ഭവിഷ്യത്തുകളുമാണ് ഇവിടെ പരിശോധന വിധേയമാക്കുന്നത്.

ഇരുപതാം നൂറ്റാണ്ടു മുതലുള്ള കേരളത്തിന്റെ സാമൂഹിക-രാഷ്ട്രീയ-സാമ്പത്തിക വ്യക്തിത്വ രൂപീകരണത്തിലെ ഒരു സുപ്രധാന ചേരുവയാണ് മലയാളികളുടെ പ്രവാസം. കഴിഞ്ഞ നൂറ്റാണ്ടിന്റെ ആദ്യദശകങ്ങള്‍ മുതല്‍ ദൃശ്യമാവുന്ന തൊഴില്‍ തേടിയുള്ള മലയാളിയുടെ പ്രവാസം തുടക്കം മുതല്‍ ആഗോള സംഭവവികാസങ്ങളുമായി കെട്ടുപിണഞ്ഞ പ്രക്രിയയാണ്. ഒന്നാം ലോകയുദ്ധം സൃഷ്ടിച്ച ക്ഷാമവും, സാമ്പത്തിക ബുദ്ധിമുട്ടുകളും ആയിരുന്നു ഇന്ത്യയുടെ മറ്റുഭാഗങ്ങളിലും, വിദേശങ്ങളിലും തൊഴില്‍ തേടിയുള്ള മലയാളികളുടെ ആദ്യ കുടിയേറ്റത്തിന്റെ പ്രധാനപ്രേരണ. തിരുവിതാംകൂറില്‍ നിന്നും മലബാറിലേക്കുളള ആഭ്യന്തര കുടിയേറ്റത്തിന്റെ പ്രധാന പ്രേരണയും സാമ്പത്തികമായിരുന്നു.

തൊഴില്‍ തേടിയുള്ള മലയാളിയുടെ പ്രവാസം അതിന്റെ പാരമ്യത്തിലെത്തിയത് കഴിഞ്ഞ നുറ്റാണ്ടിന്റെ രണ്ടാം പകുതിയിലാണ്. പശ്ചിമേഷ്യയിലെ ഗള്‍ഫ് രാജ്യങ്ങളിലേക്കുള്ള കുടിയേറ്റമായിരുന്നു അത്. ജാതിവിരുദ്ധ കലാപങ്ങളും, കര്‍ഷക-തൊഴിലാളി മുന്നേറ്റങ്ങളും, സാമ്രാജ്യത്വവിരുദ്ധ സമരങ്ങളും, സ്ത്രീ സ്വാതന്ത്ര്യ പ്രസ്ഥാനങ്ങളുമെല്ലാം കേരളത്തിന്റെ സാമൂഹിക വ്യക്തിത്വ രൂപീകരണത്തില്‍ വഹിച്ച പങ്കിനൊപ്പം പ്രധാനമായി കരുതേണ്ട ഒന്നാണ് തൊഴില്‍ തേടിയുള്ള ഗള്‍ഫിലേക്കുള്ള കുടിയേറ്റം.

ആദിവാസികളും ദളിതരും ഒഴികെയുള്ള കേരളത്തിലെ മറ്റു പ്രമുഖ മത-ജാതി സമുദായങ്ങള്‍ ഏറിയും കുറഞ്ഞും ഗള്‍ഫിലേക്കുള്ള പ്രവാഹത്തില്‍ ഭാഗഭാക്കുകളായിരുന്നു. അതിന്റെ ഗുണവും, ദോഷവും അനുഭവിച്ചവരുമാണ്. 1960കളുടെ അവസാനം കേരളത്തില്‍ പ്രത്യക്ഷമായ ഗള്‍ഫിലേക്കുള്ള പ്രവാസം 1970-1980 ദശകങ്ങളില്‍ വളര്‍ച്ചയുടെ പാരമ്യത്തിലെത്തിയതിനുശേഷം 1990 കളുടെ അവസാനത്തോടെ ഏതാണ്ട് സന്തുതിലാവസ്ഥയിലെത്തുകയായിരുന്നു.

'ഗള്‍ഫ് സമൃദ്ധി'യുടെ അന്ത്യം? ആശങ്കകള്‍ ശക്തമാകുന്നു

1970-കള്‍ക്കു ശേഷമുള്ള കേരളത്തിലെ സാമൂഹിക ജീവിതത്തിന്റെ മുദ്രണങ്ങളില്‍ വലിയ പരിവര്‍ത്തനങ്ങള്‍ക്കിടയാക്കിയ ഗള്‍ഫിലെ പ്രവാസം 50-കൊല്ലം പിന്നിടുമ്പോള്‍ ഉയരുന്ന ചോദ്യം കേരളത്തിന്റെ 'ഗള്‍ഫ് സമൃദ്ധി' അവസാനിച്ചോ എന്നാണ്. കുറച്ചുകാലമായി ഈ ചോദ്യം അന്തരീക്ഷത്തിലുണ്ടെങ്കിലും കോവിഡിന്റെ പശ്ചാത്തലത്തില്‍ അതിന് അടിയന്തര പ്രാധാന്യം കൈവന്നിരിക്കുന്നു. മഹാമാരി സാമൂഹ്യ ജീവിതത്തിന്റെ സമസ്ത മേഖലകളിലും സമൂലപരിവര്‍ത്തനം വരുത്തുമെന്ന വ്യാഖ്യാനങ്ങളില്‍ ഭൂരിഭാഗവും അതിഭാവുകത്വം നിറഞ്ഞ അതിശയോക്തികള്‍ മാത്രമാണെങ്കിലും പെട്രോളിയം സമ്പത്തിനെ ആശ്രയിച്ചുള്ള ഗള്‍ഫ് സമ്പദ്വ്യവസ്ഥ അടിസ്ഥാനപരമായ മാറ്റങ്ങള്‍ക്ക് വിധേയമാവുകയാണെന്ന വിലയിരുത്തലുകള്‍ അസ്ഥാനത്തല്ല. ഈ മാറ്റങ്ങള്‍ മലയാളികളെയും തദ്വാര കേരളത്തിലെ സാമൂഹ്യ-രാഷ്ട്രീയ-സാമ്പത്തിക സാഹചര്യങ്ങളെയും ഏതുവിധത്തില്‍ ബാധിക്കും എന്ന ചോദ്യം പ്രസക്തമാവുന്നതിന്റെ സാഹചര്യം ഇതാണ്.

ലോക മുതലാളിത്ത സമ്പദ്ഘടന നേരിടുന്ന പ്രതിസന്ധിയും കാലാവസ്ഥ വ്യതിയാനവും പരസ്പരബന്ധിതമാണെന്ന തിരിച്ചറിവിന്റെ പശ്ചാത്തലത്തിലാണ് ഗള്‍ഫ് കോര്‍പ്പറേഷന്‍ കൗണ്‍സില്‍ (ജിസിസി) രാജ്യങ്ങളുടെ ഭാവി അത്ര ശോഭനമല്ലെന്ന വിലയിരുത്തലുകള്‍ ശക്തമാവുന്നത്. മലയാളികളായ പ്രവാസികള്‍ തിങ്ങിപ്പാര്‍ക്കുന്ന രാജ്യങ്ങളാണ് ഇവ. പെട്രോളിയം ഉല്‍പ്പന്നങ്ങളുടെ അനിയന്ത്രിതമായ ഉപഭോഗത്തിന്റെ ഫലമായുള്ള പാരിസ്ഥിതിക ദുരന്തമാണ് കാലാവസ്ഥ വ്യതിയാനത്തിന്റെ ഒരു സുപ്രധാന നിമിത്തമെന്ന വിലയിരുത്തല്‍ ഇപ്പോള്‍ വ്യാപകമായി അംഗീകരിക്കപ്പെട്ടിട്ടുണ്ട്. 'ക്ലൈമറ്റ് ഡിനയേര്‍സ്' എന്നൊരു കൂട്ടരാണ് ഇതിനൊരപവാദം. ഡൊണാള്‍ഡ് ട്രംപിനെ പോലുള്ളവര്‍ മുതല്‍ ചില ശാസ്ത്രജ്ഞന്മാര്‍ വരെ ഈ ഗണത്തില്‍ ഉള്‍പ്പെടുന്നു.

പ്രത്യക്ഷമായും, പരോക്ഷമായും പെട്രോളിയം ലോബിയുടെ സാമ്പത്തിക സഹായം ലഭിക്കുന്ന ഇക്കൂട്ടരെ ഒഴിവാക്കിയാല്‍ മുതലാളിത്ത-മനുഷ്യ നിര്‍മിതമായ കാലാവസ്ഥ വ്യതിയാനം ഒരു വസ്തുതയായി ലോകമാകെ അംഗീകരിക്കുന്നു. മുതലാളിത്ത സമ്പദ്ഘടനയുടെ രൂപഭാവങ്ങള്‍ പുനര്‍നിര്‍മിക്കുന്നതില്‍ നിര്‍ണ്ണായക സ്വാധീനം ചെലുത്തിയ ഇന്ധനമാണ് പെട്രോളിയം. ഫോസില്‍ ഇന്ധന മുതലാളിത്തം എന്ന സങ്കല്‍പ്പനങ്ങളും, പ്രയോഗങ്ങളും ഭാഷയായതു തന്നെ ഈ സ്വാധീനത്തിന്റെ തെളിവാണ്.

(അടുത്തഭാഗം: പെട്രോളിയത്തെ അടിസ്ഥാനമാക്കിയ സമ്പദ്ഘടനയും ആഗോളരാഷ്ട്രീയവും)


കെ.പി സേതുനാഥ്

കെ.പി സേതുനാഥ്

മാധ്യമപ്രവര്‍ത്തകന്‍

Next Story

Related Stories