TopTop
Begin typing your search above and press return to search.

നാട് നടുങ്ങിയ കൊലകള്‍: ഫാദര്‍ ബെനഡിക്‌ട് ഓണംകുളമല്ലെന്ന് കോടതി, മറിയക്കുട്ടിയെ കൊലപ്പെടുത്തിയതാര്?

നാട് നടുങ്ങിയ കൊലകള്‍: ഫാദര്‍ ബെനഡിക്‌ട് ഓണംകുളമല്ലെന്ന് കോടതി, മറിയക്കുട്ടിയെ കൊലപ്പെടുത്തിയതാര്?

കൂടത്തായ് കൂട്ടക്കൊല സംബന്ധിച്ച വാര്‍ത്തകള്‍ നിലച്ചിട്ടില്ല. പൊലീസ് അന്വേഷണത്തെ കുറിച്ചും, പ്രതി ജോളിയെ സംബന്ധിച്ചും പുറത്തുവരുന്ന വാര്‍ത്തകളില്‍ കല്‍പിതമായതെന്ത് യാഥാര്‍ത്ഥ്യമെന്ത് എന്നത് വേര്‍തിരിച്ചറിയാന്‍ പറ്റാത്ത വിധത്തിലുള്ള കാര്യങ്ങളാണ് മാധ്യമങ്ങളിലൂടെ പുറത്തുവരുന്നത്. കുറച്ചുനാള്‍ കൂടി ഇതിന്റെ പിന്നാലെ മാധ്യമങ്ങള്‍ ഉണ്ടാവും. മറ്റൊരു പ്രധാന വാര്‍ത്ത പുറത്തുവരുന്നതോടെ അവര്‍ അതിന് പിന്നാലെയാവും. ഇങ്ങനെ കേരളം മറന്നു തുടങ്ങിയ, എന്നാല്‍ സംഭവിച്ച കാലത്ത് കേരളത്തെ പിടിച്ചുകുലുക്കിയ കൊലപാതകങ്ങള്‍ നിരവധിയുണ്ട്. അവയില്‍ ചിലതിനെക്കുറിച്ച്‌ പരിശോധിക്കുകയാണ് അഴിമുഖം. ഈ കൊലപാതകങ്ങള്‍ എങ്ങനെയാണ് ഒരു സമൂഹമെന്ന നിലയില്‍ കേരളത്തെ ബാധിച്ചത് എന്നും പരിശോധിക്കുന്നു. ക്രൈസ്തവ സഭ പ്രതിസ്ഥാനത്ത് നിന്ന് ഒരു കൊലപാതകത്തെക്കുറിച്ച്‌ പരിശോധിക്കുകയാണ് ആദ്യ ഭാഗത്തില്‍.
ഒരു കത്തോലിക്ക പുരോഹിതന്‍ കൊലപാതകിയായി പ്രതി ചേര്‍ക്കപ്പെട്ട കേരളത്തിലെ ആദ്യ കേസ് ആയിരുന്നു മാടത്തരുവി കൊലപാതകം. ഇത് സംസ്ഥാനത്ത് വന്‍ കോളിളക്കം തന്നെ സൃഷ്ടിച്ചു. 1966 ജൂണ്‍ 16 നാണ് വിധവയായ മറിയക്കുട്ടിയുടെ ജഡം പത്തനംതിട്ട ജില്ലയിലെ റാന്നിക്കടുത്തുള്ള മാടത്തരുവിയിലെ തേയിലത്തോട്ടത്തിനടുത്ത് കണ്ടെത്തിയത്. മാടത്തരുവിയുടെ തീരത്ത് വനത്തിനഭിമുഖമായി മൃതദേഹം കിടന്നു. ശരീരത്തിന്റെ അരയ്ക്ക് മുകള്‍ഭാഗത്ത് വസ്ത്രങ്ങളുണ്ടായിരുന്നില്ല. ഇട്ടിരുന്ന ചട്ട ഒരു കയ്യുടെ ഇടയിലായി കുടുങ്ങിക്കിടന്നു. ഒരു ചെവിയുടെ അറ്റത്ത് നിന്ന് മറുചെവിയുടെ അറ്റം വരെ കഴുത്ത് മുറിച്ചിരുന്നു. ശരീരത്തില്‍ പലയിടത്തായി മുറിവുകള്‍. ശരീരത്തിന്റെ താഴെയായി ഒരു ബഡ്ഷീറ്റും അരികെ ഒരു കുടയും കിടന്നു. സുറിയാനി കത്തോലിക്ക പുരോഹിതനായിരുന്ന ബെനഡിക്‌ട് ഓണംകുളത്തിന് എതിരെകൊലപാതക്കുറ്റം ആരോപിക്കപ്പെട്ടു. അന്നുവരെ പുരോഹിതനെ പ്രതിചേര്‍ത്തുള്ള കേസുകള്‍ റിപ്പോര്‍ട്ട് ചെയ്തിരുന്നില്ല എന്നതുകൊണ്ട് തന്നെ മാടത്തരുവി കൊലപാതകം സമൂഹത്തിന് ഞെട്ടലായിരുന്നു.


Next Story

Related Stories