TopTop
Begin typing your search above and press return to search.

166 ജീവക്കാരെ പിരിച്ചുവിട്ടു, മുത്തൂറ്റിൽ വീണ്ടും അനിശ്ചിതകാല സമരം; കോടതിയെ സമീപിക്കട്ടെയെന്ന് എംഡി, ആസ്ഥാനത്തിന് മുന്നിൽ സംഘർഷം

166 ജീവക്കാരെ പിരിച്ചുവിട്ടു, മുത്തൂറ്റിൽ വീണ്ടും അനിശ്ചിതകാല സമരം; കോടതിയെ സമീപിക്കട്ടെയെന്ന് എംഡി,  ആസ്ഥാനത്തിന് മുന്നിൽ  സംഘർഷം

മുത്തൂറ്റ് ഫിനാൻസിൽ നിന്ന് പിരിച്ചുവിട്ടവരെ തിരിച്ചെടുക്കാനാകില്ലെന്ന എംഡി ജോര്‍ജ് അലക്സാണ്ടര്‍ പ്രഖ്യാപിച്ചതിന് പിന്നാലെ മുത്തൂറ്റിന്‍റെ എറണാകുളത്തെ ഹെഡ് ഓഫീസിന് മുന്നിൽ സംഘർഷം. ജോലിക്ക് കയറാൻ ശ്രമിച്ച മാനേജ്മെന്‍റ് അനുകൂല ജീവനക്കാരെ സമരം ചെയ്യുന്ന ജീവനക്കാർ തടഞ്ഞതോടെയാണ് ഓഫീസിന് മുന്നിൽ സംഘർഷാവസ്ഥ രൂപപ്പെട്ടത്. ബുധനാഴ്ച മുതൽ സിഐടിയുവിന്‍റെ നേതൃത്വത്തിൽ മുത്തൂറ്റിൽ വീണ്ടും പണിമുടക്ക് തുടങ്ങിയിരുന്നു. മാനേജ്‍മെന്‍റുമായി ഉണ്ടാക്കിയ സേവന വേതന കരാർ നടപ്പിലാക്കാതെ വരികയും യൂണിയൻ സെക്രട്ടറി ഉൾപ്പടെ 166 ജീവനക്കാരെ പിരിച്ചുവിട്ടതിനെതിരെയുമായിരുന്നു സിഐടിയു സമരം പ്രഖ്യാപിച്ചത്.

എന്നാല്‍ പിരിച്ചുവിട്ടവരെ തിരിച്ചെടുക്കാനാകില്ലെന്ന നിലപാടിലാണ് മുത്തൂറ്റ് എംഡി ജോര്‍ജ് അലക്സാണ്ടര്‍. സമരം ചെയ്യുന്നവർ വേണമെങ്കിൽ കോടതിയെ സമീപിക്കട്ടെയെന്നുമാണ് മുത്തൂറ്റ് എംഡിയുടെ നിലപാട്. സംസ്ഥാനത്തെ ശാഖകളിൽ 800 ജീവനക്കാര്‍ അധികമാണ്. ബിസിനസ് കുറഞ്ഞതോടെയാണ് 43 ബ്രാഞ്ചുകൾ പൂട്ടാനും 166 പേരെ പിരിച്ചുവിടാനും തീരുമാനിച്ചതെന്നും എംഡി പ്രതികരിച്ചതായി ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നു. കഴിഞ്ഞ ശനിയാഴ്ചയാണ് ജീവനക്കാർക്ക് പിരിച്ചുവിടൽ നോട്ടീസ് ഇമെയിൽ വഴി നൽകിയത്. ഇതിന് പിന്നാലെ ജീവനക്കാർക്ക് ജോലി ചെയ്ത കാലയളവിലേക്കുള്ള തുക അക്കൗണ്ടിൽ നൽകുകയും ചെയ്തു.

അതേസമയം, അനിശ്ചിതകാല പണിമുടക്ക് സമരം പൊളിക്കാൻ ജീവനക്കാർക്ക്‌ പണവും മറ്റുസഹായങ്ങളും വാഗ്ദാനംനൽകി മുത്തൂറ്റ് മാനേജ്മെന്റിന്റെ രഹസ്യ സർക്കുലർ പുറത്തിറക്കിയതായും റിപ്പോർട്ടുകളുണ്ട്. പണവും നിയമ സഹായവും സംരക്ഷണവും വാഗ്ദാനം നൽകി, ഒരു വിഭാഗം ജീവനക്കാരെ അക്രമത്തിന് പ്രേരിപ്പിക്കുന്ന സർക്കുലറാണ് മുത്തൂറ്റ് എംഡി ഇറക്കിയതെന്ന് ദേശാഭിമാനി റിപ്പോർട്ട് ചെയ്യുന്നു. എതിർപ്പ് നേരിട്ടാലും ശാഖകൾ തുറക്കണമെന്നാണ് സർക്കുലറിൽ പറയുന്നത്. തുറക്കാൻ സമ്മതിച്ചില്ലെങ്കിൽ 'റൈറ്റ് ടു വർക്ക്' എന്നെഴുതിയ പ്ലക്കാർഡുകൾ ഉയർത്തി പ്രതിഷേധിക്കണം. ഇങ്ങനെ ചെയ്യുന്നവർക്ക് ശമ്പളമുൾപ്പെടെ കൃത്യമായി കിട്ടുമെന്നും സർക്കുലറിൽ പറയുന്നു.

നേരത്ത, ആഗസ്റ്റ് 20 ന് ആരംഭിച്ച സമരം 52 ദിവസമാണ് നീണ്ടുനിന്നത്. പിന്നീട് ഹൈക്കോടതി നിരീക്ഷകന്‍റെ നേതൃത്വത്തിൽ എറണാകുളം ഗസ്റ്റ് ഹൗസിൽ വെച്ച് നടത്തിയ ചർച്ചയിലാണ് സമരം ഒത്തുതീർപ്പായത്. ശമ്പള വര്‍ധന എന്നതടക്കമുള്ള വ്യവസ്ഥകളുടെ അടിസ്ഥാനത്തിലായിരുന്നു സമരം അവസാനിപ്പിച്ചത്. ശമ്പളപരിഷ്കരണം ഉടൻ നടപ്പാക്കുക, പിരിച്ചു വിട്ട എട്ട് തൊഴിലാളികളെ തിരിച്ചെടുക്കുക, 41 പേരുടെ സസ്പെൻഷൻ പിൻവലിക്കുക, താൽക്കാലികമായി 500 രൂപ ശമ്പളം വർധിപ്പിക്കുക എന്നീ ആവശ്യങ്ങളം അന്ന് മാനേജ്മെന്റ് സമ്മതിച്ചിരുന്നു. നിലവിൽ 611 ശാഖകളിലും 11 റീജണൽ ഓഫീസുകളിലുമായി 1800 ജീവനക്കാരാണ് മുത്തൂറ്റിലുള്ളത്.


Next Story

Related Stories