TopTop

കോവിഡ് 19: 'നമ്മുടെ പൗരൻമാർ വരാൻ പാടില്ല എന്ന കേന്ദ്രസമീപനം അപരിഷ്കൃതം', വിദേശ ഇന്ത്യക്കാരെ തിരികെ എത്തിക്കാൻ കേരള നിയമസഭ പ്രമേയം പാസാക്കും

കോവിഡ് 19:

കൊറോണ വൈറസ് ബാധയുടെ പശ്ചാത്തലത്തിൽ ലോകത്തിന്റെ വിവിധയിടങ്ങളിൽ കുടുങ്ങിക്കിടക്കുന്ന ഇന്ത്യക്കാരെ തിരികെ കൊണ്ടുവരാൻ നടപടി എടുക്കണമെന്ന് മുഖ്യമന്ത്രി പിണറായി വിജയൻ‌. ഇറ്റലിയുൾപ്പെടെയുള്ള രാജ്യങ്ങളിൽ മലയാളികൾ ഉൾപ്പെടെ കുടുങ്ങിക്കിടക്കുന്ന സാഹചര്യത്തിലാണ് മുഖ്യമന്ത്രിയുടെ ആവശ്യം. ഇക്കാര്യം ചൂണ്ടിക്കാട്ടി സംസ്ഥാന നിയമസഭ പ്രമേയം പാസാക്കും.

കൊറോണ പടർന്ന് പിടിച്ച രാജ്യങ്ങളിൽ ഉൾപ്പെടെ ഇന്ത്യൻ പൗരൻമാർക്ക് നാട്ടിലേക്ക് തിരിക്കാൻ കഴിയാതെ കുടുങ്ങിക്കിടക്കുന്ന സാഹചര്യത്തിന് കാരണം കേന്ദ്ര സർക്കാറാണെന്നും മുഖ്യമന്ത്രി കുറ്റപ്പെടുത്തി. സിവിൽ ഏവിയേഷൻ മന്ത്രാലയം പുറത്തിറക്കിയ സർക്കുലറാണ് മടങ്ങുന്നവർക്ക് വിലങ്ങ് തടിയാവുന്നത്. മന്ത്രാലയം പുറത്തിറക്കിയ സർക്കുലർ അപരിഷ്കൃതമാണെന്നും അദ്ദേഹം കുറ്റപ്പെടുത്തി.

കോവിഡ് 19 രോഗബാധയെ തുടര്‍ന്ന് പ്രവാസികള്‍ നിരവധി പ്രയാസങ്ങള്‍ നേരിടുന്നത് ശ്രദ്ധയില്‍പ്പെട്ടിട്ടുണ്ട്. ഇതേതുടര്‍ന്ന് വിമാന സര്‍വ്വീസുകള്‍ റദ്ദാക്കിയതുകാരണം ഗള്‍ഫ് രാജ്യങ്ങളിലേക്ക് അവധി കഴിഞ്ഞ് തിരികെ പോകേണ്ടവരുടെയും പുതുതായി തൊഴില്‍വിസ ലഭിച്ച് പോകേണ്ടവരുടെയും തൊഴില്‍ നഷ്ടപ്പെടാതെ കാലാവധി നീട്ടി ലഭിക്കേണ്ടതുണ്ട്. അന്തര്‍ദേശീയതലത്തില്‍ തന്നെ ഇതൊരു പ്രധാന പ്രശ്‌നമായതിനാല്‍ പല രാജ്യങ്ങളും വിദേശയാത്രയ്ക്ക് നിയന്ത്രണങ്ങള്‍ ഏര്‍പ്പെടുത്തിയിരിക്കുകയാണ്. ഇന്ത്യയടക്കം 10 രാജ്യങ്ങളില്‍ നിന്നും വരുന്ന യാത്രക്കാര്‍ക്ക് പി.സി.ആര്‍ (Polymerase Chain Reaction)

മെഡിക്കല്‍ സര്‍ട്ടിഫിക്കറ്റ് നിര്‍ബന്ധമാണെന്ന് കുവൈറ്റ് സര്‍ക്കാര്‍ ഉള്‍പ്പെടെയുള്ള ചില രാജ്യങ്ങള്‍ നിഷ്‌കര്‍ഷിച്ചിട്ടുണ്ട്. ഈ അവസരത്തില്‍ ഇത്തരത്തിലുള്ള യാത്രാ വിലക്കുകള്‍ കാരണം പ്രവാസികളുടെ ഇപ്പോഴുള്ള ജോലി നഷ്ടപ്പെടാതിരിക്കാന്‍ സാധ്യമായ എല്ലാ നടപടികളും സ്വീകരിക്കണമെന്ന് കാണിച്ച് കേന്ദ്ര വിദേശകാര്യ മന്ത്രിക്ക് 10.03.2020 ല്‍ കത്തയച്ചിട്ടുണ്ട്.

ഇന്ത്യൻ പൗരൻ രോഗി ആയിപ്പോയെന്ന് വെച്ച് ഇങ്ങോട്ട് വരാൻ പാടില്ലെന് പറയാമോ - നമ്മുടെ രാജ്യത്തെ പൗരൻമാർ ഇങ്ങോട്ട് വരാൻ പാടില്ല എന്ന കേന്ദ്രസമീപനം അപരിഷ്കൃതമാണ്. ഇതുമായി ബന്ധപ്പെട്ട് സിവിൽ ഏവിയേഷൻ മന്ത്രാലയം ഇറക്കിയ സർക്കുലർ പിൻവലിക്കണമെന്ന് ആവശ്യപ്പെട്ട് പ്രധാനമന്ത്രിക്ക് കത്തയച്ചിട്ടുണ്ട്. ഈ പ്രശ്നം സംബന്ധിച്ച് നിയമസഭ പ്രമേയം അവതരിപ്പിക്കുന്ന കാര്യം പരിഗണിക്കാവുന്നതാണ്. കെ.വി. അബ്ദുള്‍ ഖാദറിന്റെ ശ്രദ്ധക്ഷണിക്കലിന് മറുപടി പറയുകയായിരുന്നു മുഖ്യമന്ത്രി. കൊവിഡ് 19 വിഷയത്തിൽ സർക്കാർ കൊണ്ടുവരുന്ന പ്രമേയത്തെ പ്രതിപക്ഷം പിന്തുണയ്ക്കുമെന്നും പ്രതിപക്ഷ നേതാവ് രമേശ് ചെന്നിത്തലയും നിയമസഭയെ അറിയിച്ചു.


Next Story

Related Stories