കനത്തമഴയിൽ വെള്ളം കയറി കോന്നിയിൽ ഒരു കോളനി, വോട്ട് ചെയ്യാൻ പോവാൻ പോലും കഴിയാതെ 30ഓളം പേർ

ഒരു കോളനിയിലെ എട്ടോളം വീടുകളാണ് വെള്ളത്തിൽ മുങ്ങിയിട്ടുള്ളത്. വീടുകളുടെ പാതിയോളം വെള്ളത്തിൽ മുങ്ങിയ നിലയിലുള്ള പ്രദേശത്ത് ആളുകളെ മുഴുവനായി മാറ്റിപ്പാർപ്പിക്കേണ്ട അവസ്ഥയാണ് ഉള്ളത്. കോളനിയ്ക്ക് സമീപത്തെ തോട് കരകവിഞ്ഞ് ഒഴുകിയതാണ് സ്ഥിതിഗതികൾ രൂക്ഷമാക്കിയത്. എല്ലാതവണയും സമാനമായ അവസ്ഥയാണെന്ന് കോളനി നിവാസികൾ ഏഷ്യാനെറ്റ് ന്യൂസിനോട് പ്രതികരിച്ചു.

കോളനിയിലുള്ള ആരും തന്നെ ഇത്തവണ വോട്ട് ചെയ്യാൻ പോയിട്ടില്ലെന്നും നാട്ടുകാർ പ്രതികരിക്കുന്നു. കോളനിയിലേക്ക് വഴിയില്ല, വീടുകൾ ഇട്ടെറെഞ്ഞ് പോവാൻ കഴിയില്ല. കോളനിയിൽ ഏഴ് വീടുകളിലായി 30 ഓളം വോട്ടർമാർ ഉണ്ടെന്നും നാട്ടുകാർ പറയുന്നു.

പുലർച്ചെ അഞ്ചു മണിയോടെ പെട്ടന്നാണ് കോളനിയിൽ വെള്ളം കയറുന്നത്. അതുകൊണ്ട് തന്നെ സാധനങ്ങൾ ഉൾപ്പെടെ എടുത്ത് മാറ്റാൻ സമയം ലഭിച്ചില്ലെന്നും പ്രദേശവാസികൾ പറയുന്നു. പഞ്ചായത്ത് അനുവദിച്ച വീടുകളാണ് കോളനിയിലുള്ളത്. ഈ വിടുകളാണ് ഇപ്പോൾ വെള്ളത്തിൽ മുങ്ങിയിട്ടുള്ളത്. കോളനിയിലേക്ക് വഴിയാണ് അത്യാവശ്യം. ഇതനൊപ്പം തോടിന്റെ വശങ്ങൾ കെട്ടി സുരക്ഷിതമാക്കിയാൽ പ്രശ്നങ്ങള്‍ക്ക് പരിഹാരമാവുമെന്നും നാട്ടുകാർ ചൂണ്ടിക്കാട്ടുന്നു. ഫയർഫോഴ്സ് ബോട്ടുൾപ്പെടെയുള്ള സംവിധാനങ്ങളുമായി സ്ഥലത്തെത്തിയാണ് പ്രദേശത്ത് പ്രശ്നങ്ങൾ നേരിട്ടത്. ജില്ലാ കളക്ടർ ഉള്‍പ്പെടെ സ്ഥലം സന്ദർശിക്കുകയും ചെയ്തിരുന്നു.