TopTop
Begin typing your search above and press return to search.

കോങ്ങാട് കേസിൽ നാല് ദിവസം പൊലീസ് എന്നെ കസ്റ്റഡിയിൽ വച്ചു, ഹോർമിസ് തരകനും സംഘവും ഞങ്ങളുടെ വീട് വളഞ്ഞിരുന്നു - 1968ൽ തലശ്ശേരി പൊലീസ് സ്റ്റേഷനിലേയ്ക്ക് മാർച്ച് ചെയ്ത എ എസ് ശിവദാസ് ഓർക്കുന്നു

കോങ്ങാട് കേസിൽ നാല് ദിവസം പൊലീസ് എന്നെ കസ്റ്റഡിയിൽ വച്ചു, ഹോർമിസ് തരകനും സംഘവും  ഞങ്ങളുടെ വീട് വളഞ്ഞിരുന്നു - 1968ൽ തലശ്ശേരി പൊലീസ് സ്റ്റേഷനിലേയ്ക്ക് മാർച്ച് ചെയ്ത എ എസ് ശിവദാസ് ഓർക്കുന്നു

പാലക്കാട് ജില്ലയിൽ നക്സലുകളുടെ ഉന്മൂലന ആക്ഷൻ നടന്നത് 1970 ജൂലായ് 30ന് കോങ്ങാടാണ്. ക്രൂരതയുടേയും ചൂഷണത്തിന്റേയും പേരിൽ കുപ്രസിദ്ധി നേടിയിരുന്ന ജന്മി നാരായണൻ കുട്ടി നായരുടെ തല വെട്ടി കുളപ്പടവിൽ വച്ച നക്സലൈറ്റുകളുടെ പ്രവൃത്തി കേരളത്തിൽ വലിയ വാർത്തയായി. ഇതിനോടകം തലശ്ശേരി, പുൽപ്പള്ളി പൊലീസ് സ്റ്റേഷൻ ആക്രമണങ്ങളും വയനാട്ടിലേയും മറ്റും ജന്മിമാരെ ഉന്മൂലനം ചെയ്യുന്നതുമടക്കമുള്ള നക്സലൈറ്റ് ആക്ഷനുകളും കേരളത്തിൽ നടന്നിരുന്നു. വയനാട്ടിലെ തിരുനെല്ലിയിൽ നക്സൽ നേതാവായിരുന്ന എ വർഗീസിനെ പൊലീസ് പിടികൂടി വ്യാജ ഏറ്റുമുട്ടലിൽ കൊലപ്പെടുത്തിയത് 1970 ഫെബ്രുവരി 18നാണ്. ഈ സംഭവത്തിന് പ്രതികാരമായാണ് കോങ്ങാട് നക്സലൈറ്റ് ആക്ഷൻ നടന്നത് എന്ന് വിലയിരുത്തപ്പെട്ടു. സി അച്യുത മേനോൻ മുഖ്യമന്ത്രിയും സി എച്ച് മുഹമ്മദ് കോയ ആഭ്യന്തര മന്ത്രിയുമായിരുന്നു അക്കാലത്ത്. പിന്നീട് കേരള പൊലീസ് മേധാവിയും ഇന്ത്യൻ വിദേശ രഹസ്യാന്വേഷണ സംഘടനയായ റിസർച്ച് ആൻഡ് അനാലിസിസ് വിങ്ങിന്റെ (RAW) തലവനുമൊക്കെയായി പ്രവർത്തിച്ചിട്ടുള്ള ഹോർമിസ് തരകൻ അക്കാലത്ത് കോങ്ങാട് കേസിന്റെ അന്വേഷണത്തിന്റെ ഭാഗമായിരുന്നു. എ എസ് പി (ട്രെയിനിംഗ് പിരീഡ്) ആയിരുന്നു അന്ന് ഹോർമിസ് തരകൻ. കോങ്ങാട് കേസിലെ പ്രതികളിൽ ഭൂരിഭാഗം പേരും ഇന്ന് ജീവിച്ചിരിപ്പില്ല. കോങ്ങാട് തലവെട്ട് കേസുമായി ബന്ധപ്പെട്ട് നാല് ദിവസം പൊലീസ് കസ്റ്റഡിയിൽ കഴിഞ്ഞയാളാണ് പാലക്കാട് പറളി തേനൂർ സ്വദേശി എ എസ് ശിവദാസ്. 1967 മുതൽ 69 വരെ നക്സലൈറ്റ് പ്രസ്ഥാനവുമായി ബന്ധപ്പെടുകയും 1968ൽ തലശ്ശേരി പൊലീസ് സ്റ്റേഷൻ ആക്രമണത്തിനായി പാലക്കാട് നിന്ന് പോയ സംഘത്തിലുണ്ടാവുകയും ചെയ്തയാളാണ് ശിവദാസ്. സിപിഎമ്മിന്റെ വിദ്യാർത്ഥി സംഘടനയായിരുന്ന കെ എസ് എഫിന്റെ പാലക്കാട് ജില്ലാ സെക്രട്ടറിയും സംസ്ഥാന കമ്മിറ്റി അംഗവുമായിരിക്കെയാണ് എ എസ് ശിവദാസ് നക്സൽ പ്രസ്ഥാനവുമായി അടുത്ത് സിപിഎം വിടുന്നത്. എന്നാൽ നക്സലുകൾ പാർട്ടി (സിപിഐഎംഎൽ) രൂപീകരിച്ച 1969ൽ തന്നെ ശിവദാസ് നക്സലിസം വിട്ട് സിപിഎമ്മിൽ തിരിച്ചെത്തി. പിന്നീട് 1983ൽ സിപിമ്മുമായി തെറ്റി സിപിഐയിൽ. നിലവിൽ സിപിഐ പാലക്കാട് ജില്ലാ എക്സിക്യൂട്ടീവ് അംഗവും കിസാൻ സഭ ദേശീയ കൗൺസിൽ അംഗവുമാണ്, പറളി പഞ്ചായത്ത് മുൻ മെംബർ ആയ ശിവദാസ്. കോങ്ങാട് സംഭവവും നക്സൽ പ്രവർത്തനങ്ങളും സംബന്ധിച്ച ഓർമ്മകൾ അഴിമുഖവുമായി പങ്കുവയ്ക്കുകയാണ് കോങ്ങാട് നക്സലൈറ്റ് ആക്ഷന്റെ 50ാം വാർഷികത്തിൽ എ എസ് ശിവദാസ്. (ആദ്യ ഭാഗങ്ങള്‍ വായിക്കാം)

കോങ്ങാട്ട് നക്സലൈറ്റ് ആക്ഷൻ നടക്കുമ്പോളേക്കും ഞാൻ നക്സൽ പ്രസ്ഥാനം വിട്ടിരുന്നു. 1969ൽ തന്നെ നക്സലുകളുമായി അകന്നു. പിന്നെ സിപിഎമ്മുമായി ബന്ധപ്പെട്ട് പ്രവർത്തിക്കുകയായിരുന്നു. എന്നാൽ 1970 ജൂലായ് 30ന് കോങ്ങാട് ജന്മിയായിരുന്ന നാരായണൻ കുട്ടി നായരെ നക്സലുകൾ കൊലപ്പെടുത്തിയപ്പോൾ എന്നെയും പൊലീസ് കസ്റ്റഡിയിലെടുത്തു. ഞാൻ ആ സമയത്ത് വിക്ടോറിയ കോളേജിൽ അവസാന വർഷ ബിഎ മലയാളം വിദ്യാർത്ഥിയായിരുന്നു. അച്ഛനുമായി പരിചയമുള്ള ഒരു എസ് ഐ ആണ് എന്നെ കൊണ്ടുപോയത്. പിന്നീട് തൃശ്ശൂർ എസ് പി ആയി റിട്ടയർ ചെയ്ത ചാലിശ്ശേരിക്കാരൻ വിജയൻ (പിന്നീട് ഐ പി എസ് കിട്ടിയിരുന്നു) എന്നയാളായിരുന്നു അന്ന് എസ് ഐ. മർദ്ദനമൊന്നുമുണ്ടായില്ല. നാല് ദിവസം പാലക്കാട് മുട്ടിക്കുളങ്ങര എം എസ് പി ക്യാമ്പിൽ ചോദ്യം ചെയ്തു.

ഡി വൈ എസ് പി ആയിരുന്ന മുരളീകൃഷ്ണ ദാസ് ആണ് ചോദ്യം ചെയ്തത്. അദ്ദേഹത്തിന് നക്സൽ പ്രസ്ഥാനത്തെക്കുറിച്ചും മാർക്സിസത്തെക്കുറിച്ചും മാവോയിസത്തെക്കുറിച്ചും സായുധവിപ്ലവത്തെക്കുറിച്ചുമൊക്കെ നല്ല ധാരണയുണ്ടായിരുന്നു. എനിക്ക് കോങ്ങാട് ആക്ഷനുമായി ബന്ധമില്ല എന്ന് എസ് ഐ വിജയനും മുരളീകൃഷ്ണദാസിനും മനസ്സിലായിരുന്നു. അന്ന് ഹോർമിസ് തരകനോടും മറ്റും മുരളീകൃഷ്ണ ദാസ് ഇക്കാര്യം പറയുകയും ചെയ്തു. എന്നാൽ എന്നെ കസ്റ്റഡിയിൽ നിന്ന് വിട്ട ശേഷവും ഞങ്ങൾ താമസിച്ചിരുന്ന വീട് ഹോർമിസ് തരകന്റെ നേതൃത്വത്തിലുള്ള പൊലീസ് സംഘം വളഞ്ഞിരുന്നു. അന്ന് അവിടെ ആരുമുണ്ടായിരുന്നില്ല. അവർ തിരിച്ചുപോവുകയും ചെയ്തു. ആരെയെങ്കിലും ഒളിപ്പിച്ചിട്ടുണ്ടോ എന്ന് നോക്കാനാണ് അവർ വന്നത്. ചോദ്യം ചെയ്യലിന്റെ പല ഘട്ടത്തിലും എസ് ഐമാരേയും ഹോർമിസ് തരകനേയും പലപ്പോഴും മുരളീകൃഷ്ണ ദാസ് തിരുത്തിയിരുന്നു. ഹോർമിസ് തരകൻ ഞാനുമായി സംസാരിച്ചിരുന്നു. എന്നാൽ അദ്ദേഹം എന്നെ ചോദ്യം ചെയ്തിരുന്നില്ല. അദ്ദേഹം അക്കാലത്ത് ഐപിഎസ്സിൽ വന്നിട്ടേ ഉണ്ടായിരുന്നുള്ളൂ.

1967ൽ പാലക്കാട് നടന്ന കെഎസ്എഫിന്റെ സംസ്ഥാന സമ്മേളനത്തിന്റെ സമയത്താണ് തീവ്ര ഇടതുചിന്താഗതിക്കാരായിരുന്ന ഞങ്ങൾ സിപിഎമ്മുമായി വഴിപിരിഞ്ഞു തുടങ്ങിയത്. ഞാനന്ന് കെ എസ് എഫ് പാലക്കാട് ജില്ലാ സെക്രട്ടറിയും സംസ്ഥാന കമ്മിറ്റി അംഗവുമാണ്. പ്രസിഡന്റാകണമെന്ന് പിണറായി വിജയനോട് ഫിലിപ്പ് എം പ്രസാദും മറ്റും ആവശ്യപ്പെട്ടു. എന്നാൽ പിണറായി അതിന് തയ്യാറായില്ല. ഫിലിപ്പ് എം പ്രസാദ് പ്രസിഡന്റും പിണറായി വിജയൻ സെക്രട്ടറിയുമെന്ന് വൈകീട്ട് അഴീക്കോടൻ രാഘവൻ പാർട്ടി തീരുമാനം പ്രഖ്യാപിച്ചപ്പോൾ പിണറായി അത് അംഗീകരിച്ചു. എന്നാൽ സമ്മേളനം തിരഞ്ഞെടുത്തത് നക്സൽ അനുഭാവികളായിരുന്ന, വിക്ടോറിയ കോളേജിലെ കെ വേണുഗാപോലിനേയും ഫിലിപ്പ് എം പ്രസാദിനേയും. വേണുഗോപാൽ പ്രസിഡന്റും ഫിലിപ്പ് എം പ്രസാദ് സെക്രട്ടറിയുമായി. അന്ന് കുഞ്ഞിരാമൻ മാസ്റ്ററാണ് സിപിഎം ജില്ലാ സെക്രട്ടറി. ആ സമയത്ത് മുഖ്യമന്ത്രിയായിരുന്ന ഇ എം എസ് മലമ്പുഴയിൽ വന്നപ്പോൾ ഞങ്ങൾ കാണാൻ പോയിരുന്നു. "ഇവര് ഇങ്ങനെ ചില പണിയൊക്കെ ഒപ്പിച്ചിട്ടുണ്ട്" എന്ന് കുഞ്ഞിരാമൻ മാസ്റ്റർ ഇ എം എസ്സിനോട് പറഞ്ഞു. "അതൊക്കെ വേറെ കാര്യം, ഇവർ ഇപ്പൊ മുഖ്യമന്ത്രിയെ കാണാൻ വന്നതാണ്" എന്നാണ് ഇ എം എസ് അന്ന് പറഞ്ഞത്. മൂന്ന് മാസം കഴിഞ്ഞ് കൊല്ലത്ത് കെ എസ് എഫിന്റെ പ്രത്യേക സമ്മേളനം ചേരുകയും വൈക്കം വിശ്വനെ പ്രസിഡന്റായും പിണറായി വിജയനെ സെക്രട്ടറിയായും തിരഞ്ഞെടുക്കുകയും ചെയ്തു. ഇതോടെയാണ് സിപിഎമ്മുമായുള്ള ഞങ്ങളുടെ അകൽച്ചയുടെ തുടക്കം.

പിണറായിയ്ക്ക് ഇടക്കാലത്ത് ചെറിയ തീവ്ര ഇടത് അനുഭാവമൊക്കെ ഉണ്ടായിരുന്നതായും എം വി രാഘവനൊക്കെ ഇടപെട്ട് പിന്തിരിപ്പിച്ചതായുമൊക്കെ പറഞ്ഞുകേട്ടിട്ടുണ്ട്. എന്നാൽ പാലക്കാട് കെഎസ്എഫ് സമ്മേളനത്തിന്റെ സമയത്തെ പിണറായിയുടെ നിലപാട് വച്ചുനോക്കുമ്പോൾ അത്ര വലിയ തോതിലുള്ള നക്സൽ അനുഭാവം പിണറായിയ്ക്കുണ്ടായിരുന്നതായി എനിക്ക് തോന്നിയിട്ടില്ല. അക്കാലത്ത് കണ്ണൂർ ജില്ലയിൽ നിരവധി പേർ നക്സൽ പ്രസ്ഥാനത്തിലേയ്ക്ക് പോയിരുന്നു. തലശ്ശേരി ഭാഗത്ത് നിന്ന് നക്സൽ പ്രസ്ഥാനത്തിലേയ്ക്ക് പോയ സിപിഎമ്മുകാരിലൊരാൾ കെ ബാലകൃഷ്ണൻ ആണ്. ബാലകൃഷ്ണൻ കിസാൻ സഭ ദേശീയ കൗൺസിൽ അംഗമായിരുന്നു. കെ സി നന്ദനൻ, അരയാക്കണ്ടി അച്യുതൻ തുടങ്ങിയവരൊക്കെ നക്സൽ പ്രസ്ഥാനത്തിൽ ആകൃഷ്ടരായിരുന്നു. കെ ബാലകൃഷ്ണൻ ഈയടുത്താണ് മരിച്ചത്.

ശിവദാസ മേനോൻ അടക്കമുള്ള നേതാക്കൾ ഞങ്ങളുമായി സംസാരിച്ചിരുന്നു. ഞങ്ങൾ തലശ്ശേരിക്ക് പോകുന്നതിന് മുൻപ് കെ എസ് എഫ് സമ്മേളനവുമായി ബന്ധപ്പെട്ട് ശിവദാസ മേനോൻ ഞങ്ങളുമായി സംസാരിച്ചിരുന്നു. വിക്ടോറിയ കോളേജിനടുത്ത് നന്ദകുമാർ ലോഡ്ജിൽ വച്ചാണ് സംസാരിച്ചത്. "നിങ്ങൾ റിവിഷനിസ്റ്റ് ആണ്, നിങ്ങൾ ഞങ്ങളെ പഠിപ്പിക്കാൻ വരണ്ട" എന്നൊക്കെ ഞങ്ങൾ ശിവദാസ മേനോനോട് പറഞ്ഞു. അന്ന് പാലക്കാട് ജില്ലയിൽ വിദ്യാർത്ഥി സംഘടനയുടെ ചുമതല ശിവദാസ മേനോനായിരുന്നു. പാലക്കാട് മുൻ എംപി പി കുഞ്ഞന്റെ വീട്ടിൽ വച്ച് അക്കാലത്ത് ഞാനും വൈക്കം വിശ്വനുമായി വലിയ തർക്കമൊക്കെ ഉണ്ടായി. 1964ൽ പാർട്ടി പിളരാനിടയായ സാഹചര്യങ്ങളെക്കുറിച്ചൊക്കെ സംസാരിച്ചാണ് തർക്കിച്ചത്. 1967 കാലത്ത് ഞാനടക്കമുള്ള വിദ്യാർത്ഥികൾക്ക് നക്സൽ അനുഭാവം തുടങ്ങിയ സമയം മുതൽ പിന്തിരിപ്പിക്കാൻ കുഞ്ഞിരാമൻ മാസ്റ്റർ അടക്കമുള്ള പാർട്ടി നേതാക്കൾ ശ്രമിച്ചിരുന്നു. 1967-69 കാലത്ത് ഇമ്പിച്ചിബാവ ഗതാഗത മന്ത്രിയായിരുന്നല്ലോ. അക്കാലത്ത് കെഎസ്ആർടിസിയിൽ ക്ലർക്ക് ജോലി വരെ എനിക്ക് വാഗ്ദാനം ചെയ്തിരുന്നു. എന്നാൽ അന്ന് തലയ്ക്കകത്ത് തീവ്ര വിപ്ലവ ചിന്തകൾ മാത്രമേ ഉണ്ടായിരുന്നുള്ളൂ. "നിങ്ങളൊക്കെ കൈക്കൂലിയുടെ ആളുകളാണ്, എനിക്കത് വേണ്ട" എന്നൊക്കെയാണ് ഞാനന്ന് പറഞ്ഞത്.

പാലക്കാട് കോട്ട മൈതാനത്ത് ഞങ്ങൾ പ്രത്യേക സമ്മേളനമൊക്കെ നടത്തി. ഇഎംഎസ് സർക്കാരും കോൺഗ്രസ് സർക്കാരും ബ്രിട്ടീഷ് സർക്കാരുമൊക്കെ ഒരുപോലെയാണെന്ന് ഞങ്ങൾ വാദിച്ചു. അക്കാലത്ത് പാലക്കാടിന് പുറത്ത് ഫിലിപ്പ് എം പ്രസാദുമായി മാത്രമേ ഞങ്ങൾക്ക് ബന്ധമുണ്ടായിരുന്നുള്ളൂ. കുന്നിക്കൽ നാരായണനൊക്കെ ആ സമയത്ത് പാലക്കാട് ഒരു തവണ വന്നിട്ടുണ്ടെന്ന് തോന്നുന്നു. ചാരു മജുംദാർ എഡിറ്ററായിരുന്ന 'ലിബറേഷൻ' ഒക്കെ ഞങ്ങൾ വരുത്തി വായിച്ചിരുന്നു. പിന്നെ കുന്നിക്കൽ നാരായണൻ ഇറക്കിയിരുന്ന പ്രസിദ്ധീകരണങ്ങൾ. ഫിലിപ്പ് എം പ്രസാദൊക്കെ അക്കാലത്ത് ബംഗാളിൽ പോയി ചാരു മജുംദാറിനെ കണ്ടിട്ടുണ്ട്.

തലശ്ശേരിയിലേയ്ക്ക് പോകുന്ന പാലക്കാട് നിന്നുള്ള സംഘത്തിന്റെ നേതാവ് ഞാനായിരുന്നു. മുണ്ടൂർ രാവുണ്ണി ഡെപ്യൂട്ടി ലീഡറും. എന്നാൽ എവിടേയ്ക്കാണ് പോകുന്നതെന്നൊന്നും ആദ്യം ധാരണയുണ്ടായിരുന്നില്ല - എ എസ് ശിവദാസ് തുറന്നുപറഞ്ഞു. രാവുണ്ണിയും ഞാനുമടക്കം പാലക്കാട് നിന്ന് പതിനെട്ടോളം പേരുണ്ടായിരുന്നു. ട്രെയിനിലാണ് പോയത്. തലശ്ശേരിക്ക് പോകണമെന്ന നിർദ്ദേശപ്രകാരം ഞങ്ങൾ പോയതാണ്. രാവുണ്ണി എന്നോട് ചോദിച്ചു "എവിടേയ്ക്കാ ശിവദാസാ", ഞാൻ പറഞ്ഞു "എനിക്കുമറിയില്ല" എന്ന്. പദ്ധതിയുടെ രഹസ്യസ്വഭാവം കാരണമായിരിക്കണം ഇങ്ങനെ വിവരങ്ങളൊന്നും പറയാതിരുന്നത്. ഏതായാലും ഞങ്ങൾ പൊലീസ് സ്റ്റേഷന്റെ അടുത്തെത്തിയപ്പോളേക്കും ആക്ഷനൊക്കെ കഴിഞ്ഞിരുന്നു. പൊലീസ് സ്റ്റേഷന്റെ മുമ്പിലൊന്നും ഞങ്ങളെത്തിയില്ല. ആളുകളിങ്ങനെ ഓടി വരുന്നുണ്ടായിരുന്നു. അതിന്റെ ബഹളമാണ് കണ്ടത്. അവിടെ കുറേ ആളുകളുണ്ടായിരുന്നു. അതിങ്ങനെ ജാഥയായി പോവുകയാണ് ചെയ്തത്. തിരിച്ചുവരാനുള്ള പൈസയൊന്നും കയ്യിലുണ്ടായിരുന്നില്ല. ആരുടെയൊക്കെയോ സഹായം കൊണ്ട് തിരിച്ചെത്തി.

എന്നാൽ ഞാനടക്കമുള്ള വിദ്യാർത്ഥികളെ അന്ന് പ്രതി ചേർത്തില്ല. വിദ്യാർത്ഥികളെ പ്രതി ചേർക്കേണ്ട എന്ന സമീപനമാണ് അന്നത്തെ ഇഎംഎസ് സർക്കാരിനുണ്ടായിരുന്നത്. എന്നാൽ തലശ്ശേരിയിൽ പോയി വന്ന ശേഷം ഞാൻ ഒളിവിൽ പോയിരുന്നു. ഈ സമയത്ത് വെള്ളത്തൂവൽ സ്റ്റീഫനെ അറിയാമായിരുന്നു. തലശ്ശേരിയിലും പുൽപ്പള്ളിയിലും ഏതാണ്ട് ഒരേ സമയമാണ് പൊലീസ് സ്റ്റേഷനുകൾ ആക്രമിക്കുന്നത്. വർഗീസും അജിതയുമൊക്കെ പുൽപ്പള്ളിയിലാണ് അന്ന്. അതൊക്കെ ഞങ്ങളറിയുന്നത് പിന്നീടാണ്. ഏതായാലും തലശ്ശേരിയിൽ പോയി വന്നപ്പോളേക്ക് തന്നെ എനിക്ക് നക്സലിസം മടുത്ത് തുടങ്ങിയിരുന്നു. ഇന്ത്യൻ സാഹചര്യത്തിൽ ഇത് പ്രായോഗികമല്ല എന്ന് തോന്നി. കോങ്ങാട് സംഭവമൊക്കെ ആയപ്പോളേക്ക് ഫിലിപ്പ് എം പ്രസാദ് ഒക്കെ ജയിലിലായി. തലശ്ശേരി, പുൽപ്പള്ളി ആക്ഷനുകളൊക്കെ കഴിഞ്ഞപ്പോളേക്ക് തന്നെ നക്സൽ പ്രസ്ഥാനത്തിൽ അഭിപ്രായഭിന്നത രൂക്ഷമായിരുന്നു.

1968ൽ കൊച്ചിയിൽ നടന്ന പാർട്ടി സമ്മേളനത്തിന് (സിപിഎമ്മിന്റെ എട്ടാം പാർട്ടി കോൺഗ്രസ് 1968ൽ കൊച്ചിയിലാണ് നടന്നത്) (പാർട്ടി കോൺഗ്രസ് ആണോ പ്രത്യേക സമ്മേളനമാണോ സംസ്ഥാന പ്ലീനമാണോ എന്ന് ശിവദാസ് കൃത്യമായി ഓർക്കുന്നില്ല) പാലക്കാട് നിന്ന് ഒരു സംഘം ബസ്സിൽ കൊച്ചിയിലേയ്ക്ക് തിരിച്ചത് "സായുധ വിപ്ലവം സിന്ദാബാദ്, ചൈനീസ് മാർഗം - നമ്മുടെ മാർഗം" എന്നൊക്കെ മുദ്രാവാക്യം വിളിച്ചായിരുന്നു. ഇത്തരത്തിൽ മുദ്രാവാക്യം വിളിച്ചവരെ പാർട്ടിക്കാർ തന്നെ ബസ് നിർത്തി വഴിയിലിറക്കി വിട്ടു. എറണാകുളത്ത് വച്ച് ഇ എം എസ് വ്യക്തമായി പ്രഖ്യാപിച്ചു - "സിപിഎമ്മിന്റെ മാർഗം ചൈനീസ് മാർഗമല്ല, പാർട്ടി സായുധ വിപ്ലവം ലക്ഷ്യമിടുന്നുമില്ല" എന്ന്. അതോട് കൂടി പൊട്ടിത്തെറിയുണ്ടായി. നക്സൽ അനുകൂലികളുടെ വഴിപിരിയൽ പൂർണമാവുകയും ചെയ്തു. പാലക്കാട് ഒരു വാച്ച് മേക്കർ രാമേട്ടൻ ഉണ്ടായിരുന്നു. ഞങ്ങളെയൊക്കെ സഹായിച്ച ആളാണ്. സായുധ വിപ്ലവ ലൈനിനെ അനുകൂലിച്ചിരുന്ന രാമേട്ടനെയൊക്കെ അന്ന് ബസ്സിൽ നിന്ന് ഇറക്കിവിട്ടിരുന്നു.

പഴയ നക്സൽ സംഘത്തിലെ ആരുമായും ഇന്ന് തനിക്ക് ബന്ധമില്ല എന്ന് ശിവദാസ് പറയുന്നു. കോങ്ങാട് കേസിലെ പ്രതികളിൽ രാവുണ്ണിയും ഭാസ്കരനുമൊഴികെയുള്ളവർ ജീവിച്ചിരിപ്പില്ല എന്നാണ് ശിവദാസ് കരുതുന്നത്. മുണ്ടൂർ ഭാഗത്ത് കുമാരൻ എന്നൊരാളൊക്കെ ഉണ്ടായിരുന്നു. ഭാസ്കരൻ പിന്നീട് കോൺട്രാക്ടറായൊക്കെ പ്രവർത്തിച്ചിരുന്നതായി കേട്ടിരുന്നു. പാലക്കാട് റെൽവേ കോളനി ഭാഗത്താണ് ഭാസ്കരൻ താമസിച്ചിരുന്നത് എന്നാണ് കേട്ടിട്ടുള്ളത്. അതേസമയം ഭാസ്കരനൊപ്പം ജയിൽ ചാടി പിന്നീട് അറസ്റ്റ് ചെയ്യപ്പെട്ട മുരളിയെക്കുറിച്ച് തനിക്ക് അറിയില്ല എന്നും ശിവദാസ് പറഞ്ഞു. 1971ൽ മുണ്ടൂർ രാവുണ്ണിയും ഭാസ്കരനും മുരളിയും അടക്കമുള്ളവർ വിയ്യൂർ സെൻട്രൽ ജയിലിൽ നിന്ന് ചാടിയിരുന്നു. ഭാസ്കരനെ പാലക്കാട് ജില്ലയിലെ വാണിയംകുളത്ത് നിന്നും മുരളിയെ തൃശ്ശൂർ ജില്ലയിലെ ആറ്റൂരിൽ നിന്നും പൊലീസ് വീണ്ടും അറസ്റ്റ് ചെയ്തത് 1971 ജൂണിലാണ്.

പൂച്ചിറ ഹംസ എന്ന് പറയുന്ന പ്രതിയെ അറസ്റ്റ് ചെയ്തപ്പോളാണ് എനിക്ക് കേസുമായി ബന്ധമില്ല എന്ന് പൊലീസിന് ബോധ്യമായത് എന്ന് ശിവദാസ് പറയുന്നു. ഹംസയെക്കുറിച്ച് ഞാനന്നാണ് ആദ്യമായി കേട്ടത്. പുതുപ്പരിയാരം ഭാഗത്താണ് ഹംസ താമസിച്ചിരുന്നത് എന്ന് കേട്ടിട്ടുണ്ട്. കിട്ടിയവരെ പിടിക്കുക എന്ന നിലയ്ക്കാണ് എന്നെ കസ്റ്റഡിയിലെടുത്തത്. വാസ്തവത്തിൽ കൊല്ലപ്പെട്ട നാരായണൻ കുട്ടി നായരേക്കാൾ അക്കാലത്ത് നാട്ടിൽ അറിയപ്പെട്ടിരുന്നത് അദ്ദേത്തിന്റെ ജ്യേഷ്ഠനായിരുന്ന ചിന്നക്കുട്ടൻ നായരായിരുന്നു. ഐ ജി വിഎൻ രാജന്റെ ഭാര്യാപിതാവ്. നാരായണൻ കുട്ടി നായരെക്കുറിച്ച് ഞാൻ കേട്ടത് അയാൾ കൊല്ലപ്പെട്ട ശേഷമാണ്. കോങ്ങാട് കേസിലെ പ്രതി മാണിക്യം നായർ ഈയടുത്ത് മരിച്ചപ്പോൾ, തലശ്ശേരി, പുൽപ്പള്ളി ആക്ഷനുകളിലൊക്കെ പങ്കെടുത്തയാൾ എന്നൊക്കെ പറഞ്ഞിരുന്നു. ഇത് വാസ്തവമല്ല. മാണിക്യം നായർ അന്ന് അങ്ങോട്ടൊന്നും പോയിട്ടില്ല.

ഞാൻ പറളി പഞ്ചായത്ത് അംഗമായിരുന്നു. അന്ന് ഒരു സിനിമാ തീയറ്ററിന്റെ തട്ടിപ്പുമായി ബന്ധപ്പെട്ട പ്രശ്നം ഞാനടക്കമുള്ളവർ ഉന്നയിച്ചിരുന്നു. കള്ള സീലും മറ്റും ഉപയോഗിച്ച് നടത്തുകയായിരുന്നു അവർ. എന്നാൽ സിപിഎം നേതാക്കൾ ഇത് അംഗീകരിച്ചില്ല. ഈ പ്രശ്നവുമായി ബന്ധപ്പെട്ട അഭിപ്രായ വ്യത്യാസത്തിലാണ് 1983ൽ സിപിഎമ്മുമായി അകന്നതും സിപിഐയിൽ ചേർന്നതും. പാലക്കാട് ജില്ലയിലെ കമ്മ്യൂണിസ്റ്റ് പാർട്ടിയുടെ ആദ്യ സമ്മേളനത്തിൽ പങ്കെടുത്ത സഖാവ് അയ്യപ്പേട്ടനും അന്ന് പറളി പഞ്ചായത്ത് അംഗമാണ്. അദ്ദേഹവും അന്ന് ഞങ്ങൾക്കൊപ്പം നിന്നിരുന്നു. അന്ന് സിപിഐ ജില്ലാ സെക്രട്ടറിയായിരുന്ന വി ചാമുണ്ണിയാണ് എന്നോട് സിപിഐയിലേയ്ക്ക് വരാൻ പറഞ്ഞത്. പിന്നീട് പഞ്ചായത്ത് തിരഞ്ഞെടുപ്പിൽ കോൺഗ്രസ്സിന്റേയും സിപിഎമ്മിന്റേയും സ്ഥാനാർത്ഥികളെ തോൽപ്പിച്ചാണ് ഞാൻ മെംബറായത്. അന്ന് പിടിച്ചെടുത്ത ആ വാർഡ് ഇപ്പോളും സിപിഐയുടെ കയ്യിലാണ്. ഞാൻ പിന്നീട് സിപിഐ ജില്ലാ എക്സിക്യൂട്ടീവ് അംഗമായി - ശിവദാസ് പറഞ്ഞു.




സുജയ് രാധാകൃഷ്ണൻ

സുജയ് രാധാകൃഷ്ണൻ

ചീഫ് സബ്‌ എഡിറ്റര്‍

Next Story

Related Stories