TopTop

എഴുത്തുകാര്‍ ആദരിക്കപ്പെട്ടാല്‍ മാത്രം അവരുടെ കൃതികള്‍ വായിക്കാം എന്ന് കരുതുന്ന വായനക്കാരാണ് മലയാളത്തില്‍ അധികവും- എന്‍ പ്രഭാകരന്‍

എഴുത്തുകാര്‍ ആദരിക്കപ്പെട്ടാല്‍ മാത്രം അവരുടെ കൃതികള്‍ വായിക്കാം എന്ന് കരുതുന്ന വായനക്കാരാണ് മലയാളത്തില്‍ അധികവും- എന്‍ പ്രഭാകരന്‍

എഴുത്തിന്റെ രാഷ്ട്രീയ സാധ്യതകളെ കണ്ടെത്തിയ എഴുത്തുകാരനാണ് എന്‍ പ്രഭാകരന്‍. കഥകളിലൂടെയും കവിതയിലൂടെയും നോവലുകളിലൂടെയും വായനക്കാരുമായി ശക്തമായ രാഷ്ട്രീയ സംവേദനം നടത്തിയ എഴുത്തുകാരന്‍. 'മായാമനുഷ്യന്‍' എന്ന നോവലിന് ഓടക്കുഴല്‍ അവാര്‍ഡ് ലഭിച്ചതിനുശേഷം ഇപ്പോള്‍ അദ്ദേഹത്തിന്റെ 'ഒരു മലയാളി ഭ്രാന്തന്റെ ഡയറി' എന്ന കൃതിയുടെ വിവര്‍ത്തനത്തിന് ക്രോസ് വേര്‍ഡ് അവാര്‍ഡും ലഭിച്ചിരിക്കുകയാണ്. വായനയുടേയും എഴുത്തിന്റേയും രാഷ്ട്രീയ സാധ്യതകളെ കുറിച്ചും. വായനയുടെ സാമൂഹിക പശ്ചാത്തലത്തെ കുറിച്ചും എന്‍. പ്രഭാകരന്‍ സംസാരിക്കുന്നു.

ക്രോസ് വേര്‍ഡ് അവാര്‍ഡ്

പ്രധാനപ്പെട്ട ഒന്നായി എഴുത്തുലോകം പരിഗണിക്കുന്ന ഒന്നാണിത്. അതില്‍ സന്തോഷമുണ്ട്. ജയശ്രീ കളത്തില്‍ ഇത് നല്ലരീതിയില്‍ വിവര്‍ത്തനം ചെയ്തിട്ടുണ്ട്. അവാര്‍ഡ് ലഭിക്കുന്നതിന് മുന്‍പുതന്നെ ഇത് വായിക്കപ്പെട്ടിരുന്നു. ചിത്രത്തിലെ ഭാഗ്യനാഥ് ചെയ്ത ഇല്ലസ്‌ട്രേഷന്‍സ് ശ്രദ്ധിക്കപ്പെട്ടിരുന്നു. വളരെ സന്തോഷം തരുന്ന ഒന്നാണിത്.



വിവര്‍ത്തനം മലയാള കൃതിയ്ക്ക് ആഗോളതലത്തില്‍ ഇടം ഒരുക്കുന്നു

മലയാളത്തില്‍ ഇറങ്ങുമ്പോള്‍ കൂടുതലായി വായിക്കപ്പെടുന്നത് കേരളത്തില്‍ തന്നെയാണ്. ലോകത്തിന്റെ പലഭാഗത്തുള്ള മലയാളികളിലേക്കും ഇത് എത്തിപ്പെടാം. എന്നാല്‍ ഇംഗ്ലീഷിലേക്ക് വിവര്‍ത്തനം ചെയ്യപ്പെട്ടതോടുകൂടി ഇത് മറ്റിടങ്ങളിലെ വായനക്കാരിലേക്കുകൂടി എത്തിപ്പെട്ടു. ഇന്ത്യയിലെ പലഭാഗത്തുള്ളവരും വിവര്‍ത്തന കൃതി വായിച്ച് പ്രതികരിച്ചിരുന്നു. ഇത് വിവര്‍ത്തനത്തിലൂടെ മാത്രം സാധ്യമായ ഒന്നാണ്.

മലയാളത്തിലെ വായനക്കാര്‍

എഴുത്തുകാര്‍ ഏതെങ്കിലും തരത്തില്‍ ആദരിക്കപ്പെട്ടാല്‍ അവരുടെ കൃതികള്‍ വായിക്കാം എന്ന് കരുതുന്ന ഒരു വലിയ സമൂഹം വായനക്കാരാണ് മലയാളത്തില്‍ ഉള്ളത്. വൈകാരികമായും ധൈഷണികമായും ഉല്‍ക്കൊണ്ടുള്ള വായന ഭൂരിഭാഗം ആളുകളിലും നടക്കുന്നില്ല. സംവാദപരമായ വായനയാണ് ഇവിടെയുണ്ടാവേണ്ടത്. എല്ലാവരും നല്ലത് പറഞ്ഞാല്‍ ഞാനും നല്ലത് പറഞ്ഞ് പോരാം എന്നാണ് പലരും കരുതുന്നത്. ഇതില്‍നിന്ന് മാറി വളരെ സത്യസന്ധതയും ജാഗ്രതയുമുള്ള വായനയാണ് ഉണ്ടാവേണ്ടത്. പറയുന്ന വിഷയം കൃതി എത്രത്തോളം ആവിഷ്‌കരിക്കാന്‍ ശ്രമിച്ചു എന്ന അന്വേഷണമാണ് വായനക്കാരില്‍നിന്ന് ഉണ്ടാവേണ്ടത്. ഇത്തരത്തിലുള്ള വായനക്കാര്‍ കേരളത്തില്‍ വളരെ കുറവാണ്.

എഴുത്തിലെ സാമൂഹിക ഇടപെടലുകള്‍

മലയാളത്തിലെന്നല്ല ലോകത്തില്‍തന്നെ ഏറ്റവും കൂടുതല്‍ ആളുകള്‍ വൈകാരികമായ എഴുത്തുകളെയാണ് ഇഷ്ടപ്പെടുന്നത്. അതിനാണ് കൂടുതല്‍ വായനക്കാരുള്ളത്. എന്നാല്‍ പ്രത്യേക രാഷ്ട്രീയ സാഹചര്യങ്ങളില്‍ രാഷ്ട്രീയപരമായ ജാഗ്രതയാണ് എഴുത്തില്‍ ഉണ്ടാവേണ്ടത്. അപ്പോള്‍ അതിന്റെ രൂപത്തിലോ, ബിംബവത്കരണത്തിലോ അല്ല നമ്മള്‍ ഊന്നല്‍ നല്‍കേണ്ടത്.

പൗരത്വ ഭേദഗതി നിയമ കാലത്തെ എഴുത്ത്

എഴുത്ത് ലോകം പ്രതിരോധവും പ്രതിഷേധവും തീര്‍ക്കുന്നുണ്ട്. ശക്തമായ രീതിയിലുള്ള എഴുത്തുകള്‍ രൂപപ്പെടുന്നുണ്ട് എന്നാണ് തോന്നിയിട്ടുള്ളത്. എന്നാല്‍ കേരളത്തിന് പുറത്തുള്ള വിദ്യാര്‍ത്ഥികളും യുവാക്കളും ഇതിനെതിരെ വന്‍ പ്രതിഷേധങ്ങള്‍ നടത്തുകയും, അറസ്റ്റ് ചെയ്യപ്പെടുകയും ചെയ്യുന്നു. എന്നാല്‍ കേരളത്തില്‍ ഇത്തരമൊരു അവസ്ഥയല്ല ഉള്ളത്. സാമൂഹിക ഉത്തരവാദിത്വങ്ങള്‍ ഏറ്റെടുക്കാന്‍ പൊതുവെ മലയാളികള്‍ക്ക് മടിയാണ്. ഇതിന് മാറ്റമുണ്ടാവണം. സാമൂഹികമായ ജാഗ്രത എല്ലാവരിലും രൂപപ്പെടണം.


Next Story

Related Stories