TopTop
Begin typing your search above and press return to search.

ദുര്‍വിധി ബാധിതനായ കവി, രാഗോന്മാദ തീരങ്ങള്‍പോലെ എഴുത്തുകള്‍; നവംബര്‍ അപഹരിച്ച ഡിലന്‍ തോമസ്

ദുര്‍വിധി ബാധിതനായ കവി, രാഗോന്മാദ തീരങ്ങള്‍പോലെ എഴുത്തുകള്‍; നവംബര്‍ അപഹരിച്ച ഡിലന്‍ തോമസ്
''In my craft or sullen art Exercised in the still night When only the moon rages And the lovers lie abed With all their griefs in their arms I labour by singing light Not for ambition or bread Or the strut and trade of charms on the ivory stages But for the common wages Of their most secret heart.'' (My Craft or Sullen Art-Dylan Thomas) ഡിലന്‍ തോമസ്. ദുര്‍വിധി ബാധിതനായ കവി( doomed poet). വിസ്‌കി...

ഇത് പോലുള്ള മികച്ച ഫീച്ചറുകള്‍, ലേഖനങ്ങള്‍, അന്വേഷണാത്മക റിപ്പോര്‍ട്ടുകള്‍, അഭിമുഖങ്ങള്‍ എന്നിവ സാധ്യമാവണമെങ്കില്‍ നിങ്ങളുടെ പിന്തുണ കൂടിയേ തീരൂ. അഴിമുഖം പ്ലസിന്റെ വരിക്കാരാകൂ.

നിര്‍ഭയ മാധ്യമപ്രവര്‍ത്തനത്തെ പിന്തുണയ്ക്കൂ

Support Azhimukham >


''In my craft or sullen art
Exercised in the still night
When only the moon rages
And the lovers lie abed
With all their griefs in their arms
I labour by singing light
Not for ambition or bread
Or the strut and trade of charms on the ivory stages
But for the common wages
Of their most secret heart.'' (My Craft or Sullen Art-Dylan Thomas)

ഡിലന്‍ തോമസ്. ദുര്‍വിധി ബാധിതനായ കവി( doomed poet). വിസ്‌കി കുടിയ്ക്കുന്നതുപോലെ വാക്കുകള്‍ നുണഞ്ഞുകൊണ്ടേയിരുന്ന എഴുത്തുകാരന്‍. മുഴങ്ങുന്ന വാക്കുകള്‍ക്കായി, വാക്കുകള്‍ക്കുള്ളില്‍ ഒളിഞ്ഞിരിക്കുന്ന ഗീതത്തിനായി അവ നിരന്തരം പാനം ചെയ്ത കവി. മദ്യപിച്ചും മദിച്ചും ശബ്ദപ്പെരുപ്പങ്ങളില്‍ നിരന്തരം ആണ്ടുപോയ ആള്‍. വാക്കുകളുടെ ഹൃദയം തേടി പ്രതിഭയുടെ നിഗൂഢകാലങ്ങളിലേക്കു യാത്രയായ നിത്യസഞ്ചാരി. അതിനാവാതെ വന്നപ്പോഴൊക്കെ അപസ്മാരബാധിതനെപ്പോലെ കാലുകള്‍ പിണച്ചു, കൈയുകള്‍ നീട്ടി, ഇരിപ്പിടങ്ങളില്‍ മുട്ടിവീണു പിടഞ്ഞു, വാക്കുകളുമായി യുദ്ധം ചെയ്തു. ബാധയേറ്റവനെപ്പോലെ നിരന്തരം വരികളും വാക്കുകളും തിരുത്തി എഴുതിക്കൊണ്ടേയിരുന്നു ജീവിത കാമനകളുടെ ഈ ശൈലീവല്ലഭന്‍.

വല്ലാതെ നിഗൂഢതകളാല്‍ സമ്പന്നമായ ജീവിതമായിരുന്നു ഡിലന്‍ തോമസിന്റേത്. എഴുത്തും മരണവും ഒക്കെ അങ്ങനെ തന്നെ. പ്രാഥമികമായി താന്‍ ഒരു വെയില്‍സ് കാരനാണ്. മദ്യപാനി. മനുഷ്യവംശത്തിന്റെ നിത്യാനുരാഗി, വിശേഷിച്ചും സ്ത്രീകളുടെ. (''One: I am a Welshman; two: I am a drunkard; three: I am a lover of the human race, especially of women.'') 1947ല്‍ റോമില്‍ അദ്ദേഹം പ്രഭാഷണ മധ്യെ കുറച്ച് തമാശയായും അതിലേറെ ഗൗരവത്തോടേയും പറഞ്ഞ കാര്യമാണിത്. അനുഭവങ്ങള്‍ ഒരിക്കലും മടുപ്പിച്ചിട്ടില്ലാത്ത ഡിലന്‍ അവയ്ക്കിടയിലൂടെ ഭൂതാവിഷ്ടനായി നടന്നു.

സ്വാന്‍സി കടല്‍പ്പുറം അദ്ദേഹത്തിന്റെ ലോകമായിരുന്നു. മല കടലിലേക്ക് ഇറങ്ങിവരുന്ന സ്വാന്‍ സി തീരം അദ്ദേഹത്തെ മോഹാവേശിതനാക്കി. ആ കടല്‍ത്തീര പട്ടണത്തെ ചുറ്റിപ്പറ്റിയാണ് ഡിലന്‍ മര്‍ലിയാസ് തോമസിന്റെ പ്രതിഭ പറന്നു തുടങ്ങിയത്. ഡിലന്‍ എന്ന വാക്കിന് കടലിന്റെ പുത്രന്‍ എന്നുകൂടി അര്‍ത്ഥമുണ്ടായിരുന്നു. ജീവിതത്തിന്റെ ആദ്യ 23 വര്‍ഷങ്ങള്‍ അതിസുന്ദരമായ ആ കടല്‍ത്തീര പട്ടണത്തില്‍ അദ്ദേഹം കഴിഞ്ഞു. ഡിലന്‍ തോമസിന്റെ കവിതകളിലെമ്പാടും കടല്‍ബിംബങ്ങള്‍ കാണാം. 'This sea town was my world.' അദ്ദേഹം എഴുതി. സ്വാന്‍ സീയിലേയും ഗോവറിലേയും മറ്റും കടല്‍ക്കാഴ്ചകള്‍ അദ്ദേഹത്തിനു പ്രീയപ്പെട്ടതായിരുന്നു. വെയില്‍സിന്റെ സാമ്പ്രദായികതകളോട് കലഹിച്ചുകൊണ്ടായിരുന്നു ഡിലന്റെ ജീവിതം. മദ്യവും സിഗററ്റും രതിയും പോലെ വിലക്കപ്പെട്ട ആനന്ദങ്ങള്‍ അദ്ദേഹത്തിന് തീര്‍ത്ഥങ്ങളായി. നൈമിഷികാനന്ദങ്ങള്‍, നൈമിഷകങ്ങളായ തീരുമാനങ്ങള്‍...

ആ തീര്‍ത്ഥങ്ങളും പ്രാസാദങ്ങളും ഏറ്റു തിടംവെച്ച ജീവിതത്തിന് ഏറെ ദൈര്‍ഘ്യമുണ്ടായില്ല. 39 വര്‍ഷങ്ങള്‍. ഒന്‍പത് കവിതാ സമാഹാരങ്ങള്‍, ഒരു നോവലും ചെറുകഥകളും അടക്കം പത്തോളം ഗദ്യ പുസ്തകങ്ങള്‍, കത്തുകളുടെ രണ്ട് സമാഹാര ഗ്രന്ഥങ്ങള്‍, തിരരൂപങ്ങള്‍, ബിബിസിക്കായി തയാറാക്കിയ ബ്രോഡ്കാസ്റ്റുകള്‍...ഇങ്ങനെ പോകുന്നു ക്ഷണഭംഗുരമായ ആ ജീവിതം കാലത്തിനായി ബാക്കിവെച്ച് മടങ്ങിയവയുടെ പട്ടിക. തികച്ചും സങ്കീര്‍ണ്ണമായിരുന്നു ഡിലന്റെ വ്യക്തിത്വം. എഴുത്തുകാരനൊപ്പം നടനും സംവിധായകനുമൊക്കെയായിരുന്ന അദ്ദേഹം പലപ്പോഴും ശബ്ദമുയര്‍ത്തി സംസാരിക്കുകയും ആള്‍കൂട്ടങ്ങളുടെ ശ്രദ്ധ തന്നിലേക്ക് ആകര്‍ഷിക്കാന്‍ ശ്രമിക്കുകയും ചെയ്തു. പക്ഷെ അതിലേറെ അദ്ദേഹം തികഞ്ഞ അന്തര്‍മുഖനായി ഉള്ളിലേക്ക് സഞ്ചരിച്ചുകൊണ്ടേയിരുന്നുവെന്നതാണ് വാസ്തവം.

കവിതാ സമാഹാര ഗ്രന്ഥത്തിന്റെ മുഖവുരയില്‍ ഡിലന്‍ തോമസ് ഇങ്ങനെ സ്വയം നിര്‍വചിക്കുന്നുണ്ട്:

''I read somewhere of a shepherd who, when asked why he made, from within fairy rings, ritual observances to the moon to protect his flocks, replied: 'I'd be a damn' fool if I didn't!' These poems, with all their crudities, doubts, and confusions, are written for the love of Man and in praise of God, and I'd be a damn' fool if they weren't.''

ഇത് അദ്ദേഹത്തിന്റെ രചനാ പ്രപഞ്ചത്തെകുറിച്ചുള്ള താക്കോല്‍ വാചകമാകുന്നു, ജീവിതത്തെക്കുറിച്ചും. വളരെ ചെറുപ്പത്തിലേ ഡിലന്‍ തോമസ് എഴുതിത്തുടങ്ങി. എഴുത്തുകാരനാകാന്‍ നിശ്ചയിച്ചുറപ്പിച്ച് എങ്ങുമെത്താതെ പോയ, ഒരു പരാജിതനായ എഴുത്തുകാരന്റെ പുത്രനായിരുന്നു ഡിലന്‍. പേരുകേട്ട ഭാഷാധ്യാപകന്‍ കൂടിയായ പിതാവ് ഡേവിഡ് ജോണ്‍ തോമസ് മകനെ ഭാഷയുടെ ഗുപ്തസൗന്ദര്യങ്ങളിലേക്ക് ചെറുപ്പത്തിലെ തന്നെ കൈപിടിച്ചു. കൗമാരക്കാലത്തുതന്നെ ഡിലന്റെ കവിതകള്‍ പ്രസിദ്ധീകൃതമായി. 'And death shall have no dominion' പോലുള്ള കവിതകള്‍ അദ്ദേഹത്തെ പെട്ടന്ന് ശ്രദ്ധേയനാക്കി. മരണവും ലോകജീവിതവും അതിനോടുള്ള അഭിനിവേശവുമൊക്കെ അതില്‍ കെട്ടുപിണഞ്ഞു,

''And death shall have no dominion.
Dead men naked they shall be one
With the man in the wind and the west moon;
When their bones are picked clean and the clean bones gone,
They shall have stars at elbow and foot;
Though they go mad they shall be sane,
Though they sink through the sea they shall rise again
Though lovers be lost love shall not;
And death shall have no dominion.''

ടി.എസ്. എലിയട്ടും സ്റ്റീഫന്‍ സ്‌പെന്‍ഡറും പോലുള്ള മുതിര്‍ന്ന കവികളുടെ ശ്രദ്ധയ്ക്കു പാത്രമായ ഡിലന്‍ തോമസ് തന്റെ ഇരുപതാമത്തെ വയസ്സില്‍, 1934 ല്‍ ആദ്യ കവിതാസമാഹാരം പുറത്തിറക്കി. 18 കവിതകള്‍ എന്ന ശീര്‍ഷകത്തില്‍. (ബാലചന്ദ്രന്‍ ചുള്ളിക്കാടിന്റെ ആദ്യകവിതാ സമാഹരത്തിന്റെ ശീര്‍ഷകവും ഇതുതന്നെയെന്നത് കൗതുകത്തോടെ ഓര്‍മ്മവരുന്നു. അദ്ദേഹത്തിന്റെ 23-ാം വയസ്സിലായിരുന്നു ആ സമാഹാരം പുറത്ത് വന്നത്.) ആദ്യ പുസ്തകത്തോടെ തന്നെ ലണ്ടനിലെ കവിത പ്രണയികള്‍ക്കിടയില്‍ ഡിലന്‍ തോമസ് പ്രശസ്തനായി.

രണ്ടു മഹായുദ്ധങ്ങളുടെ ഇടയിലുള്ള കാലത്താണ് ഡിലന്‍ തോമസ് എന്ന എഴുത്തുകാരന്റെ യൗവ്വനം. യുദ്ധ വിരുദ്ധ പ്രസ്ഥാനങ്ങളുമായി ബന്ധപ്പെട്ട് പ്രവര്‍ത്തിച്ച അദ്ദേഹം വ്യക്തമായ രാഷ്ട്രീയ നിലപാടുകള്‍ വച്ചുപുലര്‍ത്തിയിരുന്നു. സമാധാന പ്രസ്ഥാനക്കാരനും ഫാസിസ്റ്റ് വിരുദ്ധ കൂട്ടായ്മകളുടെ ഭാഗവുമായിരുന്ന ഡിലന്‍ തോമസ് കമ്യൂണിസ്റ്റുകളുമായി അടുത്ത ബന്ധം പുലര്‍ത്തി. യുദ്ധവിരുദ്ധ സമരങ്ങളുടെ ഭാഗമായി തെരുവിലിറങ്ങുകയും പ്രക്ഷോഭങ്ങളുടെ ഭാഗമാകുകയും ഒക്കെ ചെയ്തിട്ടുണ്ട്. 1937ല്‍ കൈറ്റലിന്‍ മക്‌നമാറ ഡിലന്റെ ജീവിതസഖിയായി. തീവ്രാവേശഭരിതമായി ജീവിച്ച ഈ ചെറുപ്പക്കാരന്റെ ആരോഗ്യം പക്ഷെ തീര്‍ത്തും ദുര്‍ബലമായിരുന്നു. കാസരോഗം വളരെ ചെറുപ്പത്തിലേ തന്നെ അലോസരപ്പെടുത്താന്‍ തുടങ്ങിയിരുന്നു.

ദുര്‍ബല ശരീരനായ ഡിലന്‍ തോമസിന് രണ്ടാം ലോകമഹായുദ്ധകാലത്ത് സൈനിക സേവനത്തിനു അവസരം ലഭിച്ചില്ല. ശക്തമായ ചുമയും കഫക്കെട്ടും. ചുമച്ചുചുമച്ച് പലപ്പോഴും രക്തം തുപ്പാറുണ്ടായിരുന്നു. എഴുത്തുകാരായ ചങ്ങാതിമാരൊക്കെ സൈനിക സേവനത്തിനു പോയ സമയത്തും അദ്ദേഹം കടുത്ത ഏകാന്തതയിലും പലപ്പോഴും ദാരിദ്ര്യത്തിലുമായി. ബിബിസിയിലും മറ്റും താല്‍ക്കാലിക ജോലികള്‍ ചെയ്തായിരുന്നു ജീവിതം മുന്നോട്ടുകൊണ്ടുപോയിരുന്നത്. കടുത്ത മദ്യപാനം ജീവിതത്തിന്റെ താളം തെറ്റിച്ചു. സ്ഥിരവരുമാനമില്ലാത്തത് ഓരോ ഘട്ടത്തിലും വിഷമതകള്‍ സമ്മാനിച്ചുകൊണ്ടിരുന്നു. 1941 ഫെബ്രുവരിയില്‍ ഡിലന്റെ പ്രീയ സ്വാന്‍ സി ബോംബാക്രമണത്തിനിരയായി. അവിടത്തെ ചത്വരങ്ങള്‍ പൊടിഞ്ഞുകൂടുന്നത് അദ്ദേഹം കണ്ടു. 'Our Swansea is dead'. ഡിലന്‍ എഴുതി.

1939 ല്‍ പ്രണയഭൂപടം (The Map of Love) എന്ന സമാഹാര ഗ്രന്ഥവും 1940ല്‍ Portrait of the Artist as a Young Dog എന്ന പുസ്തകവും പുറത്തുവന്നു. പിന്നീട് അദ്ദേഹം ബിബിസിയുടെ പല ഡോക്യുമെന്ററി പ്രോജക്ടുകളുടേയും ഫിലിം പ്രോജക്ടുകളുടേയും ഭാഗമായി. പക്ഷെ സാമ്പ്രദായിക ചിട്ടവട്ടങ്ങള്‍ക്കും മറ്റും അടിപ്പെടാത്ത ഡിലന്റെ ജീവിതം അദ്ദേഹത്തിന്റെ വൈവാഹിക ബന്ധത്തിലും വിള്ളലുകള്‍ വീഴ്ത്തി. പമേല ഗ്ലെന്‍ഡ്‌വര്‍ അടക്കം നിരവധി സ്ത്രീകളുമായി ഡിലനുണ്ടായിരുന്ന ചങ്ങാത്തങ്ങളായിരുന്നു കാരണം. 1946ല്‍ പുറത്തുവന്ന Deaths and Entrances എന്ന പുസ്തകം അദ്ദേഹത്തിന്റെ എഴുത്തുജീവിതത്തിലെ വഴിത്തിരിവായിരുന്നു. വലിയ എഴുത്തുകാരന്‍ എന്ന ഖ്യാതി ഇതോടെ ഡിലന്‍ തോമസിനെ തേടിയെത്തി. ചിലിയും ഇറ്റലിയും അമേരിക്കയുമൊക്കെ സന്ദര്‍ശിക്കാന്‍ അവസരം ലഭിച്ചു.

1950ല്‍ അമേരിക്കന്‍ കവിയായ ജോണ്‍ ബ്രിനിനാണ് ഡിലനെ ആ നാട്ടിലേക്ക് സന്ദര്‍ശനത്തിനായി ക്ഷണിച്ചത്. മൂന്നു മാസങ്ങള്‍ നീണ്ടതായിരുന്നു ആദ്യ അമേരിക്കന്‍ സന്ദര്‍ശനം. കവി എന്ന നിലയില്‍ അദ്ദേഹം അക്കാലമായപ്പോഴേക്കും ലോക ശ്രദ്ധയില്‍ എത്തിയിരുന്നു. 1952ലും 53ലും ഡിലന്‍ അമേരിക്ക സന്ദര്‍ശിച്ചു. 53ലെ സന്ദര്‍ശന കാലത്ത് ഇതുപോലെ ഒരു നവംബറിലായിരുന്നു ഡിലന്റെ അന്ത്യം. ഒരു നവംബര്‍ ഒന്‍പതിന്. അമിതമായ മദ്യാപാനമായിരുന്നു മരണകാരണമെന്ന ശ്രുതികള്‍ അക്കാലത്തേ പരന്നിരുന്നുവെങ്കിലും കാസരോഗവും പ്രമേഹവും മദ്യപാനവും ഒക്കെ ചേര്‍ന്ന സങ്കീര്‍ണാവസ്ഥയാണ് മരണത്തിലേക്ക് വഴിവെച്ചത്.

കവിതാ വായനയ്ക്കും പ്രഭാഷണ പര്യടനത്തിനുമായി 1953 ഒക്ടോബര്‍ 20നായിരുന്നു ഡിലന്‍ തോമസ് ന്യൂയോര്‍ക്കില്‍ എത്തിയത്. കാസരോഗവും മറ്റും അദ്ദേഹത്തെ വല്ലാതെ ശല്യപ്പെടുത്തിയിരുന്നതിനാല്‍ തികച്ചും വിഷാദവാനായിരുന്നു. നിരന്തരം ഇന്‍ഹേലര്‍ ഉപയോഗിക്കേണ്ടിവന്നിരുന്നു. ഇടയ്ക്കിടെ തലചുറ്റലും മറ്റും പ്രയാസമുണ്ടാക്കി. ഒക്ടോബര്‍ 27ന് അദ്ദേഹം തന്റെ 39 മത്തെ ജന്മദിനവും ന്യുയോര്‍ക്കിലാണ് ആഘോഷിച്ചത്. നവംബര്‍ മൂന്ന്, നാല് തിയതികളില്‍ അദ്ദേഹം കടുത്ത മദ്യപാനത്തിലായിരുന്നു. നാലാം തിയതി രോഗം മൂര്‍ച്ഛിച്ച് ആശുപത്രിയില്‍ പ്രവേശിപ്പിക്കപ്പെട്ടു. ഒന്‍പതിന് ക്ഷണഭംഗുരമായ ആ ജീവിതത്തിന് അവസാനമായി.

പ്രസ്ഥാനങ്ങളില്‍ ഒതുങ്ങാതെ പോയ എഴുത്തുകാരന്‍

കവിതയും സാഹിത്യവും പോരാട്ടങ്ങളുടേയും സൈദ്ധാന്തിക ധാരകളുടേയും നടുവില്‍പ്പെട്ട കാലത്താണ് എഴുത്തില്‍ നിറഞ്ഞുനിന്നതെങ്കിലും ഏതെങ്കിലും സാഹിത്യപ്രസ്ഥാനങ്ങളോടോ സ്‌കൂളുകളോടോ അമിതമായ മമതയൊന്നും പുലര്‍ത്താന്‍ ഡിലന്‍ തോമസ് ഇഷ്ടപ്പെട്ടില്ല. മനസ്സുകൊണ്ട് അദ്ദേഹം റാഡിക്കല്‍ ലെഫ്റ്റായിരുന്നു. എന്നിരുന്നാലും പോരാട്ട കതിവകളിലായിരുന്നില്ല അദ്ദേഹത്തിന്റെ മനസ്സ്. എഴുത്തിലെ ഒരു സ്കൂളുകളോടും ചേര്‍ന്ന് പേര് എഴുതിവെയ്ക്കുന്നത് ഡിലന് അത്ര പഥ്യമായി തോന്നിയില്ല. സാഹിത്യത്തിലെ ഒരു പ്രസ്ഥാനങ്ങളോടും പൂര്‍ണ്ണമായും ചേര്‍ന്നു നില്‍ക്കാന്‍ ഇഷ്ടപ്പെടാത്തതിനാല്‍ അദ്ദേഹത്തെ എവിടെ അടയാളപ്പെടുത്തുമെന്ന കാര്യത്തില്‍ കാവ്യ ചരിത്രകാരന്മാര്‍ ഭിന്നാഭിപ്രായക്കാരാണ് എക്കാലത്തും.

കവിതയില്‍ ഇരുപതാം നൂറ്റാണ്ടിന്റെ പ്രാഹ്നത്തില്‍ ജീവത്താര്‍ന്ന സിംബലിസവും സര്‍റിയലിസവും എഴുത്തുകാരില്‍ വലിയ സ്വാധീനതകള്‍ സൃഷ്ടിച്ചിരുന്നു. ഡിലന്റെ കവിതയിലും ഈ സ്വാധീനതകള്‍ ദൃശ്യം. പക്ഷെ മോഡേണിസവും റൊമാന്റിസിസവും ഒരേപോലെ അതിലെ അന്തര്‍ധാരകളായിരുന്നു. സവിശേഷാര്‍ത്ഥത്തില്‍ നിയോ റൊമാന്റിക് എന്നു ചില വിമര്‍ശകര്‍ അവയെ വിശേഷിപ്പിച്ചു കാണാറുണ്ടെങ്കിലും അതും വാസ്തവവേധിയായിരുന്നില്ല. മനുഷ്യാവസ്ഥയുടെ നാദലയം തീര്‍ക്കലായിരുന്നു ഡിലന്റെ കാവ്യവ്യക്തിത്വം ലക്ഷ്യമിട്ടതെന്നു തോന്നുന്നു. വൈവിധ്യവും ബഹുസ്വരതയും നിറഞ്ഞ ലോകത്തില്‍ അന്തര്‍ലീനമായ ഏകതയുണ്ടെന്നും ആ ഏകതയെ തേടലാണ് എഴുത്തെന്നും അദ്ദേഹം ധരിച്ചു. കവിതയിലൂടെ നിരന്തരം നടത്തിയത് ഈ ഏകതയിലേക്കുള്ള യാത്രയായിരുന്നു. അതിനായിട്ടദ്ദേഹം കാവ്യരൂപങ്ങളിലും ശൈലിയിലും നിരന്തരമായ മാറ്റംമറിച്ചിലുകള്‍ വരുത്താന്‍ ശ്രമിച്ചു. പലപ്പോഴും ഏകതയെ തേടിയുള്ള സഞ്ചാരത്തിന് നിഷ്‌കൃഷ്ടമായ സീക്വന്‍സുകള്‍ നിറഞ്ഞ ശൈലി തെരഞ്ഞെടുത്തു. പക്ഷെ അവയെ ബോധപൂര്‍വം ഭഞ്ജിക്കാനും ഇടയ്ക്കിടെ ശ്രമിച്ചതായി കാണാം.

ഏകതയെ തേടിയുള്ള യാത്രയില്‍ ജൈവികമായ അവസ്ഥകള്‍ എത്രമേല്‍ അവയുടെ അലകും പിടിയും സൃഷ്ടിച്ചുകൊടുക്കുന്നുവെന്ന് ഡിലന്‍ തോമസ് തിരിച്ചറിഞ്ഞു. ജീവിതം ഒരു ആഭിചാരം പോലെ ആയിത്തീരുന്നു. ജൈവിക സത്ത പേറുന്ന ആഭിചാരം. അതിന് സവിശേഷമായ ശരീരവിച്ഛേദന ശാസ്ത്രം ഉണ്ടായിരുന്നു. ഡിലന്‍ തോമസിന്റെ കവിതകളില്‍ സൂക്ഷിച്ചുനോക്കിയാല്‍ ഇത് തെളിഞ്ഞുകാണാം. ആഭിചാരത്തിന്റെ കൊണ്ടാടപ്പെടുലുകളില്‍ സ്വയം കൊരുത്തികിടന്നുകൊണ്ട് അദ്ദേഹം ജീവതത്തിന്റെ ഏകതയുടെ താരസ്വരങ്ങള്‍ക്കായി ചെവിയോര്‍ത്തു. തനിക്കു ചിരപരിചിതങ്ങളായ വെല്‍ഷ് നാട്ടറിവുകളില്‍ സഞ്ചയിക്കപ്പെട്ട ബിബാംവലികളും ബൈബിളില്‍ നിന്നും ജീവന്‍കൊണ്ട കല്പനകളും അവയില്‍ നിറഞ്ഞു. ഫ്രോയിഡിന്റെ മനോവിജ്ഞാനീയ പാരായണങ്ങള്‍ നല്‍കിയ ആബോധപരതാബോധം അതിലെ വാങ്ചിത്രങ്ങളായി വരാതിരുന്നില്ല. തന്റെ കവിതയ്ക്കുമേല്‍ സ്വാധീനത സൃഷ്ടിയ്ക്കുന്ന സംസ്‌കാരത്തെ കുറിച്ച് ഡിലന്‍ തോമസ് ഗ്ലിന്‍ ജോണ്‍സിനുള്ള ഒരു കത്തില്‍ ഇങ്ങനെ എഴുതുന്നു.'' My own obscurity is quite an unfashionable one, based, as it is, on a preconceived symbolism derived (I'm afraid all this sounds wooly and pretentious) from the cosmic significance of the human anatomy'.

ശയ്യാഗുണങ്ങളാല്‍ സമ്പന്നമാണ് ഡിലന്‍ തോമസിന്റെ രചനകള്‍. വിശേഷിച്ചും ആദ്യകാല രചനകള്‍. പരമ്പരാഗത കാവ്യാനുശീലനങ്ങളെ അവ ഉത്തരോത്തരം ഉയര്‍ത്തിപ്പിടിക്കുന്നു. വാഗ് തീവ്രതകളാല്‍ സമ്പന്നവും. കാവ്യാത്മകതയും സംഗീതാഭിമുഖ്യവും ഡിലന്‍ തോമസിന്റെ രചനകളില്‍ നിറഞ്ഞുനില്‍ക്കുന്നു. ഇംഗ്ലീഷ് കവിതകളില്‍ ആധുനികതയുടെ മുന്നോടിയായ ജെറാള്‍ഡ് മാന്‍ലി ഹോപ്കിന്‍സിന്റെ സ്വാധീനതകള്‍ ഡിലന്‍ തോമസിന്റെ രചനകളിലും കാണാം. ഹോപ്കിന്‍സ് കാവ്യാനുശീലത്വമൊക്കെ പഠിപ്പിച്ചിട്ടുണ്ടെങ്കിലും അത് തന്റെ കവിതയിലെ സ്വാധീനിതയാണെന്ന് ഡിലന്‍ തോമസ് സമ്മതിച്ച് തരില്ല. അദ്ദേഹം അതിനെ നിഷേധിച്ചിട്ടുമുണ്ട്. ഹോപ്കിന്‍സല്ല തോമസ് ഹാര്‍ഡിയാണ് തന്റെ കാവ്യവ്യക്തിത്വത്തെ നിര്‍വചിച്ചതെന്നാണ് ഡിലന്‍ തോമസിന്റെ പക്ഷം. പക്ഷെ നിരൂപകര്‍ ഹോപ്കിന്‍സ് കൂടാതെ ജെയിംസ് ജോയിസിന്റേയും റിംബാദിന്റേയും ഡി എച്ച് ലോറന്‍സിന്റേയും വില്യം യോര്‍ക്ക് ടിന്‍ഡാളിന്റേയും ഒക്കെ സ്വാധീനതകള്‍ ഡിലന്‍ തോമസില്‍ ചാര്‍ത്തിക്കൊടുക്കുന്നുണ്ട്.

വാക്കുകള്‍ നിറച്ചുവെയ്ക്കുന്ന വിഭ്രമങ്ങളാണ് തനിക്ക് എഴുത്തെന്ന് ഡിലന്‍ തോമസ് പലവട്ടം പറഞ്ഞു. വാക്കുകള്‍ വിഭ്രാമകരമായി തടവിലിടുന്ന ഇടമാകുന്നു എഴുത്ത്. വാക്കുകളുമായി അനുരാഗത്തിലായതിനാല്‍ മാത്രമാണ് കവിത എഴുതാന്‍ ഇരിക്കുന്നത്. ഓര്‍മ്മയില്‍ വരുന്ന ആദ്യ കവിതകള്‍ നേഴ്‌സറി റൈമുകളാണ്. അവ വായിക്കാന്‍ ശീലിക്കുന്നതിനു മുന്‍പു തന്നെ അതിലെ വാക്കുകളുമായി രാഗത്തിലായിക്കഴിഞ്ഞിരിക്കും. വാക്കുകളുമായി മാത്രം. വാക്കുകള്‍ എന്തിനെ അര്‍ത്ഥമാക്കുന്നു, അവ എന്തിലേക്ക് നയിച്ചുകൊണ്ടുപോകുന്നുവെന്നത് തീര്‍ത്തും സെക്കന്‍ഡറിയായ കാര്യം. വാക്കുകളുമായി പ്രണയത്തിലാകുന്നു. അവയുടെ കാരുണ്യത്താല്‍, ഇടയ്ക്കിടെ തനിയ്ക്ക് വാക്കുകളെ സ്വാധീനത്തിലാക്കാന്‍ കഴിയുമെന്നും അവയെ മെല്ലെ മെല്ലെ മാറ്റിത്തീര്‍ക്കാന്‍ കഴിയുമെന്നും തിരിച്ചറിഞ്ഞു. അത്തരം മാറ്റം മറിക്കലുകള്‍ തികച്ചും ആസ്വാദ്യകരമായി. പലപ്പോഴും വാക്കുകള്‍ക്കു മുന്നില്‍ കാലിടറി. പതറിനിന്നു. നിസ്സഹായനായി. ഇത്തരം അനുഭവം നഴ്‌സറി റൈമുകള്‍ വായിച്ചപ്പോള്‍ മാത്രമല്ല, പില്‍ക്കാലത്ത് ബാലഡുകളും മറ്റു കാവ്യരൂപങ്ങളും പരിചിതമായപ്പോഴും തന്നെത്തേടി എത്തിയതായി ഡിലന്‍ തോമസ് എഴുതിയിട്ടുണ്ട്.

''I should say I wanted to write poetry in the beginning because I had fallen in love with words. The first poems I knew were nursery rhymes and before I could read them for myself I had come to love the words of them. The words alone. What the words stood for was of a very secondary importance ... I fell in love, that is the only expression I can think of, at once, and am still at the mercy of words, though sometimes now, knowing a little of their behaviour very well, I think I can influence them slightly and have even learned to beat them now and then, which they appear to enjoy. I tumbled for words at once. And, when I began to read the nursery rhymes for myself, and, later, to read other verses and ballads, I knew that I had discovered the most important things, to me, that could be ever.''

ഇത്തരം തിരിച്ചറിവുകളിലൂടെ വളര്‍ന്ന കവിതയാണ് ഡിലന്‍ തോമസിന്റേത്. ഒരു കാലത്തിനും പൂര്‍ണമായും പിടികൊടുക്കാതെ പുഷ്പിച്ചുകൊണ്ടേയിരിക്കുന്ന കാവ്യതളിമം. അദ്ദേഹത്തിന്റെ ഏറ്റവും മനോഹരമായ കവിതകളില്‍ ഒന്നാണ് Find Meat On Bones എന്നത്. അത് അവസാനിക്കുന്നത് ഇങ്ങനെയാണ്:

''Black night still ministers the moon,
And the sky lays down her laws,
The sea speaks in a kingly voice,
Light and dark are no enemies
But one companion.
'War on the spider and the wren!
War on the destiny of man!
Doom on the sun!'
Before death takes you, O take back this. ''

മരണം തിരിച്ചെടുക്കുന്നതിനും മുന്‍പേ ജീവിതം തുടര്‍ന്നുപോകേണ്ടതിങ്ങനെയാണ്. ഈ തിരിച്ചെടുപ്പിന്റെ വിധികളുടെ മേല്‍ എഴുതിക്കൊണ്ടേയിരുന്ന കവിയാകുന്നു ഡിലന്‍ തോമസ്. അദ്ദേഹത്തിന്റെ മരണശേഷവും ആ കവിതകള്‍ നിരന്തരം എഴുതപ്പെട്ടുകൊണ്ടു തന്നെ ഇരിക്കുന്നു.

അവലംബം:

1. Collected Poems(1934-1953)-Dylan Thomas, J. M DENT & SONS LTD, LONDON
2. A Dylan Thomas Companion, Life, Poetry and Prose by JOHN ACKERMAN, THE MACMILLAN PRESS LTD
3. Dylan Thomas: The Collected Letters, 2 vol.- edited by Paul Ferris, Weidenfeld & Nicolson, London
4. https://www.discoverdylanthomas.com



Next Story

Related Stories